1 Corinthians 2 - Sa Ugud Apudyus

Sa Mipanggob Atte Natoyan Kristu

¹ Susunudḵu ḵan Kristu, sa ummaliyaḵ ḵan diḵayu sinate nangiwaḻagawag atte impaigammun Apudyus, adiḵpun inusar naadaḻome ugud ya ḵinalaing di tagu.

² Te simsimmoḵḵu we sa inninggawaḵ ḵan diḵayu, naippun udum aḵ intuttuduḵ yaḵon abus mipanggob ḵan Jesu Kristu ya sa nipattoḻana'tte kros.

³ Sa inninggawaḵ ḵan diḵayu, anḵuya long-agḵu ya amilpilpilaḵ atte ḵimutḵu.

⁴ Ḵad sa nantuttuduwaḵ ḵan nangiwaḻagawagaḵ ḵan diḵayu, adiḵpun inusar maḵaawise ugud ta mipaila ḵinalaing di tagu yaḵon mipaila ḵabooḻan ni Ispiritu Santu.

⁵ Ta sa pammatiyu adipun mibatay atte ḵinalaing di tagu yaḵon sa ḵabooḻan Apudyus.

Sa Ḵinalainge Naḻpu Ḵan Apudyus

⁶ Yaḵon awad de ḵinalainge ituttuduni'tta naangsan si pammati, daḵampun aḵ naḻpu'tte ḵinalaing da tagu si sanae timpu ya ḵinalaing da pangat si sanae timpu we amungtu ḵabooḻanda.

⁷ Te sa nilimode ḵinalaing Apudyus we ibagabagani, siya simsimmoḵna si daan ni lubung maḵwaan ta midoga taḵu si ḵabaḻuwane antatagu ḵan Apudyus ad langit.

⁸ Naippun naḵaawat atta pangat si sanae timpu. Te nu naawatanda oḵyan, adidapun impaipattoḻ ḵangatuwane Apu atte kros.

⁹ Yaḵon sa ḵanan ni nigili ye Ugud Apudyus, “Sa adimpun da tagu innila ya adidapun dingngoḻ baḵon nu adidapun simsimmoḵ, sadi insaganan Apudyus para'tta angayat ḵan siya.”

¹⁰ Sana impaigammun Apudyus ḵan ditaḵu mipagapu'tte Ispirituna. Te sa Ispiritu Santu igammuna da losane banag taḵon ay da naadaḻome somsomoḵ Apudyus.

¹¹ Te naippun angigammu'tte awad si somsomoḵ ni tagu nu adi siyae mismu. Isuna ḵan Apudyus, naippun angigammu'tte somsomoḵna nu adi abus Ispirituna.

¹² Sinsadi ditaḵu we namati, daḵampun aḵ sa ispiritun da tagu we adipun namati inawat taḵu yaḵon sa Ispiritu we naḻpu ḵan Apudyus ta maawatan taḵu mipanggob atta losane innatod Apudyus ḵan ditaḵu gapu si ḵinabaḻuna.

¹³ Pun sa angituttuduwanni daḵampun aḵ somsomoḵ baḵon nu ḵinalaing di tagu naḻpuwana yaḵon sa intuttudun ni Ispiritu Santu ḵan diḵani. Ḵad ipaḵaawatni da naispirituwane ḵatuttuwaan atta tagunae inggawan ni Ispirituna.

¹⁴ Yaḵon sa tagu we naippun Ispiritu Santu ḵan siya, adinapun awaton da ngaimane atode maḻpu'tte Ispiritu Santu te dinodong-og ḵan siya. Ḵad adinapun maawatan dida te abus da tagu we iinggawan ni Ispiritu Santu aḵ maḵaawat.

¹⁵ Ḵad ngaimane iinggawan ni Ispiritu Santu, lamogna maawatan da ḵinapatog da losan. Yaḵon da udume tagu adidapun maawatan.

¹⁶ Te sa ḵanan ni nigili ye Ugud Apudyus, “Awad ḵamman angigammu si ḵasomsomḵan Apu ta bagbagaana?” Yaḵon anna somsomoḵ Kristu ḵan ditaḵu.