2 Corinthians 5 - Sa Ugud Apudyus

Sa Baru We Long-ag

¹ Pun igammu taḵu we taḵon ay nu matoy long-ag taḵu we isun ni boḻoy taḵu'd lutae madadail, awad de boḻoye maatod ḵan ditaḵu'd langite sa baru we long-age itton Apudyus. Daḵampun aḵ ḵingwan di tagu te ḵingwan Apudyus we mismu ya ippun patinggana.

² Ḵad sinsadi, tuttuwae umayuwong taḵu we anguuway atte mapasantan ni annae long-ag taḵu si baru we long-age maḻpu'd langit

³ ta adi taḵu isun di amboboddang nu tenan taḵu gagangaye long-ag taḵu.

⁴ Sa matattaguwan taḵu'd luta, umay-ayuwong taḵu gapu'tte ampaḵaḻaman taḵu. Daḵampun aḵ gapu ta pion taḵu tenan gagangaye long-ag taḵu we matoy yaḵon pion taḵu we mipasani baru we long-ag ta sa long-age matoy mapasantan si long-age matagu'ḵ inggana.

⁵ Aḵ Apudyus nangisagana ḵan ditaḵu si mipasaniyan ni baru we long-ag. Ḵad innatodna Ispirituna ta amanoḵnoḵ ḵan ditaḵu we ittona da losane inkarina.

⁶ Pun pasig antuḻod somsomoḵni. Ḵad igammuni ye sa sissiyae matattaguwan ni long-agni sina'd luta, adayu ḵani'tte igaw Apu.

⁷ Te sa pammatini, siya angidaḻan atte biyagni, daḵampun atta maila.

⁸ Pun antuḻod somsomoḵni ya mangnuwonni tenanni da long-agni'd luta ta inḵani maḵaigaw ḵan Apu.

⁹ Pun taḵon ay nu inggaw taḵu'd luta baḵon nu ad langit, igga taḵu ḵabooḻan taḵu we angwa'tta mas-oman Apudyus.

¹⁰ Te ḵasapuḻane losan taḵu sumangu ḵan Kristu we maḵuwis ta sa sin-ossaossa ḵan ditaḵu, awatona gungunae maatod ḵan siya sigun atte ḵingwana si natattaguwana, ambaḻu man baḵon nu lawweng.

Sa Mipaḻ-ogan Ni Maḵabuḻbuḻunan Da Tagu Ḵan Apudyus

¹¹ Pun gapu ta igammuni ye angisipog ḵan Apu, padasonni awison da tagu ta amatida ḵan siya. Yaḵon iniiggammun Apudyus diḵani ye naippun lawweng aḵ panggobni ya namnamaoḵe isuna bose iniiggammuyu diḵani.

¹² Daḵampun aḵ siya panggobni idayawni long-agni'tta annae imbagani. Yaḵon pionni ittan diḵayu'ḵ allapuwanyu we angipasindayaw ḵan diḵani ta lamogyu songbatan da tagu we angipasindayaw atta mailae ḵasasaadda ya daḵampun aḵ sa awad si ustu we ḵasomsomḵanda.

¹³ Taḵon ay nu ḵanan da tagu we natingang ḵani, sinnamaḻna te para ḵan Apudyus da ḵoonni. Yaḵon nu ḵanandae nanggodong somsomoḵni, igammuyu we para si bumaḻuwanyu.

¹⁴ Te sa ayat Kristu angituray ḵan diḵani ye angwa'tta losane ḵoonni. Te igammuni ye sa os-ossaane tagu we aḵ Kristu, natoy para'tta losane tagu ḵad mibelange naḵaḵatoy da losane tagu ḵan siya.

¹⁵ Natoy aḵ para'tta losane tagu ta da matattagu adidapun ogon ḵoon pipion ni long-agda yaḵon sa pinion Kristu we natoy woḵ natagu ḵasin para ḵan dida.

¹⁶ Pun inggana sinsadi, adinipun bigbigon ngaimane tagu we ambatay si nainlubungane ḵasomsomḵan. Taḵon ay nu ḵatti inonni ye namigbig ḵan Kristu si awe, adinipun ogon ḵoon sinsana.

¹⁷ Pun ngaimane niyossaan ḵan Kristu, nambalinon Apudyus aḵ baru we naḵwa. Naippun ogon dadaane ḵinatataguna te napasantan si baru we biyag.

¹⁸ Losan da sanae imbagaḵ maḻpu ḵan Apudyus. Aḵ Apudyus nangwa'tte mipaḻ-ogan ni maḵabuḻbuḻunan taḵu ḵan siya mipagapu ḵan Kristu. Ḵad innatodna ḵan diḵani ḵewaaḻe angipaḻ-og si maḵabuḻbuḻunan da udume tagu ḵan siya.

¹⁹ Sa pionni ibaga, mipagapu'tte ḵingwan Kristu, impaḻ-og Apudyus maḵabuḻbuḻunan da tagu ḵan siya woḵ adinapun ogon ibelang da basuḻda. Intaḻgodna ḵan diḵani mituttuduwan ni sanae damag atte angipaḻ-ogan Apudyus si maḵabuḻbuḻunan da losane tagu ḵan siya.

²⁰ Pun sinsadi, isun di aḵ Apudyus we mismu angawis ḵan diḵayu mipagapu'tte angusarana ḵan diḵani ye angituttudu ḵan diḵayu si ugudnae isunan diḵani angiyugud ḵan Kristu. Ḵad gapu ḵan Kristu, iyunudyu ḵappose mipaḻ-og maḵabuḻbuḻunanyu ḵan Apudyus.

²¹ Aḵ Kristu, ippun paat basuḻna. Yaḵon gapu ḵan ditaḵu, imbelang Apudyus aḵ ḵabasbassuḻan ta mipagapu si niyossaanan taḵu ḵan siya, aḵ Apudyus angwa si maun-unan taḵu.