1 Corinthians 9 - Sa Ugud Apudyus

Sa Ḵaḻabbongan Paul Ḵan Biyangna

¹ Saḵon ḵad, daḵampun ḵamman aḵ nawayaaḵ? Daḵampun ḵamman aḵ osaaḵ atta apostol Jesu Kristu? Daḵampun ḵamman aḵ innilaḵe mismu'ḵ Jesus we Apu taḵu? Daḵampun ḵamman os aḵ diḵayu da bungan ni ḵewaaḻḵu ḵan Apu?

² Ḵad taḵon ay nu adimpun da udum saḵon ibelang aḵ apostol, ibelangyu oḵyan saḵon te diḵayu amanoḵnoḵ si ḵinaapostolḵu te amati ḵayu ḵan Apu.

³ Annaya songbatḵu'tta nanumaḻya ḵan saḵon.

⁴ Ippun ḵamman ḵaḻabbonganni ye mapaḵanan ḵan mapainuman gapu'tte annae ḵewaaḻni?

⁵ Ḵad ippun ḵamman ḵaḻabbonganni ye angitaggaḵad atta asawani'tta ngaimane ambabbaatanni ye isun da udume apostol ya da susunud ḵan Kristu ya aḵ Peter?

⁶ Diḵani ḵamman ḵan Barnabas abus aḵ ḵasapuḻane anḵewaaḻe ippun ḵaḻabbonganni ye maittan aḵ iḵataguni?

⁷ Awad ḵamman suḻdadu'ḵ siya asi amayad atte gastuna si ḵinasuḻdaduna? Awad ḵamman ammuḻa'ḵ adina simsiman bungan ni immuḻana? Baḵon nu awad ḵamman antangḵon aḵ adina simsiman gatas da tangḵonana?

⁸ Ḵad daḵampun aḵ imbagaḵ da sadi ye mibatay atte ḵaḻabbongan ni tagu yaḵon imbagaḵ te siya ḵanan ni lintog Moses.

⁹ Te sa ḵanan ni lintoge inggilin Moses, “Adiyu patingaḻan sungad ni baḵae an-iliḵonyu ta lamognae angan nu piona.” Ḵad abus ḵad ain baḵa'ḵ simsimmoḵ Apudyus we ugudon atte sadi ye imbagana?

¹⁰ Daḵampun! Te ditaḵu we tagu we anserbi ḵan siya pionae ugudon. Ilanyu ḵad, taḵon ay da andaḻnoḵ ḵan an-ani, namnamaonda oḵyane awad de billayda'tte bungan ni ḵinewaaḻda.

¹¹ Isuna bos diḵani ye nangimuḻa'tte naispirituwane Ugud Apudyus ḵan diḵayu, ḵasapuḻane maḵabillay ḵani'tta apityu ta awad iḵataguni.

¹² Pun nu awad ḵaḻabbongan da udume ampabadang ḵan diḵayu, amo sindumallu ḵan diḵani? Yaḵon taḵon ay nu awad ḵaḻabbonganni ye ampabadang ḵan diḵayu, adinipun ipatut te inan-anusanni taḵon ay ngai ampaḵaḻamanni ta ippun matupodan ni Ambaḻu we Damag si mipanggob ḵan Kristu.

¹³ Adiyupun ḵamman igammu we da anserserbi si templo maḻpu ḵanonda si templo ya da anserserbi si altar maḵabillayda'tte datun?

¹⁴ Isuna bos bilin Apu we ḵanana, da angiwaḻagawag atte Ambaḻu we Damag ippun udum aḵ maḻpuwan ni iḵataguda nu adi abus ḵewaaḻda.

¹⁵ Yaḵon taḵon ay nu ḵatti, adiḵpun inusar sadi ye ḵaḻabbongaḵ ya adiḵpun igili anna ta angitod ḵayu'ḵ iḵataguḵ. Te nabaḻbaḻu matoyaḵ nu sa maḵaan ḵaḻabbongaḵe angiwaḻagawage siya isḵaḻḵu.

¹⁶ Te nu iwaḻagawagḵu Ambaḻu we Damag ippun ḵaḻabbongaḵe angiyisḵaḻ. Te naitod ḵan saḵon biyang, pun ḵasapuḻane iwaḻagawagḵu. Ḵad ḵaddaguwaḵ nu adiḵ iwaḻagawag Ambaḻu we Damag.

¹⁷ Te nu saḵon namili si annae ḵewaaḻḵu, awad de ḵaḻabbongaḵe matangdanan. Yaḵon gapu ta intaḻgod Apudyus ḵan saḵon, ḵooḵ da piona paḵwa taḵon ay nu ippun tangdanḵu.

¹⁸ Pun nu ḵatti, ngai gungunaḵ nu? Annayae abus: Naippun udum nu adi sa layadḵu we angiwaḻagawag si Ambaḻu we Damag we ippun tangdanḵu taḵon ay awad de ḵaḻabbongaḵe pataḻ-un ḵan dida.

¹⁹ Te taḵon ay nu nawayaaḵe daḵanaḵpun aḵ musassu'tta ngaimane tagu, ambalinoḵ long-agḵu'ḵ musassu'tta losane tagu ta lamogḵu awison da adu we tagu ta amatida ḵan Jesu Kristu.

²⁰ Ḵad nu antuttuduwaḵ atta Judyu, unudoḵ losane ugalida ta adu da maawisḵu ḵan didae amati ḵan Jesu Kristu. Isuna bos atta angunud atte lintog. Te unudoḵ da losane ḵoonda taḵon ay nu adiḵpun unudon lintog ta lamogḵu awison da angunud atte lintog.

²¹ Isun ni antuttuduwaḵ atta Gentil we adidapun unudon lintog da Judyu, ambalinaḵ aḵ dogada ta adu da maawisḵu ḵan dida. Yaḵon daḵampun aḵ ḵanaḵe adiḵ tuttuwaon Lintog Apudyus te sissiyae unudoḵ da lintog Kristu.

²² Isuna bos nu antuttuduwaḵ atta anḵuya, ambalinaḵ aḵ dogada ta pumigsa pammatida. Pun ngaimane kalasin di tagu, ambalinaḵ aḵ dogada ya ḵooḵ da ngaiman ta mataguwan da udum ḵan dida.

²³ Ḵooḵ losan da sana gapu'tte Ambaḻu we Damag ḵad maḵabillayaḵ atta bindisyune itton Apudyus ḵan dida.

²⁴ Ipaniḵ namatiyan taḵu'tte todtoddaḵ. Igammu taḵu we nu awad todtoddaḵ, padason da losane maḵatodtoddaḵe angngog yaḵon ossaan magungunaan. Pun isuna ḵan ditaḵu we namati, igga taḵu ḵabooḻan taḵu ta maaḻa taḵu gungunae itton Apudyus.

²⁵ Da ngaimane maḵaaḵ-abaḵ, ḵasapuḻane disiplinaonda da long-agda ta maaḻada gungunae allasu we madadail. Yaḵon ditaḵu we namati, sa gungunae annanayun maaḻa taḵu.

²⁶ Pun ḵan saḵon, siya unudoḵ ḵingwan da naḵatodtoddaḵe nanaḵpusda'tte pagpag ni totoddaḵane naippun nataḵtaḵanda. Isuḵ os buksinero we ibabattugna santuḵna ta adi miḵawas.

²⁷ Disiplinaoḵ long-agḵu ta adiḵ unudon da lawwenge piona ta magangput ḵade iwaḻagawagḵu'tta udum, adiyaḵpun maḵaan.