Luke 5 - Sa Ugud Apudyus

Sa Nangayagan Jesus Atta Ummunae Disipuluna

¹ Sin-aḻgawan ḵad, inninggaw aḵ Jesus si taḻantag ni Baybay ad Gennesaret. Naaligummu da amode tagu ḵan siya ta dongngonda ituttudunae Ugud Apudyus.

² Pun innilan Jesus da duwae bangka'tte taḻantage tinenan da mammaugadiw te ummoyda insaḵsaḵ da tabuḵuḻda.

³ Pun summaḵay aḵ Jesus si bangkae ḵuwan Simon woḵ imbagana ḵan siyae ibattawana'ḵ aḵit si taḻantag. Pun tummuḵdu'ḵ Jesus woḵ nantuttudu'tta tagu.

⁴ Nagangput ḵade nantuttudu, ḵanana ḵan Simon, “Ipaoynu bangkam atte adaḻom ya uyudonyu da tabuḵuḻyu ta angugadiw ḵayu.”

⁵ Ḵanana, “Apu, illabḻabini gaye nangugadiw woḵ ippun paat innaḻani. Yaḵon gapu ta imbagam, iyadayuni ta uyudonni da tabuḵuḻni.”

⁶ Indawatda ḵad, amod pagay da ugadiwe naaḻa inggana'ḵ annae mapissay da tabuḵuḻda.

⁷ Gapu'tte sadi, nampaypayda'tta buḻundae inninggaw si osae bangka ta umoyda badangan dida. Dummatongda ḵad, binutbutda da tabuḵuḻ woḵ pinnuda duwae bangka'tta ugadiw woḵ tigangayda milisob.

⁸ Innilan ḵad Simon Peter naḵwa, nanalluḵu'tte sinagung Jesus woḵ ḵanana, “Apu tenam saḵon te ḵabasbassuḻanaḵ!”

⁹ Inugudna ḵaḵna te nataag da Simon ya da buḻunna'tte amod innaḻadae ugadiw.

¹⁰ Nataag os da buḻunnae da James ḵan John we abeng Zebedee. Pune sadi, ḵanan Jesus ḵan Simon, “Adiḵa maḵimut te misaḻad sinsadi, daḵampun ogon aḵ ugadiw tabuḵuḻam yaḵon da tagu ta amatida ḵan saḵon.”

¹¹ Pun intaḵdangda da bangkada'tte taḻantag woḵ tinenanda da losan ta mitun-udda ḵan Jesus.

Sa Naleprosy Ye Laḻaḵi

¹² Sin-aḻgawan ḵad si inninggawan Jesus atte osae ili, inggaw osae laḻaḵi ye ummamdan leprosyna. Innilana ḵad aḵ Jesus, ummadani ḵan siya woḵ nanalluḵu. Ḵananae nandagdagu, “Apu, nu piom ḵaanom saḵitḵu.”

¹³ Pun indawawan Jesus imana woḵ ḵananae nangappad, “On, pioḵ! Maḵaan saḵitnu!” Pun daguse naḵaan leprosyna.

¹⁴ Ḵanan Jesus, “Inḵa ampaila si padi ta panoḵnoḵanae naḵaan leprosym. Ḵad ittom ḵan siya idatunnu ḵan Apudyus we isun ni imbilin Moses ta amanoḵnoḵan da tagu we tuttuwae naḵaan. Malaksid atte padi, adim paat ibaga ḵingwaḵ ḵan siḵa'tta ngaiman.”

¹⁵ Yaḵon amo nandinongoḻ ugud atte mipanggob ḵan Jesus. Pun ummamdan da tagu we ummoy nangngoḻ atte tuttuduna ya paḵaanda da saḵitda.

¹⁶ Aḵ Jesus ḵad, pasig bumuttunge umoy alluwaḻu'tte bumbummaaw.

Sa Naparalaese Laḻaḵi

¹⁷ Sin-aḻgawan ḵad, nantuttudu'ḵ Jesus si boḻoy. Atuḵtuḵdu sidi da Pharisee ya da mimistulun ni lintog. Naḻpuda'tta losane ili'tte probinsiya'd Galilee ya sa probinsiya'd Judea, nidoga'd Jerusalem. Iinggaw ḵabooḻan Apudyus ḵan Jesus ta lamogna ḵaanon da saḵit.

¹⁸ Pune sadi, indatong da udume laḻaḵi naparalaese binuliganda. Padasonda ilonoḵ atte boḻoy ta ibadongda si sinagung Jesus,

¹⁹ yaḵon adidapun naḵailonoḵ te amode nansossodete tagu. Pun insaḵyatda'tte otop woḵ ummabutda'ḵ singgetbang. Nagangput ḵad, inuyudda nabuligan atte gaggawan da tagu'tte sinagung Jesus.

²⁰ Innilan ḵad ay Jesus pammatida, ḵanana'tte naparalaes, “Sunud, napakawan da basuḻnu.”

²¹ Gapu'tte sadi ye imbagana, ḵanan da Pharisee ya da mimistulun ni lintog atta somsomoḵda, “Ngaipana ugudon ḵaḵnat? Itaḻayagna long-agnae miyisu ḵan Apudyus we abus aḵ anna ḵaḻabbonganae amakawan atta basuḻ.”

²² Aḵ Jesus ḵad, inigammuna somsomoḵda pun ḵanana ḵan dida, “Ngaipa ḵaḵnat somsomoḵyu?

²³ Ngai ḵad ain naḻaslasu we ibaga ḵan siya, ‘Napakawan da basuḻnu,’ baḵon nu ‘Tumaḵdogḵa ya anaddaḻanḵa’?

²⁴ Yaḵon ta angigammuwanyu we saḵone Abeng Di Tagu we naḻpu'd langite niyanaḵ sina'd luta, anna ḵaḻabbongaḵ sina'd lutae amakawan atta basuḻ da tagu.” Ḵanana'tte naparalaes, “Bumangonḵa, aḻam bulignu ta inḵan si boḻoyyu.”

²⁵ Pun daguse bummangone intotollong da tagu, innaḻana buligna woḵ ummoyone andaydayaw ḵan Apudyus.

²⁶ Pune sadi, nataag da inninggaw sidi ye tagu ḵan naḵimtanda'tta innilada woḵ ḵanandae nangidaydayaw ḵan Apudyus, “Atopay! Nakaskasdaaw pagay innilani sinsadi!”

Sa Nangayagan Jesus Ḵan Levi

²⁷ Nagangput ḵad, lummawa'ḵ Jesus woḵ innilana osae andadagup atta bugise nangngadan aḵ Levi we tutuḵdu'tte opisinan da andadagup atta bugis. Ḵanana ḵan siya, “Tun-udonaḵ ta ambalinoḵ siḵa'ḵ disipuluḵ.”

²⁸ Pun lummibbat woḵ tinenana da ḵuḵuwana woḵ nitun-ud ḵan siya.

²⁹ Pun minangilin Levi da Jesus atte boḻoyna. Inninggaw da adu we andadagup atta bugis ya da udume tagu we naḵaḵan ḵan dida.

³⁰ Singngongonot da Pharisee ya da udume mimistulun ni lintog atta disipulun Jesus we ḵananda, “Ngaipa ḵayu maḵaḵan atta andadagup atta bugis ya da udume ḵabasbassuḻan?”

³¹ Ḵanan Jesus we summongbat ḵan dida, “Da anḵosdoḻ, adidapun ḵasapuḻan an-aagas. Yaḵon da masaḵit, ḵasapuḻanda.

³² Te adiyaḵpun ummali ta ayagaḵ da naun-unane tagu yaḵon ummaliyaḵ ta ayagaḵ da ḵabasbassuḻan ta ambabawida'tta basuḻda ya agaydae angwa.”

Sa Mipanggob Atte Allaun

³³ Pun ḵananda ḵan Jesus, “Da disipulun John, dam-oda allaun ta alluwaḻuda. Ḵaḵna bos da disipulun da Pharisee. Da ḵuwam ḵad, inaḻgawe anganda ḵan uminumda. Ngaipada ḵoon ḵaḵna?”

³⁴ Ḵanan Jesus, “Allaun ḵamman da buḻbuḻun ni angasawae laḻaḵi nu awad ḵan dida? Anganda pos pagay.

³⁵ Yaḵon sa umali ye aḻgaw nu miyadayu nangasawae laḻaḵi ḵan dida, sadi da aḻgawe allaunda.”

³⁶ Ḵanana bose nangugud ḵan dida si sanae pani, “Naippun tagu'ḵ pissayona baru we luput ta ituḵupna'tte dadaane silup. Te nu ḵoona ḵaḵna, sa baru we luput madadail ya adipun os miyapot atte dadaan.

³⁷ Naippun os tagu'ḵ ibilungna inabuyu'tte dadaane geddange bibillungan. Te nu ḵoona ḵaḵna, bumtaḵ sadi ye geddange bibillungan ḵad umabuyang ya madadail geddange bibillungan.

³⁸ Yaḵon ḵasapuḻane ibilung oḵyan inabuyu si baru we geddange bibillungan.

³⁹ Sa osa bos, sa uminum si dadaane bayas, adinapun simsiman bogsaḻ te ummingsa'tte dadaane bayas ya ḵanana'tte somsomoḵna, ‘Napiya pagay dadaan.’ ”