Acts 27 - Sa Ugud Apudyus

Sa Ayonan Paul Ad Rome

¹ Dummatong ḵad de aḻgawe allibbatanni ḵan Paul we umoy ad Italy, impuḻangda'ḵ Paul ya da udume baḻud ḵan Julius we osa'tta kapitan da Roman army ye ngannonda “Regiment ni Emperor.”

² Nambapur ḵani ye naḻpu'd Adramyttium we umoy atta ili'tte probinsiya'd Asia. Binuḻunan diḵani ḵan Aristarchus we iThessalonica si probinsiya'd Macedonia.

³ Mabigat ḵad, nansadang ḵani'd Sidon. Pun ḵinadaguwan kapitan Julius aḵ Paul woḵ iyyunudnae umoy atta boḻoy da buḻbuḻunna ta ittanda'tta ḵasapuḻana.

⁴ Ḵasin ḵani ḵad nallibbat, nangoy ḵani'tte sabali ye maoye matalingdane biiḵna'd Cyprus te niyabot bibbid ḵan diḵani.

⁵ Pun dinoḻmangni baybaye adani'tta probinsiya'd Cilicia ya Pamphylia woḵ dummatong ḵani'd Myra atte probinsiya'd Lycia.

⁶ Sidi nangdasan kapitan Julius atte bapur we naḻpu'd Alexandria we umoy ad Italy woḵ siya nallugananni.

⁷ Innum-ummaan ni bapur si pigan aḻgaw woḵ gapu'tte bibbid nampaḵaḻam ḵani ye dummatong si adani'd Cnidus. Gapu ta pummigsapigsa bibbid, ippun inon ni bapur we maaḵat, pun nangoy ḵani'tte sabali ye maoye matalingdane biiḵna'd Crete woḵ lausanni'd Salmone.

⁸ Yaḵon taḵon ay nu nangigiigid ḵani'd Crete, dodae nampaḵaḻam ḵani inggana'ḵ dummatong ḵani si ngannonda Ambaḻu we Iillongan Da Bapur we adani si ili'd Lasea.

⁹ Gapu ta nanunnuwan ḵani ya ḵaog-ogyat pagatupanni ye ambapur te naḻaḵpus aḻgawe nallaunan, ḵanan Paul we namagbaga ḵan dida,

¹⁰ “Bubuḻun, nu ipatut taḵu pagatupane ambapur, aaddi ye adu da madadail atta karga taḵu, taḵon ay bapur ya awad os da matoy.”

¹¹ Yaḵon aḵ Julius we osa'tta kapitan da suḻdadun da iRome adinapun tinuttuwa imbagan Paul te siya tinuttuwana imbagan ni kapitan ni bapur ya sa sinḵuwa si bapur.

¹² Da ḵaaduwan ḵad os atta buḻunni ye nallugan, piondae pagatupanni te sa sadi ye lugar lawweng aḵ inggawan ni bapur si timpun ni ageled. Pun ḵananda, “Padason taḵu pagay iduum ad Phoenix we ili'd Crete ta sidi inggawan taḵu si timpun ni ageled.” Ḵad ambaḻu we dadaḵḵaḻan te daḵampun aḵ nansagung si maḻpuwan ni bibbid.

Sa Bali

¹³ Sa sadi, dummatong bibbide naḻpu'd daya, ḵanandapun nu maḵwae pagatupanda baatda. Impangatuda andagsone ḵagae ngannonda angklae amaginoḵ si bapur woḵ nallibbat ḵani ye nangigiigid ad Crete.

¹⁴ Yaḵon sin-aḵitan ḵad, dummatong os ampigsae bibbide naḻpu'd lagude umoyon si dumingitan init ad Crete.

¹⁵ Tinupatupaḵan ni bibbid bapur, gapu ta adiḵanipun maḵasungab, inbay-anni gaye sa bibbid angipaoy nu dinu ayonana.

¹⁶ Nangoy ḵani'tte sabali ye maoye matalingdane biiḵ ni ban-oge ili si gawan ni baybaye ngannonda Cauda, insap-aḻni da bangkae binutbut ni bapur te natalingdan ḵani'ḵ aḵit yaḵon dodae nampaḵaḻam ḵani.

¹⁷ Nagangput ḵade nisap-aḻ da bangka, tinaḵodda bapur atte daḵoḻe tali ta adi maposyang da tablana. Indoḻada bos layab te maḵimutda'ḵ misagud bapur atta gummamung-uḻe gallis ad Syrtis. Yaḵon iwwaḻ-ongdae sa bibbid angipaoy atte bapur nu dinu angipaoyana.

¹⁸ Yaḵon pinagapagatupan ni ampigsae bali, nabigat ḵad ay insaḻaddae nangiballu'tta karga ta lumangpaw.

¹⁹ Sa ḵaḵlun aḻgawna, nan-iballuda bos atta lamintan ni bapur.

²⁰ Naḻaḵpus ḵad adu we aḻgaw, ippun nangil-anni si init ya da bituwon, annae amo ipigsana bibbid inggana'ḵ ippun ogon namnamani'ḵ matagu.

²¹ Gapu ta nabayage ippun nangananda, summiḵad aḵ Paul woḵ ḵanana, “Susunud, nu tinuttuwayu oḵyan imbagaḵe adi taḵu malikkat ad Crete, naippun nadadail ḵan nataḻaḵ.

²² Yaḵon sinsadi, adi ḵayu ambinsaw te naippun matoy ḵan ditaḵu, abus bapur aḵ madadail.

²³ Te sa labi, nampaila anghel Apudyus we sinḵuwa ḵan saḵone siya daydayawoḵ,

²⁴ woḵ ḵanana, ‘Paul, adiḵa maḵimut te ḵasapuḻane masumaḻyaḵa si sinagung ni Emperor ad Rome. Ḵad mipagapu bos si ḵinabaḻun Apudyus, taguwona siḵa ya da losane ḵalugannu ta naippun matoy.’

²⁵ Ḵad papigsaonyu da somsomoḵyu te amatiyaḵ ḵan Apudyus we mituttuwa da losane imbagana ḵan saḵon.

²⁶ Yaḵon ḵasapuḻane misagud bapur si osae ili si gawan ni baybay.”

²⁷ Naḻaḵpus ḵad nasawaḻan aḵ opate labi, nitupitupiyaḵ ḵani si Baybaye Adriatic si inggan ni lapun ni bali. Gawallabi ḵad, giniḵnan da marinero si bapur we annan miduum si igidna.

²⁸ Inisongda ḵad ḵaadaḻom ni danum, sissiyae duwampuḻu we dopa ḵaadaḻomna. Naaḵat ḵani ḵad aḵ aḵit, inḵasinda bos inisong woḵ nasawaḻan aḵ limae dopa ḵaadaḻomna.

²⁹ Maḵimutda nu maag ay mitupaḵ bapur atte batbatu. Pun inuyudda opate angkla si ubotan ni bapur ta guminoḵ ya illuwaḻuda ta pumadda.

³⁰ Ḵad da marinero si bapur pinadasdae umawid. Pun inuyudda bangka si baybaye allolloḵḵonda umoy si sinagung ni bapur ta umoyda uyudon angkla.

³¹ Yaḵon ḵanan Paul si kapitan ya da suḻdaduna, “Nu adipun inggaw da marinero si annae bapur, ippun matagu ḵan diḵayu.”

³² Pun ginsat da suḻdadu da tali ye nitaḵodan da bangka ta maanud da bangkae matenan da marinero si daḵoḻe bapur.

³³ Anna ḵade pummadda, impatut Paul we anganda woḵ ḵanana, “Duwan dumingguwan naḻaḵpuse ippun nangananyu te nataḵtaḵ si ḵimutyu.

³⁴ Sinsadi, angan ḵayu ta awad iḵosdoḻyu we matagu si annae bali. Adi ḵayu ambinsaw te naippun matoy ḵan ditaḵu ya masugat.”

³⁵ Naabus ḵade imbagan Paul sadi, innaḻana tinapay woḵ nanggappiya ḵan Apudyus si sinagung da losan. Pun binisbisaḵna woḵ insaḻadnae nangan.

³⁶ Innilada ḵad sadi, nasoḻgagda losan woḵ nanganda.

³⁷ Sa belangni ye inggaw si bapur, duwanggasut ya pitumpuḻu ya onome tagu.

³⁸ Nagangput ḵani ḵad nangan, imballuda iliḵe wheat we illuganda ta lumangpaw bapur.

Sa Nadadailan Ni Bapur

³⁹ Pummadda ḵad, intap da marinero si bapur taḻantag ni baybay yaḵon adidapun naḵaimatun nu ngai ye lugar sadi. Yaḵon innilada taḻantage galgallis. Pun ḵanandapun nu maḵwae ipaoyda bapur sidi.

⁴⁰ Ḵingwada ḵad, ginsatda da tali ye nitaḵodan da angkla ta matenanda si baybay woḵ inuḵasanda tali ye nitaḵodan ni tablae angipaoy si bapur. Ḵad impangatuda layab atte sangun ni bapur ta ipaoy ni bibbid si taḻantag.

⁴¹ Yaḵon nitupaḵ bapur si gummamung-uḻe gallis woḵ misagud sanguna pun adipun ogon maḵagidu. Sa ubotana ḵad, tinupatupaḵan ni tupiyaḵ woḵ naposyang.

⁴² Da suḻdadu ḵad, planudae gongatonda da baḻud ta ippun umuna anḵiyat ya umawid.

⁴³ Yaḵon iyyadin ni kapitan te pionae matagu'ḵ Paul. Pun imbilinna'tta lamogdae anḵiyate umunada pumaytuḵ si baybay ta tumaḵdangda si taḻantag,

⁴⁴ ḵad umun-unud da udume ampataw atta tabla ḵan udume ḵayun ni bapur. Pun dummatong ḵani si taḻantage ippun naḵwa ḵan diḵani.