Galatians 3 - Sa Ugud Apudyus

Sa Nangawatan Da IGalatia Si Ispiritu Santu

¹ Nadongdong-ogan ḵayu we iGalatia! Ngai ḵad ain da nangallelaw ḵan diḵayu? Nalawag ḵad ose nipaila ḵan diḵayu we nipattoḻ aḵ Jesu Kristu atte kros!

² Imusoḵ ud anna ḵan diḵayu: Inawatyu ḵamman Ispiritu Santu gapu si nanuttuwaanyu si lintog baḵon nu sa nangngoḻanyu ya namatiyanyu si Ambaḻu we Damag?

³ Nadongdong-ogan ḵayu ḵamman? Ummunae namati ḵayu ḵan Apudyus mipagapu'tte Ispiritu Santu. Pun sinsadi, ngaipayu ḵanane lamogyu baliwan da long-agyu ta naippun angkuranganyu mipagapu'tta mismu we ḵabooḻanyu?

⁴ Ippun ḵad ain anun da adu we ampaḵaḻamanyu inggan ni namatiyanyu? Awad oḵyan pos.

⁵ Imusoḵ ḵasin ḵan diḵayu, innatod ḵamman Apudyus Ispiritu Santu ya sa angwaana'tta nakaskasdaaw ḵan diḵayu te tinuttuwayu lintog baḵon nu gapu si andongoḻanyu ya amatiyanyu si Ambaḻu we Damag?

Sa Pammatin Abraham

⁶ Aḵ Abraham ḵad, “Pinatina'ḵ Apudyus ya gapu si pammatina, imbelang Apudyus aḵ naun-unan.”

⁷ Pun maawatanyu oḵyane da tagu we amati ḵan Apudyus, dida da tuttuwae ganaḵ Abraham.

⁸ Nipadtu bos atte Ugud Apudyus we gapu'tte pammati, aḵ Apudyus angwa si maun-unan da Gentil si antotollongna te siya pion ni Ambaḻu we Damag ugudon. Sa annae Ambaḻu we Damag, sa naabuse imbagan Apudyus ḵan Abraham we nigili bos atte ugudna. Ḵanana, “Gapu ḵan siḵa, mabindisyunan da tagu'tta losane ili.”

⁹ Pun bindisyunan Apudyus da losane namati ye isun ni namindisyunana ḵan Abraham we namati ḵan Apudyus.

Sa Antaḻgodanda Si Anuttuwaanda Atte Lintog

¹⁰ Yaḵon losan atta antaḻgod si anuttuwaanda'tte lintog ta mibelangda'ḵ maun-unan, andagson dusada te awad de Ugud Apudyus we ḵanana, “Ngaimane adi patilayun anuttuwa'tta losane biline nigili si Lintog Apudyus, andagson dusana.”

¹¹ Pun nalawage ippun ossaan aḵ naun-unan si antotollong Apudyus gapu si anuttuwaana si lintog te nigili si Ugud Apudyus we ḵanana, “Sa tagu we aḵ Apudyus angwa si maun-unana mipagapu'tte pammatina, awad ḵan siya biyag aḵ inggana.”

¹² Yaḵon sa lintog adipun mibatay atte pammati, yaḵon ḵanan ni nigili'tte Ugud Apudyus, “Ngaimane anuttuwa'tta losane bilin ni lintog matagu gapu'tte sadi ye lintog.”

¹³ Yaḵon sinubut Kristu ditaḵu si madusaan taḵu te aditaḵupun lamog tuttuwaon da losane lintog si natoyana'tte kros para ḵan ditaḵu. Te sa nigili ye Ugud Apudyus ḵanana, “Ngaimane madusa ta matoy gapu si mitayunana'tte ḵayu, nadusa ḵan Apudyus.”

¹⁴ Mipagapu ḵan Jesu Kristu, binindisyunan Apudyus da Gentil we isun ni bindisyune inkarina ḵan Abraham ta ditaḵu we namati awaton taḵu oḵyan nikari ye Ispiritu Santu gapu si pammati taḵu.

Sa Lintog Ya Sa Kari

¹⁵ Susunudḵu ḵan Kristu, sosomḵonyu ḵad annae pani ye mipaniyan ni inkarin Apudyus ḵan Abraham. Sa ugali taḵu we tagu, nu awad tuḻagan aḵ napilmaane ustu, adipun maḵwae lisalison baḵon nu dog-an.

¹⁶ Sinsadi, inkarin Apudyus ḵan Abraham ya sa ganaḵna. Sa ugude ganaḵ atte Ugud Apudyus, daḵampun atta adu we ganaḵ piona ugudon yaḵon sa ossaane ganaḵnae aḵ Kristu.

¹⁷ Annaya pioḵ ḵanan: Naḵatuḻag aḵ Apudyus ḵan Abraham woḵ inkarinae ituttuwana sanate tuḻag. Sa lintoge naitod atte naḻaḵpus opat gasut ya tuḻumpuḻu we tawon, adimpun ni sanate tuḻag lamog lisalison inkarin Apudyus.

¹⁸ Te nu mibatay atod Apudyus si lintog, daḵampun ogon aḵ nibatay si inkarina. Yaḵon sa ḵatuttuwaan, amod de ḵinabaḻu we innatod Apudyus ḵan Abraham te inkarina.

Sa Mausaran Ni Lintog Moses

¹⁹ Gapu ta aditaḵupun inawat da inkarin Apudyus si nanuttuwaan taḵu si lintog, ḵanan da udume an-imus ngai tuttuwae usar ni lintog? Iyyun-unud Apudyus indoga'tta inkarina ta maawatan da tagu we naḵabasuḻda. Sa panggobna ḵad, mapagatupan sanae lintog inggana si umaliyan ni ganaḵ Abraham, siya'ḵ Kristu we inkarina. Sa lintog, imbuun Apudyus da anghelna'ḵ umoy angiyugud ḵan Moses ya asin Moses imbaga'tta tagu.

²⁰ Yaḵon sa inkarina ḵan Abraham, adinapun ḵasapuḻane awad angiyugud yaḵon siyae mismu ummoy nangibaga.

²¹ Piona ḵad ain ugudone misullagi lintog atta inkarin Apudyus? Naid! Adipun maḵwa! Adidapun misullagi, abus nansabali da panggob Apudyus we nangipaigammu ḵan dida. Te nu innatodna oḵyan lintoge maḵwae angitod si biyag aḵ inggana, maḵwa maun-unan da tagu gapu si anuttuwaanda'tte sadi ye lintog.

²² Yaḵon adidapun maḵaḵwa te sa ḵanan ni Ugud Apudyus, losane tagu patilayune bumasubasuḻ ya adipun maḵwae mapuḵayandae angwa'ḵ basuḻ atte ḵuwadae ḵabooḻan. Implanun Apudyus sadi ta sa inkarinae mibatay si pammatin ni tagu ḵan Jesu Kristu, abus aḵ maittana da amati.

²³ Sa timpu ḵade daampun da tagu amati ḵan Kristu, isu taḵun baḻude napupuḵuḵ ya naguwaḻdaan ta adi taḵu maḵalawa te ḵasapuḻane tuttuwaon taḵu lintog inggana'ḵ umali'ḵ Kristu we patiyon taḵu.

²⁴ Pun isun di binantayan ditaḵu si lintog inggana si ummaliyan Kristu ta siya angwa si maun-unan taḵu si antotollong Apudyus gapu si pammati.

²⁵ Yaḵon sinsadi te annae ummali'ḵ Kristu we pinati taḵu, daḵampun ogon aḵ sa lintog isun di angipupugod ḵan ditaḵu.

²⁶ Te losan ḵayu nibelang aḵ dummaḵoḻe abeng Apudyus mipagapu si pammatiyu ḵan Jesu Kristu si niyossaananyu ḵan siya.

²⁷ Gapu ta nabonyagan ḵayu'ḵ niyossaan ḵan Kristu, sinsadi annat ḵan diḵayu ugalin Kristu we isunan nansilupyu.

²⁸ Ḵad nu ḵatti, sa antotollong Apudyus, naippun mangadanan aḵ Judyu baḵon nu Gentil, musassu baḵon nu daḵampun, laḻaḵi baḵon nu bubai te os-ossaan ḵayu gapu si niyossaananyu ḵan Jesu Kristu.

²⁹ Ḵad gapu ta niyossaan ḵayu ḵan Kristu, nibelang ḵayu'ḵ ganaḵ Abraham ya maḵatawid ḵayu'tta inkarin Apudyus ḵan siya.