Hebrews 13 - Sa Ugud Apudyus

Sa Mas-oman Apudyus

¹ Pagatupanyu we an-asiayate isun di ansusunud ḵan Kristu.

² Adiyu maliwatane ammangili'tta mangili ye umali'tte boḻoyyu te inggaw da nammangili'tta ḵaili ye adidapun igammu we anghel da minangilida.

³ Iḵagasmoḵyu da awad si babaḻḻudane isun di nidoga ḵayu ḵan dida ya da mapaḵaḻame isun di midoga ḵayu ampaḵaḻam ḵan dida.

⁴ Ḵasapuḻane patgan taḵu nan-as-asaw-an taḵu ya ippun oḵyan ḵadellawan taḵu ya pagatupan taḵu we antaḻgod atta asawa taḵu we naippun maḵadagdagas. Te dusaon Apudyus da maḵadagdagas ya da adaḻugonda da daḵampun aḵ asawada.

⁵ Adiyu ḵamommodon adu we pilaḵ. Mat-op ḵayu oḵyan atta awad ḵan diḵayu. Te ḵanan Apudyus, “Aaddi ye adiḵpun paat diḵayu tenan baḵon nu iwaḻang.”

⁶ Sana gapunae antaḻgod angibag-an taḵu ḵanane, “Aḵ Apu bumadang ḵan saḵon. Ḵad adiyaḵpun maḵimut. Ngai maḵwae ḵoon da tagu ḵan saḵon?”

⁷ Iḵagasmoḵyu da ummun-unae nangipangate nangituttudu ḵan diḵayu si Ugud Apudyus. Sosomḵonyu nambanagan ni nantataguda ya inunudyu pammatida.

⁸ Aḵ Jesu Kristu adipun ambalbaliw, yaḵon sumisissiya si awe, sinsadi ya aḵ inggana.

⁹ Pun ilanyu ta adi ḵayu paallelaw atta sabali ya da tinutuli ye tuttudu. Te sa ḵinabaḻun Apudyus amapigsa si somsomoḵ taḵu, daḵampun si angunudan taḵu'tta bilin mipanggob atta maḵan. Te da angunud atta sana naippun maganabda.

¹⁰ Pun da angipapati ye angunud si lintog Moses, naippun ḵaḻabbongandae maḵabillay atte bindisyun taḵu we ambanag si nidatunan Jesus atte kros para'tta basuḻ.

¹¹ Te sa ḵangatuwane padin da Judyu, awitona daḻan ni ayam atte Ḵasantuwane Kuwartu ta idatunna'ḵ mapakawanan da basuḻda. Yaḵon sa long-ag ni ayam, soggonda si lasin ni ḵampu.

¹² Ḵad isuna bos naḵwa ḵan Jesus we natoy atte lasin ni ili ta papoḻḵasona da tagu'tta basuḻda mipagapu'tte mismu we daḻana.

¹³ Intaḵu ḵan Jesus atte lasin ni ḵampu, ta ampaḵaḻam taḵu'tta nibabbainana.

¹⁴ Te daḵampun si annae lubung inggawan taḵu'ḵ inggana yaḵon siya singsington taḵu siyudade inggawan taḵu si umali ye aḻgaw.

¹⁵ Ḵad mipagapu ḵan Jesus ḵasapuḻane pagapagatupan taḵu we angidatun ḵan Apudyus si datune daydayaw. Te sadi ustu we ḵoon da losane amigbig ḵan siya.

¹⁶ Adi taḵu maliwatane angwa'tta ambaḻu ya allaay taḵu we angitod atta anḵasapuḻ te ḵatti datune mas-oman Apudyus.

¹⁷ Tuttuwaonyu da angipangpangu ḵan diḵayu ya unudonyu da bilinda te dida angayyuwan ḵan diḵayu ta sissiyae ampigsa pammatiyu te ḵasapuḻane songbatanda ḵan Apudyus nu ḵingwada da ḵewaaḻda. Tuttuwaonyu dida ta maganasandae angwa'tta ḵewaaḻda. Nu adiyu dida tuttuwaon, andadauyda ya naippun ittona'ḵ bumaḻuwanyu.

¹⁸ Iluwaḻuwanyu diḵani te aaddi ye ampoḻḵas da somsomoḵni gapu ta pionni ye ḵoon ustu'tta losane tagu.

¹⁹ Pun ḵodawoḵ ḵan diḵayu ta ipapatiyu we angiluwaḻu ḵan saḵon ta masapaaḵ oḵyan mipauli ḵan diḵayu.

Sa Anungus Ni Luwaḻu

²⁰ Aḵ Apudyus we maḻpuwan ni lumin-awaan, tinaguna ḵasin aḵ Jesus we Apu taḵu we ḵangatuwane angayyuwan atta karnero. Mipagapu si daḻan Jesus we pummoy-as si natoyana'tte kros, pinanoḵnoḵana annanayune tuḻag.

²¹ Oḵyan pos ta ittona da ambaḻu we ḵasapuḻanyu ta ḵoonyu da piniona ya ḵoona ḵan ditaḵu da mas-omana mipagapu ḵan Jesu Kristu. Ḵad siya madaydayaw aḵ inggainggana. Amen.

Sa Anungus Ni Bagbagan Paul

²² Susunudḵu ḵan Kristu, ḵodawoḵ ḵan diḵayu ta anusanyu dongngon da annae bagbagaḵe anoḻgag ḵan diḵayu te abobba annae suḻatḵu.

²³ Pioḵe ipaigammu ḵan diḵayu we napuḵayan aḵ Timothy ye sunud taḵu ḵan Kristu atte babaḻḻudan. Ḵad nu masapa dumatong, umali ḵani sinat ta inḵani diḵayu gaggaḵayon.

²⁴ Pakumustaonyu da angipangpangu ḵan diḵayu ya da losane tagun Apudyus sinat. Pakumustaon os diḵayu'tta susunud taḵu we namati sina'd Italy.

²⁵ Awad oḵyan ḵan diḵayu losan ḵinabaḻu we maḻpu ḵan Apudyus.