Zakadiia 1 - O Mikanda Ikola

O kudiela

¹ Bhu mbeji ia kanake, ku muvu ua kaiadi ua sobha Ndala, kizuelu kia Jihova kieza kua plofeta Zakadiia, monʼa Balakiia, monʼa Idu, kuila:

² O Jihova ua luuala kinéne ni jitata jenu!

³ Kala kiki, u a tangela kuila: Jihova dia Ilombo uambe kiki: Eme Jihova dia Ilombo Ieta, uedi: Vutukilenu kokuami, nda eme ue ngi mi vutukile enu, kiene kia tange Jihova dia Uombo Ieta.

⁴ Ki mu kale kala o jitata jenu, a a bokelele jinge kuala o jipolofeta ja diangelè-ku kuila: Jihova dia Ilombo, uambe kiki: Dielenu kindala mukonda dia ikalakalu ienu ia bolo ni jinjila jenu ja iibha; maji-phe, ene a di tunine o kuívua, mba ngó ku ngi bhana mátui, kiene kia tange Jihova.

⁵ O kiki-phe, jitata jenu iá kuebhi? O jipolofeta ue o kuila muenhu uâ u kolelà-ku ki ubhu dingi?

⁶ Né kienhókio, mbebhu o Maka mami ni itumu iami i nga tumikisa jinga eme ku abhikʼami, o jipolofeta, o jitata jenu ki ia a bhixila? Ene iá a vutula, exi: Kioso Jihova dia Ilombo kia xinganeka ku tu bhanga, kala kia tokala mu jinjila jetu, ni kia fuama o ibhangelu ietu, kiene muene kia tu bhange kiá.

Kisukila kia dianga: O jikabalu

⁷ Mu kizuua kia makuinhi aiadi ni i uana, bhu mbeji ia kakuinhi ni umoxi, ku muvu ua kaiadi ua sobha Ndala, kizuelu kia Jihova kieza kua polofeta Zakadiia, monʼa Balakiia, monʼa Idu, kuila:

⁸ Mu usuku nga tale, eme nga mono diiala ua sambela ku kabalu ka kusuka, anga uia ni kuimajana mu tu isasa tuala mua zongo. O kuema diê kuala tubalu tu kusuka ni tua zeluluka ni tua zele.

⁹ Eme anga ngi zuela, ngixi: Ngana iami tata, o iá akuahiʼá? O anju ua kexi mu kuzuela ni eme anga u ngʼambela, uixi: Eme nga-nda ku ku londekeza se iá akuahi.

¹⁰ Bheneʼobho, o diiala ua kexi mu kaxi ka tu isasa u vutula, uixi: O iá ene Jihova ene mu ku tuma phala a nhunge mu ngongo.

¹¹ Ene anga a vutuila anju ia Jihova uala mu kaxi ka tu isasa, exi: Etu tua nhungu kiá mu ngongo, o ixi ioso-phe tua i mono iala ni kutululuka ni kunhoha.

¹² Bheneʼobho, o anju ia Jihova u vutula, uixi: Eie Jihova dia Ifuẋi, tata, katé bhebhi uà kamba ku kuatela henda ia Jeluzaleme ni jimbonge ja Juda, ji ua lungulukila ni kuthathamana Eie ua ji luualela mu makuinhi sambuadi a mivu osoʼâ?

¹³ Anju ia kexi mu zuela ni eme, Jihova anga u mu vutuila maka a mbote, maka a tululuisa muẋima.

¹⁴ O anju ia kexi mu kuzuela ni eme anga u ngambela, uixi: Tá nzongo kuila: Jihova dia Ilombo uambe kiki: Ni muanu ua vulu, ngene mu ku langa Jeluzaleme ni Ziione.

¹⁵ Maji ni njinda ia vulu-phe, nga thathamena miji iene mu ku di dielela ienʼiê, kuma kioso eme ki nga thathamena Izalaiele bhuofèle ngó, ene a suina dingi mu kubhanga kiaiibha.

¹⁶ Kala kiki, Jihova uambe, uixi: Jeluzaleme nga mu lungulukila dingi ni jihenda; o inzu iami a kà i tunga dingi muenhomo, o kuthandu dia Jeluzaleme à ka zeleka-ku kamukolo, kiene kia tange Jihova dia Ilombo Ieta.

¹⁷ Tá dingi nzôngo lua mukuá, uixi: Jihova dia Ilombo Ieta uambe kiki: O jimbonge jami hanji ja-nda kua kà di bandekeza, ja-nda kua kà zediua muene; kuma Jihova hanji a-nda kua kà konda dilamba kua Ziione, hanji a-nda kua kà sola Jeluzaleme.

Kisukila kia Kaiadi. O jimbinga jiuana ni asudi-a-thumba kiuana

¹⁸ Anga ngi zambula mesuʼami. O ki nga tale, nga mono jimbinga jiuana.

¹⁹ Anga ngambela anju ua kexi mu kuzuela nʼeme, ngixi: O kiki, kima kiahi? Muene u ngambela, uixi: Jiji jene o jimbinga ja muanganesa Juda ni Izalaiele ni Jeluzaleme.

²⁰ O Jihova anga u ngi londekeza asudi-a-thumba kiuana.

²¹ Bheneʼobho-phe, eme ngixi: O iá eza mu ku bhangaʼhi? Muene anga uzuela, uixi: Jiji jene o jimbinga ja muanganesa Juda, katé ki bhuala dingi muthu ua tena kubhetula o mútue uê; o asudi-a-thumba iá-phe, ia eza phala ku ji bula-bula ni kulundumuna o jimbinga joso ja akua jixi, jʼoleka mu ku lungulukila oxi ia Juda phala kumuanganesa oso a tungumu.