Acts 21 - Sa Ugud Apudyus

Sa Ummayan Paul Ad Jerusalem

¹ Nansisina ḵani ḵad ḵan dida, nambapur ḵani ḵan da Paul woḵ nangaw-as ḵani ummoy ad Cos. Mabigat ḵad, ummoy ḵani'd Rhodes woḵ nanaḵpus ḵani'd Patara pun sidi nandissaaganni.

² Indasanni sidi osan bapur we umoy atte probinsiya'd Phoenicia woḵ nallugan ḵani.

³ Sa madawigi, maotap ad Cyprus atte lummausanni, pun nangaw-as ḵani'd Tyre ye osan ili si probinsiya'd Syria. Nandissaag ḵani sidi te indissaag ni bapur da karga.

⁴ Pun indasanni da udume namati ḵan Jesus woḵ inninggaw ḵani ḵan dida'ḵ sindumingguwan. Mipagapu si Ispiritu Santu imbagada ḵan Paul we adina pagatupane umoy ad Jerusalem.

⁵ Yaḵon naḻaḵpus ḵad aḻgawe inninggawanni sidi, nallibbat ḵani ta pagatupanni baatni. Pun losan da ḵabaḻyan da namati intuḻud diḵani inggana'ḵ niduum ḵani si lasin ni siyudad. Pun losan ḵani nanalluḵu'tte taḻantag woḵ nalluwaḻu ḵani.

⁶ Naabus ḵad, nan-asipaḵada ḵani woḵ nallugan ḵani si bapur pun nangulinda si boboḻoyda.

⁷ Pinagatupanni ye nambaate naḻpu'd Tyre woḵ dummatong ḵani'd Ptolemais. Pun ummoyni pinakumusta da susunud ḵan Kristu sidi woḵ inninggaw ḵani'ḵ sin-aḻgaw.

⁸ Mabigatpun tinenanni'd Ptolemais woḵ ummoy ḵani'd Caesarea. Inninggaw ḵani sidi si boḻoy Philip we osa'tta angiwaḻagawag si Ambaḻu we Damag. Siya osa'tta pitu we nadutuḵan ad Jerusalem we bumadang atta apostol.

⁹ Awad da opate babaḻasange abengdae angipadpadtu atte Ugud Apudyus.

¹⁰ Sa inninggawanni ḵad sidi si pigan aḻgaw, dummatong osae profeta we nangngadan aḵ Agabus we naḻpu'tte probinsiya'd Judea.

¹¹ Ummali ḵan diḵani woḵ innaḻana taḵyad Paul aḵ nanaḵodna'tta imana ḵan suḵina. Pun ḵanana, “Annaya imbagan ni Ispiritu Santu, ‘Ḵaḵna inon da Judyu'd Jerusalem we amaḻud atte sinḵuwa si annae taḵyad ya impuḻangda'tta Gentil.’ ”

¹² Dingngoḻni ḵad sadi, diḵani ya da tagu sidi, nandagdagu ḵani ta adi'ḵ Paul umoy ad Jerusalem.

¹³ Pun summongbat aḵ Paul woḵ ḵanana, “Ngaipa ḵayu sin-iibil ya paḻawengonyu somsomoḵḵu? Te naḵasaganaaḵe mibaḻud ya taḵon ay nu matoyaḵ ad Jerusalem mipagapu ḵan Apu Jesus.”

¹⁴ Adiḵanipun ḵad maḵatupod ḵan siya, iyyagayni woḵ ḵananni, “Oḵyan pos nu sa pinion Apudyus mituttuwa.”

¹⁵ Nagangput ḵad pigan aḻgawe inggawanni sidi, nansagana ḵani woḵ ummoy ḵani'd Jerusalem.

¹⁶ Inggaw da udum atta disipulun Jesus we iCaesarea we nibuḻun ḵan diḵani. Dummatong ḵani ḵad, inniyoyda diḵani si boḻoy Mnason we iCyprus, osa'tta ummunae namati woḵ inggaw ḵani si boḻoyna.

Sa Imbagan James We Ḵoon Paul

¹⁷ Dummatong ḵani ḵad ad Jerusalem, sillalaylayad da susunud ḵan Kristu we nammangili ḵan diḵani.

¹⁸ Mabigat ḵad, ummoyni ḵan da Paul innila'ḵ James. Wadawad sidi da losane angipangpangu'tta namati.

¹⁹ Naabus ḵade pinakumustan Paul dida, inug-uggudna da losane ḵingwan Apudyus atta Gentil mipagapu si ḵewaaḻna.

²⁰ Dingngoḻda ḵad sadi, indaydayawda'ḵ Apudyus woḵ ḵananda ḵan siya, “Susunud taḵu ḵan Kristu, pionni ye sosomkome ḵalibulibu belang da Judyu we namati ḵan Jesus ya amo ipapatidae angunud si lintog Moses.

²¹ Imbagada mipanggob ḵan siḵae intuttudum atta losane Judyu we naḵaumili'tta Gentil we iwaḻangda da lintog Moses ya adida pasogyat da abengda ya adida unudon ugali taḵu we Judyu.

²² Ngai ḵoon taḵu nu? Te aaddi ye igammuwondae dummatongḵa?

²³ Pun ḵoom da ibagani ḵan siḵa. Awad da opat ḵan diḵani ye laḻaḵi ye nansapata ḵan Apudyus.

²⁴ Mibuḻunḵa ḵan dida si templo ta ampailaḵa si padi ḵad maḵaḵwaḵa ḵan dida si angwaanda'tte ugali ye ampapoḻḵasan. Nu magangput, bayadam da isidada ta maḵwae puluḵan ni padi dida ta angipailae naabus inkarida. Ta igammuwon da tagu we ippun ḵatuttuwaan ni dingngoḻda'tte mipanggob ḵan siḵa yaḵon sissiyae tuttuwaom lintog Moses.

²⁵ Yaḵon da Gentil we namati ḵan dida ginangputni indagas suḻate simsimmoḵni ye nan-uunudanni ye apostol. Adida oḵyan ḵanon da midatun atta sinan-apudyus, ḵasapuḻane adida ḵanon daḻa ya da ayame adipun nidaḻaan ya adida maḵadagdagas.”

²⁶ Mabigat ḵad naḵaoy aḵ Paul atta sadi ye opate laḻaḵi woḵ midoga ḵan dida maḵaḵwa si ugali ye ampapoḻḵas si long-agda. Pun ummoyda si templo woḵ imbagan Paul si padi aḻgawe magangputan ni ampapoḻḵasan ḵad sadi ansidaan da sadi ye opate buḻunna si midatun ya ampapuluḵda.

Sa Nadoḵmaan Paul

²⁷ Anna ḵade madam-an magangput pitun aḻgaw, inggaw da Judyu we naḻpu'd Asia we nangila ḵan Paul si templo. Pun sinugsuganda da amode tagu woḵ dinoḵmaanda'ḵ Paul,

²⁸ pun ḵanandae simbobogga, “Diḵayu we ganaḵ Israel, bumadang ḵayu! Annaya tagu we ummoy nangituttudu'tta losane tagu'tta ḵinailin di ili ye sumullagi ḵan ditaḵu we Judyu, sa lintog taḵu ya sa templo. Ḵad amo ummoyna ḵinaissawan templo taḵu te inniyoyna da udume Gentil sidi.”

²⁹ Ḵatti imbagada te inniladae nibuḻun ḵan Paul aḵ Trophimus we iyEphesus si ummayanda si siyudad ḵad ḵanandapun nu inniyoy Paul si templo.

³⁰ Pun nagulu da umili woḵ sintotoddaḵdae ummoy si paway ni templo. Pun dinoḵmaanda'ḵ Paul woḵ binutbutda si lasin ni templo woḵ daguse iyyonobda lewangan.

³¹ Anna ḵade gongatonda'ḵ Paul, inggaw ummoy nangibaga si kumander da suḻdadu we iRome we nagulu da umili'd Jerusalem.

³² Daguse inayagan ni kumander da kapitan ya da suḻdadu woḵ sintotoddaḵdae ummoy si igaw da adu we tagu. Innilan ḵad ay da tagu kumander ya da suḻdadu, ingginoḵdae namiḵubiḵung ḵan Paul.

³³ Pun dinoḵmaan ni kumander aḵ Paul woḵ imbilinna'tta suḻdadu we ḵawadanda si duwae ḵawad. Naabus ḵad, ḵananae nan-imus, “Ngai annae tagu? Ngai ḵingwana?”

³⁴ Unipun amo nagulu da tagu we nandatdatong si ummamdane omoḻe ippun puutna te awad ay osa nambogga ḵad da ḵaaduwan ippun igammuda nu ngai gapun ni nadagupanda. Pun binilinna da suḻdadu ta itallayda'ḵ Paul atte ḵampuda.

³⁵ Niduumda ḵad si aḻdan, intayag da suḻdadu aḵ Paul te amod de sangan da amode tagu ḵan siya.

³⁶ Intuntun-ud da amode tagu we angibogbogga ḵanane, “Gongaton taḵu!”

Sa Nanongbatan Paul Atta Judyu

³⁷ Anna ḵade iyoyda'ḵ Paul si ḵampuda, ḵanana si kumander, “Anna ud yan ibagaḵ ḵan siḵa.” Ḵanan ni kumander we summongbat, “Igammume an-ugud atte Greek?

³⁸ Daḵampun ḵad ain aḵ siḵa iyEgypt we nangulu si gubilnu si awe? Siya nangipuyut atta opat libu we laḻaḵi ye pumappatoy atte bumbummaaw?”

³⁹ Ḵanan Paul we summongbat, “Daḵanaḵpun, saḵon ḵad Judyuwaḵ we niyanaḵ ad Tarsus si probinsiya'd Cilicia we osae nandinongoḻe siyudad. Iyunudnu ud ta an-ugudaḵ atta annae tagu.”

⁴⁰ Iyyunud ḵad ni kumander, summiḵad aḵ Paul atte aḻdan woḵ nantupapa ta guminoḵ da tagu. Gumminoḵda ḵad, insaḻadnae nan-ugud si Hinebrew atta Judyu.