1 Thessalonians 2 - Sa Ugud Apudyus

Sa Ḵewaaḻ Paul Ad Thessalonica

¹ Susunudḵu ḵan Kristu, iniiggammuyu we ummali ḵani ḵad ḵan diḵayu, daḵampun aḵ ippun anun ni gattoḵni.

² Te inigammuyu we taḵon ay nu nampaḵaḻamon ya inang-angyagda diḵani sidi'd Philippi si daanni ayan sinat ad Thessalonica, innatod Apudyus tuḻodni ye nangiwaḻagawag ḵan diḵayu si Ambaḻu we Damag we naḻpu ḵan siya taḵon ay adu da summullagi ḵan diḵani.

³ Te ippun lawweng aḵ somsomoḵni ye nangawis ḵan diḵayu baḵon nu awad siniḵapanni. Ippun os kamali'tta intuttuduni ḵan diḵayu.

⁴ Yaḵon pinanoḵnoḵan Apudyus woḵ intaḻgodna ḵan diḵani angiwaḻagawag atte Ambaḻu we Damag woḵ siya ḵingwani. Ḵad daḵampun atta tagu pappadasonni pas-oman yaḵon aḵ Apudyus we angigammu nu ngai awad atte somsomoḵni.

⁵ Iniiggammuyu we daḵampun paat aḵ nan-uḻ-uḻnug ḵani ya aḵ Apudyus anaḵdoḻe daḵampun paat aḵ an-ugud ḵani ta awad maganabni.

⁶ Ḵad daḵampun aḵ singtonni dayawe maḻpu'tta tagu, diḵayu baḵon nu da udum taḵon ay nu ḵaḻabbonganni oḵyane ḵodawonni dayaw baḵon nu da masapuḻni ḵan diḵayu te diḵani da apostol Kristu.

⁷ Yaḵon an-anggom ḵani si timpu we inninggawanni ḵan diḵayu we isun ni inae angayyuwan atta abengna.

⁸ Gapu'tte amode ayatni ḵan diḵayu, allaay ḵani ye nangibillay ḵan diḵayu. Ḵad daḵampun aḵ abus Ambaḻu we Damag we naḻpu ḵan Apudyus yaḵon midoga biyagni gapu ta patpatgonni diḵayu.

⁹ Susunudḵu ḵan Kristu, aaddi ye adiyupun naliwatan inonni ye pummangog ta adi ḵani ambalin aḵ problema ḵan diḵayu. Aḻgaw ḵan labi ye antuttudu ḵani ya anḵewaaḻ ḵani si inninggawanni sinate nangiwaḻagawag atte Ambaḻu we Damag we naḻpu ḵan Apudyus.

¹⁰ Diḵayu ya aḵ Apudyus os anaḵdoḻ atte ugalini ye ambaḻu, naun-unan ya ippun ḵadellawan ni nantataguni si inninggawanni ḵan diḵayu we namati.

¹¹ Te inigammuyu we binadanganni sin-ossaossa ḵan diḵayu we isun ni ambabadang ni ama'tta abengna.

¹² Sinoḻgagni ya pinapigsani diḵayu ḵan insassaudni ye matagu ḵayu si biyage mas-oman Apudyus ya mibagay atte namiliyana ḵan diḵayu'ḵ midoga si ampangatana ya sa ḵinangatuna.

Sa Nampaḵaḻaman Da Namati

¹³ Susunudḵu ḵan Kristu, pasig ḵani anggappiya ḵan Apudyus te dingngoḻyu ḵad ugudnae imbagani, namati ḵayu we daḵampun aḵ naḻpu'tta tagu yaḵon tuttuwae naḻpu ḵan Apudyus. Ḵad sa Ugud Apudyus, siya anḵewaaḻ atta biyagyu we namati.

¹⁴ Te diḵayu ḵad susunud, nampaḵaḻam ḵayu gapu'tta ḵailiyanyu we isun ni naḵwa'tta gimung da namati ḵan Apudyus atte probinsiya'd Judea we da niyossaan ḵan Jesu Kristu te nampaḵaḻamon os da susunuddae Judyu dida.

¹⁵ Da Judyu bos nangongat ḵan Apu Jesus ya da profeta we an-uuggudon Apudyus. Dida namaḻyaw ḵan diḵani. Ḵad siya ḵoonda da adimpun Apudyus mas-oman ya busuḻonda da losane tagu,

¹⁶ te taḵtaḵonda diḵani ye angibaga'tte Ugud Apudyus atta Gentil ta mataguda oḵyan. Sa ḵoondae sanat, dog-adog-anda da basuḻda ḵad dumatong ḵan dida sindumallu we sangan Apudyus.

Sa Amisitaan Paul Atta Namati'd Thessalonica

¹⁷ Yaḵon sa sin-aḵitane nisinaanni ḵan diḵayu susunudḵu ḵan Kristu, amod de ayuni ya pasigni sosomḵon diḵayu. Pun pinadasni ḵabooḻanni ye mipauli ta an-asiila taḵu ḵasin.

¹⁸ Pionni pagay ilan diḵayu. Pun nangampigae pinadasḵu umali yaḵon tinupod Satan umaliyanni sinat.

¹⁹ Pionni pagay umali te antaḻgod ḵani ye ipapatiyu we amati. Ḵad gapu si sadi, maganasan ḵani si mipanggob ḵan diḵayu. Ḵad nu umali ḵasin aḵ Apu taḵu we Jesu Kristu, antaḻgod ḵani ye misangu ḵan siya te diḵayu da ambaḻu we nambanagan ni ḵewaaḻni.

²⁰ Ḵad tuttuwae diḵayu da gapun ni midayawanni ya gapun ni allaylaydanni.