1 Corinthians 3 - Sa Ugud Apudyus

Sa Nainlubungane Somsomoḵ

¹ Yaḵon susunudḵu ḵan Kristu, adiyaḵpun antuttudu ḵan diḵayu we isun da naangsan pammatidae iturayan ni Ispiritu Santu yaḵon antuttuduwaḵ atta tagu'tte lubunge isun da utting atte pammati ḵan Kristu.

² Pun intuttuduḵ ḵan diḵayu mipani'tte gatase mipainum si utting te adiḵayupun maḵaawat si naadaḻome mituttudu we mipani'tte anḵosdoḻe maḵan. Ḵad taḵon ay sinsana, sissiyae adiḵayupun maḵaawat

³ te somsomoḵ da tagu si annae lubung da somsomoḵyu. Nu sissiyae awad de apos ya susubog ḵan diḵayu, daḵampun ḵamman aḵ siya angipailae unudonyu da pipion da long-agyu ya da ugalin da tagu si annae lubung?

⁴ Te nu awad angibaga ḵanane, “Aḵ Paul unudoḵ” ḵad ḵanan os ni osa, “Aḵ Apollos unudoḵ,” daḵampun ḵamman si ugalin da tagu we adipun namati unudonyu?

Da Sammilun Apudyus

⁵ Ngai ḵad ain aḵ Apollos? Ngai'ḵ Paul? Sammilu ḵani ḵan Apudyus ḵad mipagapu ḵan diḵani namati ḵayu. Awad osa ḵan diḵani ḵoona nipabiyang ḵan siyae innatod Apu ḵan diḵani.

⁶ Sa mipaniyana, isun di saḵon nangimuḻa si buḵoḻ ya aḵ Apollos nansilug yaḵon aḵ Apudyus namadaḵoḻ.

⁷ Pun sa nangimuḻa ḵan nansilug, naippun patogda. Siya ampatog aḵ Apudyus we amadaḵoḻ si muḻa.

⁸ Naippun nantoḵonan ni angimuḻa ya sa ansilug te an-isu panggobda. Ḵad sa umali ye aḻgaw, gungunaan Apudyus dida sigun atta ḵingwada.

⁹ Te diḵani ḵan Apollos an-asibadang ḵani ye angwa'tta paḵwan Apudyus. Ḵad diḵayu isun di payawe ḵewaaḻonni. Ipaniḵ os diḵayu si boḻoye taḵadon Apudyus.

¹⁰ Gapu si ḵinabaḻun Apudyus we impailana ḵan saḵon, isuḵ nalainge antaḵad aḵ boḻoy, ummaḵ ginagaaman nangisaadaḵ ḵad da udume tagu asi amagatup si sadi ye insaḻadḵu. Yaḵon awad osa ḵasapuḻane laḻamana inonae antaḵad.

¹¹ Te ippun udum aḵ nisaad nu adi abus aḵ Jesu Kristu.

¹² Awad da udume usaronda buḻawan, palata baḵon nu da ampapatoge batu. Yaḵon awad da udume siya usaronda ḵayu, potaw baḵon nu dagami.

¹³ Ḵad sa aḻgawe anguwisan Apu atta losane tagu, mipaila ustu we ḵinapatog da ḵingwan ni sin-ossaossa te mapadas si apuy.

¹⁴ Ḵad nu adipun masgob da ḵingwan ni osa'tta nantaḵad, magungunaan.

¹⁵ Yaḵon nu masgob da ḵingwan ni tagu, ippun awatona'ḵ gunguna taḵon ay nu matagu we mismu isuna tagu we lamogna iligsi long-agna'tte masgobe boḻoy.

¹⁶ Adiyupun ḵamman igammu we diḵayu templo we boḻoy Apudyus gapu'tte Ispiritunae iinggaw ḵan diḵayu?

¹⁷ Pun ngaimane tagu we anadail atte templo, dadailon os Apudyus. Te sa sadi ye templo ḵuwan Apudyus ḵad diḵayu we mismu templo.

¹⁸ Ilanyu ta adiyu allelawon da long-agyu. Nu awad ḵananae nalaing si sanae timpu we nibatay atte ḵinalaing da adipun amati, ambalin oḵyan aḵ dong-og ta ambalin aḵ tuttuwae nalaing.

¹⁹ Te sa nainlubungane ḵinalaing, dinodong-og ḵan Apudyus. Te awad de nigili ye Ugud Apudyus we ḵanana, “Sa usaron Apudyus aḵ angngogana'tta aginlalainge tagu, sa mismu we ḵinasiḵapda.”

²⁰ Ḵad nigili bose ḵanana, “Igammun Apu we naippun patog ni somsomoḵ da nalalainge tagu.”

²¹ Pun ippun oḵyan osa'ḵ isḵaḻna ḵaḻabbongan di tagu te ḵuwayu da losane awad ḵan diḵayu.

²² Imbuunna saḵon ya da Apollos ḵan Peter we anserbi ḵan diḵayu. Ḵad innatodna ḵan diḵayu da losane awad si annae lubung, da mabiyaganyu, matoyanyu, taḵon ay sinsadi ya sa umali ye aḻgaw ḵuwayu dida.

²³ Diḵayu ḵad, ḵuwan Kristu diḵayu ya aḵ Kristu ḵad, ḵuwan Apudyus.