Galatians 4 - Sa Ugud Apudyus

Sa Ḵasasaad Taḵu We Nambalin Aḵ Abeng Apudyus

¹ Ḵaḵna pioḵ ugudon: Nu sa abeng sissiyae anawid atta ḵuḵuwan amana, ippun nisabaliyana si musassu taḵon ay nu siya sinḵuwa'tta losane binaḵnang amana.

² Yaḵon sissiyae awad de anatangḵon ḵan siya ya awad os de anatangḵon atta binaḵnang amana inggana'ḵ dumatong timpu we iyawat amana ḵan siya da tawidona.

³ Ḵatti naḵwa ḵan ditaḵu, sa timpu we isu taḵun abeng te daantaḵupun yan maawatan tuttuwae mituttudu, nammusassuwon ditaḵu gapu'tta ug-ugali mipanggob atta lawwenge ispiritu si annae lubung.

⁴ Yaḵon dummatong ḵad ustu we timpu we inḵoddong Apudyus, imbuunna abengna ta miyanaḵ atte bubai. Niyanaḵe Judyu we paituray atte lintog.

⁵ Ḵingwana ḵatti ta subutona da nampaituray atte lintog ta mibelang taḵu'ḵ dummaḵoḻe abeng Apudyus.

⁶ Gapu ta abeng Apudyus ditaḵu, imbuunna Ispirituna we inkarin ni Abengna ta iinggaw ḵan ditaḵu. Ḵad gapu'tte Ispirituna, Ama usaron taḵu we angawag ḵan Apudyus si alluwaḻuwan taḵu ḵan siya.

⁷ Pun mipagapu ḵan Apudyus daḵampun ogon aḵ musassu ḵayu te nambalin ḵayu'ḵ abeng Apudyus. Ḵad nu abeng Apudyus diḵayu, asina bos itton da tawidonyu.

Sa Masosomḵan Paul Atta IGalatia

⁸ Sa awe ye daanyupun angigammuwan ḵan Apudyus, isuyu musassu we anserserbi'tta sinan-apudyus.

⁹ Yaḵon sinsana inigammuyu'ḵ Apudyus baḵon nu inigammuna diḵayu, ngaipayu bos ḵasin sanguwon da ug-ugalin da tagu si annae lubunge inunudyu? Adiyupun ḵamman igammu we naippun ḵabooḻandae anagu ḵan diḵayu ya naippun ittonda'ḵ bindisyun? Ngaipayu bos pione anserbi ḵasin ḵan didae isun di musassu?

¹⁰ Ḵaḵna ibagaḵ te annate unudonyu ugalin da Judyu mipanggob si ḵapatog da aḻgaw, da gayagaya, da buḻan ya da tawon.

¹¹ Pun iyogyatḵu mipanggob ḵan diḵayu te ippun nin anun ni pangogḵu we nantuttudu ḵan diḵayu.

¹² Susunudḵu ḵan Kristu, anusanyu ḵappos unudon saḵon te nambalinaḵ aḵ isuyu we Gentil we napuḵayan si lintog Moses. Ḵad ambaḻu nangwayu ḵan saḵon atte awe.

¹³ Sosomḵonyu ḵad, sa gapun ni inunaḵ iwwaḻagawag Ambaḻu we Damag ḵan diḵayu, anḵuya long-agḵu pun inninggawaḵ ḵan diḵayu sinat.

¹⁴ Ḵad taḵon ay nu nampaḵaḻam ḵayu gapu si anḵuḵuyaaḵ, adiyupun inamsew baḵon nu indiyan saḵon. Yaḵon sa ḵingwayu, minangiliyaḵe isun di anghel Apudyus baḵon nu aḵ Jesu Kristu we mismu.

¹⁵ Amod de layadyu! Ngai naḵnaḵwa? Maḵwae ibagaḵ anna mipanggob ḵan diḵayu: Nu maḵwa ḵad oḵyan, inuḵityu da atayu ta ittonyu ḵan saḵon.

¹⁶ Pun sinsadi, ambalinaḵ aḵ ḵabusuḻyu gapu ta imbagaḵ ḵan diḵayu ḵatuttuwaan.

¹⁷ Da sadi ye angituttudu si daḵampun aḵ tuttuwa, paspas-oman diḵayu si an-awisanda yaḵon lawweng panggobda, piondae misina ḵayu ḵan saḵon ta dida abus aḵ dongngonyu.

¹⁸ Ustu masosomḵan tagu si buḻunna amod ay nu ambaḻu panggobnae isun ni ḵooḵ ḵan diḵayu, annaaḵ man baḵon nu naidaḵpun.

¹⁹ Gapu ḵan diḵayu ay-ayatoḵe aabeng, ampaḵaḻamaḵ ose isun ni inae anggumut inggana'ḵ awad ḵan diḵayu ugalin Kristu.

²⁰ Pioḵ pagay oḵyane awadaḵ ḵan diḵayu sinsadi ya pabaḻuwoḵ an-uugudḵu te annan ambinsawaḵ ḵan diḵayu.

Sa Mipaniyan Da Hagar Ḵan Sarah

²¹ Ibagayu ḵan saḵon, diḵayu we maḻyade paituray atte lintog, adiḵayupun ḵamman andongoḻ si lintog?

²² Te nigili si Ugud Apudyus we duwa da abeng Abraham we laḻaḵi. Sa osa abeng Hagar we musassu ya sa osa abeng Sarah we gattoḵe asawanae daḵampun aḵ musassu.

²³ Sa abeng ḵad ni musassu, daḵampun aḵ nakaskasdaaw niyanaḵana yaḵon sa abeng ni gattoḵe asawanae daḵampun aḵ musassu, niyanaḵ gapu si inkarin Apudyus ḵan Abraham.

²⁴ Sa annae naḵwa, naadaḻom piona ḵanan te da duwae bubai maḵwae mipanida'tta duwae tuḻage ḵingwan Apudyus atta tagu. Sa osae tuḻag siya lintoge innatodna ḵan Moses atte beleg Sinai ye awad ad Arabia. Sa nipani si annae tuḻag, aḵ Hagar te siya ya da abengna musassuda ḵad isuna bose da abeng ni tuḻag, musassuda bos, sa piona ḵanan, da angibatay si mataguwanda si angunudanda'tte lintog.

²⁵ Aḵ Hagar, maḵwa bose mipani si beleg Sinai ad Arabia we naḻpuwan ni lintog ya sa siyudad ad Jerusalem sinsana te da umili'd Jerusalem ya da losan ose Judyu we antaḻgod atte lintog Moses, anserbida'tte sadi ye lintoge isun ni musassu.

²⁶ Yaḵon sa bubai ye daḵampun aḵ musassu, mipani'tte baru we Jerusalem we siyudade inggawan Apudyus. Siya isun di ina taḵu losane namati.

²⁷ Te ḵanan ni awad atte Ugud Apudyus, “Siḵae basige ippun pulus napadasam aḵ ampaḵaḻaman di umanaḵ, lumayadḵa. Idangsoḻnu gingame angipaigammu si laylayadnu. Te siḵa tinenan asawam, amo naadu da abengnu si umali ye aḻgaw nu sa bubai ye miḵamboḻoy asawana ḵan siya.”

²⁸ Susunudḵu ḵan Kristu, ditaḵu we namati, miyis-isu taḵu ḵan Isaac we abeng Sarah te niyanaḵ gapu si inkarin Apudyus. Ḵad ditaḵu bos nibelange abeng Abraham gapu si sadi ye inkarin Apudyus ḵan siya.

²⁹ Atte sadi ye timpu, sa abenge daḵampun aḵ nakaskasdaaw niyanaḵana, nampaḵaḻamona'ḵ Isaac we niyanaḵ gapu si ḵabooḻan ni Ispiritu Santu. Siya bos maḵwa sinsana te da musassun ni lintog, ampaḵaḻamonda ditaḵu we daḵampun aḵ musassu.

³⁰ Yaḵon ngai ḵanan ni Ugud Apudyus? Ḵanana, “Paḻyawom musassu ya sa abengna te adipun maḵwae maḵatawid abeng ni musassu'tte tawidon ni abenge daḵampun aḵ musassu.”

³¹ Pun susunudḵu ḵan Kristu, annaya mungimung ni inugudḵu: aditaḵupun nibelange abeng ni musassu yaḵon ditaḵu da abeng ni daḵampun aḵ musassu.