John 14 - Sa Ugud Apudyus

Sa Daḻane Umoy Ḵan Apudyus We Ama

¹ Ḵanan Jesus atta disipuluna, “Adi ḵayu ambimbinsaw, amati ḵayu ḵan Apudyus ya amati ḵayu bos ḵan saḵon.

² Aduadu maigawan atte boḻoy Amaḵ. Ḵad iyyaḵ isagana da inggawanyu. Ḵad nu daḵampun aḵ tuttuwa, ibagaḵ ḵamman ḵan diḵayu we iyyaḵ angisagana'ḵ inggawanyu?

³ Ḵad nu iyyaḵ isagana inggawanyu, mipauliyaḵ ḵasin ta aḻaḵ diḵayu ta sa igawḵu siya bos inggawanyu.

⁴ Ḵad igammuwonyu daḻane umoy si ayaḵ.”

⁵ Ḵanan Thomas, “Apu, naippun igammuni nu dinu ayam. Ḵad ngai inonni ye angigammu'tte daḻan?”

⁶ Ḵanan Jesus, “Saḵon daḻan, ḵatuttuwaan ḵan biyag. Naippun maḵaoy ḵan Amaḵ nu adi angoy ḵan saḵon.

⁷ Nu inigammuyu saḵon, inigammuyu oḵyan os aḵ Amaḵ. Inggana sinsadi, igammuyu'ḵ Amaḵ ya innilayu bos.”

⁸ Ḵanan Philip, “Apu, ipailam ud ḵan diḵani'ḵ Amam ta mat-op ḵani.”

⁹ Ḵanan Jesus, “Nabayage inninggawaḵ ḵan diḵayu ḵad daannupun os ay igammuwon saḵon, Philip? Ngaimane nangila ḵan saḵon, innilada bos aḵ Amaḵ. Ḵad ngaipam ḵanane ipailam ud ḵan diḵani'ḵ Amam?

¹⁰ Adimpun ḵamman patiyone awadaḵ ḵan Amaḵ ya awad aḵ Amaḵ ḵan saḵon? Sa imbagaḵ ḵan diḵayu, daḵampun aḵ ugudoḵ si ḵuwaḵe ḵaḻabbongan yaḵon sa Ama we iinggaw ḵan saḵon, ḵoona da ḵewaaḻna.

¹¹ Pun patiyonyu we awadaḵ ḵan Amaḵ ya awad aḵ Amaḵ ḵan saḵon. Nu adiyupun patiyon imbagaḵ, patiyonyu oḵyan gapu'tta ḵingwaḵe nakaskasdaaw.

¹² “Ibagaḵ ḵan diḵayu ḵatuttuwaan, ngaimane amati ḵan saḵon, ḵoona bos da ḵingwaḵ. Ḵad daḵdaḵoḻ da ḵoona nu da ḵingwaḵ te iyyaḵ ḵan Amaḵ.

¹³ Ḵad ngaimane ḵodawonyu mipagapu'tte ḵaḻabbongaḵ, ḵooḵ ta midayaw Ama mipagapu'tte Abeng.

¹⁴ Nu ḵodawonyu da ngaimane mipagapu'tte ḵaḻabbongaḵ, ḵooḵ.”

Sa Inkarin Jesus We Ibuunna

¹⁵ Pinagatupan Jesus woḵ ḵanana'tta disipuluna, “Nu ayatonyu saḵon, tuttuwaonyu da bilinḵu.

¹⁶ Ḵad ḵodawoḵ ḵan Amaḵ ta angibuun aḵ Bumadang ḵan diḵayu. Siya Ispiritu Santu we inggaw ḵan diḵayu'ḵ inggana.

¹⁷ Siya Ispiritu Santu we angituttudu ḵan diḵayu si ḵatuttuwaan mipanggob ḵan Apudyus. Da tagu we adipun amati ḵan saḵon, adidapun awaton te adidapun igammu ya immatunan. Yaḵon ḵan diḵayu, igammuyu te awad ḵan diḵayu ya iinggaw ḵan diḵayu.

¹⁸ “Adiḵpun diḵayu tenane isun di ulila te mipauliyaḵ ḵan diḵayu.

¹⁹ Sin-aḵitan ya da tagu we adipun amati naippun ogon ilanda ḵan saḵon yaḵon diḵayu asiyu ilan saḵon. Te mataguwaḵ ḵasin ya matagu ḵayu bos.

²⁰ Sa sadi ye aḻgaw, igammuwonyu we awadaḵ ḵan Amaḵ ya awad ḵayu ḵan saḵon ya awadaḵ ḵan diḵayu.

²¹ Ngaimane amopotpot ḵan anuttuwa'tta bilinḵu, siya angayat ḵan saḵon. Ḵad sa angayat ḵan saḵon, ayaton Amaḵ ya ayatoḵ os ya ipaigammuḵ ḵan siya mipanggob ḵan saḵon.”

²² Ḵanan Judas we daḵampun ḵan Judas Iscariot, “Apu, ngaipa abus ḵani'ḵ angipaigammuwam si mipanggob ḵan siḵa ya adimpun atta tagu'tte lubung?”

²³ Ḵanan Jesus we summongbat, “Sa angayat ḵan saḵon tuttuwaona ugudḵu ya ayaton Amaḵ. Ḵad saḵon ya aḵ Amaḵ umali ḵani ya iinggaw ḵani ḵan siya.

²⁴ Sa adipun angayat ḵan saḵon, adinapun tuttuwaon ugudḵu. Ḵad sa ugudḵu we dongngonyu, daḵampun aḵ naḻpu ḵan saḵon yaḵon naḻpu ḵan Amaḵ we nangibuun ḵan saḵon.

²⁵ “Imbagaḵ da sana si sissiyaaḵ ḵan diḵayu.

²⁶ Yaḵon sa bumadange ibuun Amaḵ, siya Ispiritu Santu we angiyugud ḵan saḵon. Ituttuduna ḵan diḵayu da losan ya paiḵagasmoḵna ḵan diḵayu da losane imbagaḵ.

²⁷ “Tenaḵ ḵan diḵayu lin-awa ya sa lin-awaḵ ittoḵ ḵan diḵayu. Daḵampun aḵ isun ni an-aatod da tagu we adipun amati an-aatodḵu ḵan diḵayu. Ḵad adi ḵayu maal-alimuunan ya maḵimut.

²⁸ Dingngoḻyu imbagaḵe iyyaḵon ya mipauliyaḵ ḵan diḵayu. Ḵad nu ayatonyu saḵon, allaylayad ḵayu oḵyan te iyyaḵ ḵan Amaḵ we nangatngatu nu saḵon.

²⁹ Sinsadi imbagaḵ da anna si daanda maḵwaan ta maḵwada ḵad, amati ḵayu.

³⁰ “Adipun ogon andu maḵaug-uggudaḵ ḵan diḵayu te annate umali'ḵ Satan we pangat da adipun amati ḵan saḵon. Naippun ḵabooḻana ḵan saḵon,

³¹ yaḵon ḵooḵ da imbilin Amaḵ ḵan saḵon ta igammuwon da tagu we ay-ayatoḵ aḵ Amaḵ. Awwayyu, intaḵun.”