Luke 18 - Sa Ugud Apudyus

Sa Baḻu Ya Sa Ḵuwis

¹ Pun imbagan Jesus atta disipuluna annae pani ta tuttuduwana didae patilayunda alluwaḻu ya adida mappog.

² Ḵanana, “Inninggaw ḵuwis atte osae ili ye adipun angisipog ḵan Apudyus ya potogona bos da asintataguna.

³ Inninggaw os baḻu'tte sadi ye ili ye ampappauli ye ḵanana, ‘Ittom ḵappos ustu we ḵalintogaḵ ta adiyaḵ maabaḵ atta ḵabusuḻḵu.’

⁴ Nabayage adimpun ni ḵuwis pinatgan yaḵon anungusna ḵad ḵanana'tte long-agna, ‘Adiḵpun isipog aḵ Apudyus ya potogoḵ da asintataguḵ,

⁵ yaḵon gapu ta nappogaḵ, ittoḵ ḵalintogan ni baḻu ta adi ampappauli.’ ”

⁶ Pun ḵanan Jesus, “Dongngonyu imbagan ni ḵuwis atte baḻu.

⁷ Adimpun ḵamman Apudyus itton ḵalintogan da pinilinae tagu we anḵodaw aḵ ḵadagu ḵan siya si inaḻgaw ya nilabi? Itaḻyanna ḵamman badangna?

⁸ Annaya ibagaḵ ḵan diḵayu, ittonae dagus ḵan dida ḵalintoganda. Yaḵon mipauliyaḵ ḵade Abeng Di Tagu, awad ḵamman odasaḵ aḵ amati ḵan saḵon sina'd luta?”

Sa Pharisee Ya Sa Andadagup Atta Bugis

⁹ Inug-uggud os Jesus ḵan dida annae pani'tta sanae antaḻgoddae naun-unanda ḵan potogonda da asintataguda.

¹⁰ Ḵanana, “Inninggaw da duwae tagu we ummoy atte paway ni templo nalluwaḻu. Pharisee osa ya sa andadagup atta bugis.

¹¹ Nillumnoḵda ḵad, summiḵad Pharisee ye bummattawa'tta udum woḵ ḵananae nalluwaḻu, ‘Anggappiyaaḵ Apudyus te adiḵpun isu da udume an-igab, adidapun naun-unan, maḵadagdagasda taḵon ay annate andadagup atta bugis.

¹² Te ḵan saḵon, amigwaaḵ allaun si sindumingguwan ta alluwaḻuwaḵ ya ittoḵ os ḵasimpuḻun ni losane tangdanḵu.’

¹³ “Sa andadagup ḵad atta bugis, summiḵad atte battawa woḵ adipun nantangad ad langit te mabain atta basuḻna yaḵon ḵinabḵabna baḻuḵungna te nambabawi'tta basuḻna woḵ ḵanana, ‘Apudyus, ḵadaguwanaḵ ḵappose ḵabasbassuḻan.’ ”

¹⁴ Pun ḵanan Jesus we nangiyanungus, “Annaya ibagaḵ ḵan diḵayu, ummoyonda ḵad, sa andadagup atta bugis imbelang Apudyus aḵ ippun basuḻna te pinakawanna. Yaḵon sa Pharisee, adimpun Apudyus pinakawan. Te ngaimane angipangatu si long-agna, mipababa. Ḵad ngaimane angipakumbaba si long-agna, mipangatu.”

Sa Namindisyunan Jesus Atta Abeng

¹⁵ Sin-aḻgawan ḵad, inninggaw da nangiyoy atta abengda ya da utting ḵan Jesus ta ipatayna imana ya bindisyunana dida. Innilan ḵad da disipuluna, sinuppaḵanda dida.

¹⁶ Yaḵon inayagan Jesus da abeng woḵ ḵanana'tta disipuluna, “Iyunudyu we umali da abeng ḵan saḵon. Adiyu paadiyon dida te da tagu we isuda midogada'tte ampangatan Apudyus.

¹⁷ Ibagaḵ ḵan diḵayu ḵatuttuwaan, ngaimane adina awaton ampangatan Apudyus we isun ni abeng, adipun paat midoga.”

Sa Baḵnang

¹⁸ Inninggaw pangat da Judyu we ḵananae nangimus ḵan Jesus, “Ambaḻu we Mistulu, ngai ambaḻu we ḵooḵ ta ittanaḵ ḵan Apudyus atte biyag aḵ inggana?”

¹⁹ Ḵanan Jesus ḵan siya, “Ngaipam awagan saḵon aḵ ambaḻu? Naippun udum aḵ ambaḻu abus aḵ Apudyus.

²⁰ Igammum da bilin Apudyus we ḵanana, ‘Adiḵa maḵadagdagas, adiḵa pumatoy, adiḵa an-aḵaw, adim taḵdoḻan tinutuli ya dayawom da amam ḵan inam.’ ”

²¹ Ḵanana ḵan siya, “Inggan ay ni ḵaban-ogḵu, tinuttuwaḵ losan da sadi ye lintog.”

²² Dingngoḻ ḵad Jesus, ḵanana ḵan siya, “Os-ossaan adimpun ḵingwa. Inḵa ingina da losane ḵuḵuwam ya iwaḻasnu bayadda'tta ḵaḵapus woḵ awad de binaḵnangnu we inggappot Apudyus ad langit. Umaliḵa, tun-udonaḵ.”

²³ Dingngoḻna ḵad imbagan Jesus, amod de dadauyna te amod de binaḵnangna.

²⁴ Innilan ḵad Jesus we andadauy ḵanana, “Anḵamnut midog-an da babaḵnang atte ampangatan Apudyus.

²⁵ Naḻaslasu lumnoḵan ni camel atte abut ni tanud nu sa midog-an ni baḵnange tagu si ampangatan Apudyus.”

²⁶ Da nandongoḻ ḵananda, “Pun ngai da maḵwae matagu?”

²⁷ Ḵanan Jesus we summongbat, “Da adimpun da tagu lamog ḵoon, lamog Apudyus ḵoon.”

²⁸ Ḵanan Peter, “Ilam, tinenanni da boḻoyni ta ambalin ḵani'ḵ disipulum.”

²⁹ Ḵanan Jesus ḵan dida, “Ibagaḵ ḵan diḵayu ḵatuttuwaan, ngaimane tenana boḻoyna, asawana, susunudna, amana ḵan inana ya da abengna gapu si ampangatan Apudyus,

³⁰ ad-adu'ḵ adayu itton Apudyus ḵan siya si annae biyag nu sa tinenana. Sa umali bose timpu, maittan os atte biyag aḵ inggana.”

Sa Piḵlun Jesus We Nangibaga Si Matoyana Ḵan Umuliyana

³¹ Pun imbattawana da nasawaḻan aḵ duwae disipuluna woḵ ḵanana ḵan dida, “Dongngonyu! Sinsadi anagada taḵu'd Jerusalem, ḵad da losane inggilin da profeta si mipanggob ḵan saḵone Abeng Di Tagu, mituttuwada.

³² Te mipuḻangaḵ atta Gentil ḵad ang-angyagonaḵ, ibabbainaḵ ḵan tuptuppaanaḵ.

³³ Ap-aplitonaḵ ya asidaot saḵon gongaton. Yaḵon sa miḵaḵlu we aḻgaw, umuliyaḵ.”

³⁴ Yaḵon adimpun da disipuluna naawatan imbagana te ḵan dida, nitaḻu piona ḵanan.

Sa Naḵuḻape Antapatapaya

³⁵ Madam-an ḵad da Jesus ad Jericho, inninggaw naḵuḻape tutuḵdu'tte igid ni ḵaḻsae antapatapaya.

³⁶ Dingngoḻna ḵade lumaus da adu we tagu, inimusna nu ngai maḵmaḵwa.

³⁷ Ḵanandae summongbat, “Annae lumaus aḵ Jesus we iNazareth.”

³⁸ Pun ḵananae napapḵaaw, “Jesus we ganaḵ Ari David, ḵadaguwanaḵ ḵappos!”

³⁹ Da ummuna si buḻog, inggimauda ta guminoḵ yaḵon amo indangsoḻnae nampoḵaw, “Ganaḵ Ari David, Ḵadaguwanaḵ ḵappos!”

⁴⁰ Pune sadi, gumminoḵ aḵ Jesus woḵ impaayagna sadi ye naḵuḻap. Ummadani ḵad ḵanan Jesus ḵan siya,

⁴¹ “Ngai piome ḵooḵ ḵan siḵa?” Ḵanana, “Apu, pioḵe maḵaila.”

⁴² Ḵanan Jesus, “Gapu'tte pammatim ḵan saḵon, maḵailaḵa.”

⁴³ Pun daguse naḵaila woḵ nitun-ud ḵan siyae dinaydayawna'ḵ Apudyus. Innilan ḵad da losane tagu da sanae naḵwa, dinaydayawda bos aḵ Apudyus.