Acts 12 - Sa Ugud Apudyus

Da Adu We Ampaḵaḻaman Da Namati

¹ Sa sadi ye timpu, insaḻad Ari Herod Agrippa we namaḵaḻam atta udume namati.

² Impasiwatna uḻun James we sunud John.

³ Innilana ḵade nas-om da Judyu si ḵingwana, impadoḵmana bos aḵ Peter. Sana naḵwa si Gayagayan da Judyu we ngannonda Tinapaye Naippun Yeastna.

⁴ Pun nadoḵmaan ḵad aḵ Peter, impaibaḻud Herod woḵ paguwaḻdana'tta opate grupun da suḻdadu we nasin-oppatdae ampaspasani. Sa panggobna, maabus ḵad de Gayagayan da Judyu we ngannonda Nallausan, ḵuwisona'ḵ Peter si sinagung da tagu.

Sa Napuḵayan Peter Atte Babaḻḻudan

⁵ Pun aḵ Peter inninggaw si babaḻḻudan yaḵon impapatin da namati ye nangiluwaḻu ḵan siya.

⁶ Sa sadi ye labi si daan Herod angilawaan ḵan Peter ta maḵuwis, nasusuyop atte boot da duwae guwaḻdae naḵawadan imana si duwae ḵawad ḵan naguwaḻdaan atta suḻdadu si sawang ni babaḻḻudan.

⁷ Baag-en nampaila anghel Apu woḵ nasilawan kuwartu we inggawan Peter. Pineḵpeḵ ni anghel aḵ Peter we namangon woḵ ḵanana, “Ganasom! Bumangonḵa!” Pun daguse naottag da ḵawad ni imana.

⁸ Pun ḵanan ni anghel ḵan siya, “Ansilupḵa ya ansandalḵa.” Pun tinuttuwana woḵ ḵanan os ni anghel, “Iggam taḵḵop ni silupnu ya unudom saḵon.”

⁹ Aḵ Peter ḵad, nitun-ud atte anghel we lummawa si babaḻḻudan. Ippun igammunae tuttuwa ḵingwan ni anghel yaḵon ḵananapun nu in-inop.

¹⁰ Nilausanda ḵad de ummuna ya sa ḵumagwae guwaḻda, dummatongda si baḻyange lewangane umoyon atte siyudad. Nabuḵtan lawa lewangan woḵ lummawada. Anadtaddaḻanda ḵad si osae ḵaḻsa, baag-en tinenan ni anghel.

¹¹ Pune sadi nan-imonga ḵad aḵ Peter ḵanana, “Tuttuwa pagaye imbuun Apudyus anghelna'ḵ nangiligsi ḵan saḵon ta adiyaḵ gongaton ḵan Herod ya adi mituttuwa da losane ninamnaman da Judyu we ḵoonda ḵan saḵon.”

¹² Simsimmoḵna ḵad sana, ummoy si boḻoy da Mary ye inan John Mark, we sa madagudagupan da adu we tagu we alluwaḻu.

¹³ Nanḵugḵug ḵad aḵ Peter si lewangan, sa sammilu we nangngadan aḵ Rhoda ummoy nangila.

¹⁴ Immatunana gingan Peter, gapu'tte amode layadna adinapun binuḵtan lewangan woḵ nanoddaḵe ummoy nangibagae awad aḵ Peter we sisiḵad si lewangan.

¹⁵ Ḵananda ḵan siya, “Nadong-ogḵa!” Yaḵon impatutna pagaye tuttuwa imbagana. Ḵananda, “Na anghelna nin.”

¹⁶ Yaḵon aḵ Peter pinagapagatupanae nanḵugḵug. Binuḵtanda ḵad, inniladae siya woḵ nataagda.

¹⁷ Pun sininyasan Peter dida ta giginnoḵda woḵ inug-uggudna inon Apudyus we nangilawa ḵan siya'tte babaḻḻudan. Pun ḵanana, “Ibagayu ḵan James ya da udume susunud taḵu ḵan Kristu.” Pun ḵesan woḵ ummoy atta udume lugar.

¹⁸ Bigbigat ḵad, nabanig da suḻdadu te ippun igammuda nu ngai naḵwa ḵan Peter.

¹⁹ Pun impasngit Herod atta suḻdadu'ḵ Peter. Yaḵon adidapun ḵad naḵaodas, sinumaḻyan Herod da guwaḻda woḵ imbilinnae magongatda. Nagangput ḵad, tinenana probinsiya'd Judea woḵ ummoy inninggaw ad Caesarea.

Sa Natoyan Ari Herod

²⁰ Sa inninggawan Herod sidi, amod de sangana'tta tagu we iTyre ḵan iSidon. Yaḵon ḵingwan ḵad da umili, ummoyda inawis aḵ Blastus we osa'tta mataḻgodane sammilun ni ari ta an-os-ossaandae umoy maḵauḻnus si ari te sa ilina maḻpuwan ni ḵanonda.

²¹ Dummatong ḵad aḻgawe inḵoddong Herod, nansilup si langgoyode silup di ari. Pun ummoy tummuḵdu si tronona woḵ nampalawag atta tagu.

²² Naabus ḵad nampalawag, ḵanan da tagu we nanug-uy, “Daḵampun aḵ gingan di tagu yaḵon gingan di Apudyus!”

²³ Pune sadi, daguse dinusan ni anghel Apu'ḵ Herod te adinapun pinadayawan aḵ Apudyus woḵ ḵinan da ogos long-agna woḵ natoy.

²⁴ Yaḵon napagatupan niyasaḵ Ugud Apudyus woḵ ummaduadu da namati.

²⁵ Ginangput ḵad da Barnabas ḵan Saul ḵewaaḻda'd Jerusalem, nipaulida'd Antioch. Innawitda'ḵ John Mark.