Luke 2 - Sa Ugud Apudyus

Sa Niyanaḵan Jesus

¹ Sa sadi ye timpu we niyanaḵan John, nangwa'ḵ lintog aḵ Emperor Augustus we umoy da losane tagu'tta ili ye ipangatan da iRome we ḵasapuḻane ampalistada.

² Sana ummunae nampalistaanda si aḵ Quirinius Gobernor si probinsiya'd Syria.

³ Gapu'tte sadi ye lintog, ḵasapuḻane umoy ampalista da losane tagu'tta niyanaḵan da danaḵḵoḻda.

⁴ Ummoy os aḵ Joseph we naḻpu'd Nazareth atte probinsiya'd Galilee nampalista'd Bethlehem atte probinsiya'd Judea te siya niyanaḵan Ari David we daḵdaḵoḻna.

⁵ Aḵ Mary ye umaannaḵ, nibuḻun os ḵan Joseph we umoy ampalista te nantuḻagdae an-asawada.

⁶ Inninggawda ḵad ad Bethlehem, sadi ummanaḵana.

⁷ Gapu ta naippun maigawan te napnu da boboḻoy atta tagu, ummoyda'tte iiddungan da baḵa. Pune sadi, nibuḵnag panguḻu we abengnae laḻaḵi. Pun ḵinagoyana woḵ pinaobogna'tte ḵaḵaḵḵanan da baḵa.

Sa Nampail-an Da Anghel Atta Antatangḵon Atta Karnero

⁸ Sa sadi ye labi, inninggaw da ummiyan si puḻag atte adani'd Bethlehem we anangḵon atta karnero.

⁹ Pune sadi, baag-en nampaila anghel Apudyus ḵan dida woḵ naḻangḻanganda'tte ḵinapaddan Apudyus. Pun naḵimtanda.

¹⁰ Ḵanan ni anghel ḵan dida, “Adi ḵayu maḵimut! Te sa annae ambaḻu we damage ibagaḵ ḵan diḵayu, siya gapun ni lumayadan da losane tagu.

¹¹ Te ḵan diḵayu niyanaḵ sinsadi ye labi sina'tte ili ye niyanaḵan Ari David, aḵ Kristu we Apu.

¹² Annaya angipanoḵnoḵ ḵan diḵayu we ḵatuttuwaan da ibagaḵ. Odasanyu uttinge naḵagoyan woḵ pinaobogda'tte ḵaḵaḵḵanan da baḵa.”

¹³ Imbagana ḵad ay, daguse nampaila da amoamode anghel we naḻpu'd langit woḵ nidogada'tte ummunae anghel pun ḵanandae nangidaydayaw ḵan Apudyus,

¹⁴ “Madaydayaw aḵ Apudyus ad langit. Anna lin-awa'tta tagu'd lutae mas-omana.”

¹⁵ Nipauli ḵad da anghel ad langit, nan-uugud da sadi ye anangḵon atta karnero woḵ ḵananda, “Intaḵu sinsadi'd Bethlehem ilan mipanggob atte naḵwa sidi ye impaigammun Apudyus ḵan ditaḵu.”

¹⁶ Pune sadi, nangganasondae ummoy woḵ indasanda da Mary ḵan Joseph ya sa uttinge pinaobogda'tte ḵaḵaḵḵanan da baḵa.

¹⁷ Innilada ḵad ay utting, imbagada da imbagan ni anghel we mipanggob ḵan siya,

¹⁸ woḵ da losane nangngoḻ, amod de nantataagda.

¹⁹ Yaḵon aḵ Mary ḵad, insisimoḵna da losane naḵwa wok pinopomponna si somsomoḵna.

²⁰ Nipauli ḵad da nanangḵon atta karnero si puḻag, nanggappiyada ḵan nandaydayawda ḵan Apudyus gapu'tta losane innilada ḵan dingngoḻda te da losane imbagan ni anghel ḵan dida, tuttuwae naḵwada.

Sa Nangngadananda Ḵan Jesus

²¹ Ḵawaḻun aḻgawna ḵad, ummoyda impasogyat utting ta tuttuwaonda lintog. Pun nginadananda'ḵ Jesus te siya imbagan ni anghel si daan Mary mabugiyan.

Sa Nangiyoyanda Ḵan Jesus Atte Templo

^22-24 Dummatong ḵad aḻgawe imbilin ni lintog Moses mipanggob atte pumoḻḵasan ni ḵaḵ-anaḵ, ummoy da Joseph ḵan Mary ad Jerusalem ta umoyda idatun ḵan Apudyus imbagan ni sadi ye lintoge duwae lagadan baḵon nu duwae kalapati. Innawitda bos utting ta idatunda ḵan Apudyus. Te sa nigili si sadi ye Lintog Apudyus ḵanana, “Ḵasapuḻane mitotoḵḵon da losane panguḻu we laḻaḵi aḵ ḵuwan Apudyus.”

²⁵ Inninggaw maḻmaḻong-ag ad Jerusalem we nangngadan aḵ Simeon. Naun-unane tagu te tinuttuwana Lintog Apudyus ya naapudyusan. Ḵad iinggaw Ispiritu Santu ḵan siya. Nabayage uuwayona dumaḵngan ni Anagu atta ganaḵ Israel.

²⁶ Sa awe, impaigammun ni Ispiritu Santu ḵan siyae adipun matoy inggana'ḵ ilana'ḵ Kristu we inkarin Apudyus.

²⁷ Impuyut ni Ispiritu Santu aḵ Simeon atte paway ni templo. Inniyoy ḵad da amana ḵan inana'ḵ Jesus ta tuttuwaonda da paḵwan ni lintog Moses mipanggob atte umunae miyanaḵe laḻaḵi, ummadani'ḵ Simeon.

²⁸ Innaḻana utting woḵ ḵananae nangidaydayaw ḵan Apudyus,

²⁹ “Apu, saḵon sammilum, maḵwa matoyaḵ te lummin-awa somsomoḵḵu, gapu ta tinuttuwam da inkarim ḵan saḵon.

³⁰ Te innilaḵe mismu Anagu ḵan diḵani ye imbuunnu.

³¹ Sa insaganam atte sinagung da losane tagu.

³² Isunan silawe allangḻang ta ipailana da pinion Apudyus atta Gentil. Gapu bos ḵan siya, midayaw da tagume ganaḵ Israel.”

³³ Nataag da ama ḵan inan Jesus atte imbagan Simeon we mipanggob ḵan siya.

³⁴ Pune sadi, binindisyunan Simeon dida woḵ ḵanana ḵan Mary, “Dongngom, sa annae abeng, dinutuḵan Apudyus siya'ḵ mataguwan da adu ḵan ditaḵu we ganaḵ Israel ya adu bos da madusa. Awad da anging-ingnga ḵan siya.

³⁵ Sa ambanagana, da mitataḻu we ḵasomsomḵanda mipaigammu. Siḵa ḵad Mary, andadauyḵae isun di naduy-uḵ pusum si maḵwa si Abengnu.”

³⁶ Inninggaw os sidi mammad-ane profeta we nangngadan aḵ Anna. Abeng Phanuel we naḻpu'tta ganaḵ Asher. Nangasawa ḵad, pitun tawon woḵ natoy asawana.

³⁷ Sissiyae baḻu inggana'ḵ nantawon aḵ waḻumpuḻu ya opat. Patilayun umoy si paway ni templo ta andayaw ḵan alluwaḻu ḵan Apudyus atte inaḻgaw ḵan nilabi. Patilayune allaun ta alluwaḻu.

³⁸ Dummatong aḵ Anna woḵ innilana'ḵ Jesus, nanggappiya ḵan Apudyus. Inggan ni sadi, insaḻadnae angibagabaga'tta mipanggob ḵan siya'tta tagu we anguuway atte dumaḵngan ni anubut atta iJerusalem.

³⁹ Ginanggangput ḵad da Joseph ḵan Mary ḵingwa da paḵwan ni Lintog Apudyus, nipaulida'd Nazareth atte probinsiya'd Galilee ye naḻpuwanda.

⁴⁰ Sa abeng ḵad, dummaḵoḻ, ḵummosdoḻ ḵan nasomḵan. Pun nas-om aḵ Apudyus ḵan siya woḵ binindisyunana.

Aḵ Jesus Atte Templo

^41-42 Nasawaḻan ḵad aḵ duwa tawon Jesus, nibuḻun ḵan amana ya aḵ inanae ummoy ad Jerusalem naḵagayagaya'tte Gayagayan da Judyu we ngannonda Nallausan te tinawone umoyda.

⁴³ Nagangput ḵad gayagaya, nallibbat da Mary ḵan Joseph we nipauli'd Nazareth. Ḵainamada gay natenan aḵ Jesus ad Jerusalem.

⁴⁴ Sa somsomoḵda, nibuḻun atta udume nanaddaḻan, pun iggada gaye ummoyon inggana'ḵ nasdom. Inniladapune ippun aḵ Jesus, ummoyda singngit atta buḻunda ya da agida.

⁴⁵ Pun naippun ḵad ay indasanda, nipaulida'd Jerusalem we umoy anaḻata ḵan siya.

⁴⁶ Ḵaḵlun aḻgawna ḵad, indasanda si paway ni templo we maḵaam-ammung atta mimistulun ni lintog ya nandodongngoḻ ḵan nan-im-imus ḵan dida.

⁴⁷ Da losane nandongoḻ ḵan siya, nataagda'tte laingna ya da isongbatna.

⁴⁸ Pun innilan ḵad da sin-abeng, nataagda bos. Ḵanan inana, “Ngaipam ay ḵoon ḵaḵna ḵan diḵani? Adimpun ḵamman igammu we nambimbinsaw ḵani ye nanaḻata ḵan siḵa?”

⁴⁹ Ḵanan Jesus, “Ngaipayu ḵad ain saḵon taḻataon? Adiyupun ḵamman igammu we ḵasapuḻane annaaḵ si boḻoy Amaḵ?”

⁵⁰ Yaḵon da Mary ḵad ḵan Joseph, adidapun naawatan pion ni inugudna ḵanan.

⁵¹ Pun nibuḻun aḵ Jesus ḵan didae nipauli'd Nazareth woḵ tinuttuwana da imbagada. Aḵ inana ḵad, iniittomana da losane naḵwa.

⁵² Aḵ Jesus ḵad, dummaḵoḻ ya amo nasomḵan woḵ nas-om aḵ Apudyus ya da tagu ḵan siya.