Nzuá 7 - O Mikanda Ikola

Jiphange ja Jezú ki ji mu xikana

¹ Kia bhiti imʼiíi, Jezú u nhunga mu Ngalileia, kʼ andala kunhunga mu Judeia, mukonda dia Jijudé momo, kubhindamena o ku mu jibha.

² O fesa ia Jijudé, iexana Fesa ia Jifundu, anga i zukama.

³ Jiphange jê anga ji mu ambela, exi: Kunu tunda-ku, uie ku Judeia, phala jixibulu jé ji mone ikalakalu i uene kubhanga.

⁴ Mbata muthu kene kubhanga imbamba mu ku suama, se uandala athu a mu ijiia. Eie se u bhanga imbamba iíi, tukuluka ku mundu, mbé ene oso a ku ijiie.

⁵ (Mukonda katé ni jipnge jê uê jene, ka mu xikana.)

⁶ Jezú anga ua ambela, uixi: Kumbi diami kiluua di bhixila. Maji o kumbi dienu-phe ki di bhinga dingi ku di kinga. Mukonda enu kumbi dioso-dioso, dienu.

⁷ Mundu ki u tena ku mi zemba enu, maji ua ngi zembe eme, mukonda ngi mbangi, ngixi ikalakalu iâ iaiibha.

⁸ Bandenu enu ku fesa; Eme kindalʼ iki, ki ngi íi-ku, mukonda kumbi diami kiluua di bhixila.

⁹ Jezú kia zubha ku zuela imʼiíi, ua xala hanji mu Ngalileia.

Jezú u longa mu fesa. Athu a mu kuatela jiphata

¹⁰ Kia zubha-phe jiphange jê kubanda ku fesa, muène ue u banda, kana ni kutukuluka, suke ni kusuama.

¹¹ Makota ma Jijudé anga a kala ku mu sota mu fesa, exi: Muène iú kuebhi?

¹² Mu kifuẋi anga mu kala kufueta kuavulu mukonda diê. Amoxi exi: Muene muthu uambote; amukuá exi: Kana, muène ua-lu tondalesa o mundu.

¹³ Kana muthu-phe ua mu tumbula ni kubhuma, mukonda dia uôma ua adiakime a Jijudé.

¹⁴ Ku bhixila mu kaxi ka fesa-phe, Jezú u banda mu Tembulu, hé u kala mù longa.

¹⁵ Jijudé anga ji tukumuka, exi: Iú uejiia kiebhi kiosuʼiki o Madivulu, ua kambe ku di longa na-u?

¹⁶ Jezú u a vutuila, uixi: Ima ioso i nga mu longa, ki iami eme; maji ia tundu kua Nzambi ió ua ngi tumu.

¹⁷ Se muthu u sola kubhanga vondadi ia Nzambi, ió ua-ndu kuijiia ulongelu u nga mu longa, mba ua tundu kua Nzambi, mba nga zuela ngó ima iami ememuène.

¹⁸ Uoso u di zuela ue muène, ió ua mu sota ku di fumanesa muène. Maji uoso-phe u sota kufumanesa ió ua mu tumu, muenhó mukua kidi, ku muẋima ue ki kuala makutu.

¹⁹ Abha ki Mozé ua mi bhana o Kitumu? Kana muthu-phe mudienu ua mu tumaka o Kitumu. Enu-phe, mua-lu sotela-hi ku ngi jibha?

²⁰ Kuala o kifuẋi, exi: Eie uala ni dimonho! Nanhi muène ua-lu sota ku ku jibha?

²¹ Jezú ua a vutuila, uixi: Eme nga bhange ngó kisuma kimoxi, enu mua di uana.

²² Enu kamona mu ka saia mu kizuua kia Sábhalu, muixi: Mozé muene ua tumina o kusaia. (Sumbala o kusaia ki kua tundu kua Mozé, maji ku jitata jʼokulu ja mu diangelele muène.)

²³ Se muthu u tambula o kusaia mu kizuua kia Sábhalu, mukonda dia uôma ua kutondala o Kitumu kia Mozé, phala-hi mua ngi kuatela njinda, mukonda Eme nga bhana muthu ku di sanza mu kizuua kia Sábhalu?

²⁴ Kana kubatula jinga maka kala ki mua fika, inda mu batula mu kidi.

Jezú, muène Kristu?

²⁵ Amoxi-moxi ku akua Jeluzaleme anga amba exi: Abha ki munhú alu mu sota phala ku mu jibha?

²⁶ Talesenu! Muène iú zuela muene sé ngó uôma, maji ene-phe kala ku muila ngó kima! Manhi o kuila makota a mu xikana uâ kuma muène Kristu?

²⁷ Kristu-phe, kianda kuiza, kana muthu u ijiia kuoso kua tundu. Maji o ialʼú etu tua mu ijiia kuoso kua tundu.

²⁸ Bhenhobho Jezú, kioso kiala kulonga mu Tembulu, u di kola, uixi: O kuila enu mua ngʼijiia muene kiambote, muejiia ku nga tundu? Ki eme-phe nga di katula, sai ua ngi tumu mukua kidi, enu ki mu mu ijiia.

²⁹ Eme-phe nga mu ijiia, mukonda nga tundu kua muène, muène ua ngi tumu.

³⁰ Ene anga a sota ku mu kuata, maji kana muthu ua mu te lúkuaku, mukonda kumbi diê kiluua di bhixila.

³¹ Mu kifuẋi-phe sai-mu avulu a mu xikana, exi: Kristu kia-nda kuiza, manhi u kala kota mu kubhanga madiuanu, o iú ndenge?

Masoladi a a tuma kukuika Jezú

³² Jifalizeu jevu athu mu kifuẋi ala mu ku di fuetela imʼiíi; makota ma jinganga ni jifalizeu, anga a tuma-ku masoladi ku mu kuika.

³³ Jezú anga u zuela, uixi: Ngala hanji ni enu kathangana kòfele; ki ka bhita, ngiia kua ió ua ngi tumu.

³⁴ Enu mua-ndu ngi sota, maji ki mua-ndu ngi sanga, mukonda kuoso ku ngiia, enu ki mu tena kuizaku.

³⁵ Jijudé anga ji di ambela mudiâ, exi: Kuebhi kuene ku aia, kua bhingi tu lémbua ku mu sanga? O kuila ua-nda kuia kua ió a di muange mu Jingèleku? Inga ua ka longa Jingèleku?

³⁶ Mba muène uambe kiebhi, uixi: Enu muandu ngi sota, maji ki mua-ndu ngi mona; mukonda kuoso ku ngiia, enu ki mu tena kuiza-ku.

Jezú muène otho ia menha ma muenhu. O Nzumbi Ikôla

³⁷ Kizuua kia kuzumbuka, o kizuua dia dikota kia fesa, kizuua kienhókio Jezú uemana, anga u di kola, uixi: Se muthu uala ni dinhota, eze ko-kuami, nda anue.

³⁸ Uoso u ngi xikana eme, kala ki ambe o madivulu ma Kôla, Jingiji ja menha ma muenhu ja kà mu tunda mu thulu iê.

³⁹ Mu kuzuela kiki, Jezú ua kexi mú tanga o Nzumbi, a-ndu mu tambula kuala oso a mu xikana. Mbata ene o Nzumbi ka mu tambuile luua, mukonda Jezú kiluua a tambula o ungana.

O alangi

⁴⁰ Athu amukuá mu kifuẋi, ki evu makʼ ama, exi: Muenhó polofeta, kidi kiene!

⁴¹ Amukuá exi: Muene Kristu! Kuala iá, exi: Kífua Kristu u tunda mu Ngalileia?

⁴² Mu Madivulu ma Kôla ki mualu kuamba kuma Kristu u tunda ku muiji ua Davidi, ni bhu sanzala ia Beleme, bhua tungile Davidi?

⁴³ Bhenhobho kifuẋi kia uanunuka mukonda dia Jezú.

⁴⁴ Amoxi-mu eji ku mu kuata, maji kana muthu ua mu te maku.

O makota ma Jinganga ka mu xikana

⁴⁵ O masoladi anga ma vutuka ku makota ma jinganga ni jifalizeu. Ene anga a ebhudisa, exi: Mua kambela-hi kuiza-nê?

⁴⁶ Masoladi exi: Kiluua kukala muthu u zuela kala ió.

⁴⁷ Jifalizeu anga ji kumbulula masoladi, exi: O kuila enu uenu ua mi longesa kiá?

⁴⁸ Manhi, mua mono kuila mu makota ni mu jifalizeu, sai-mu muthu ua mu xikana?

⁴⁹ Kifuẋiʼ iki-phe, kia kambe kuijiia o Kitumu, a ki bhubhidila!

⁵⁰ Nikodemu, ió uejile kua Jezú mu usuku iú bhobho, kuma ua tokala-nâ, uixi:

⁵¹ Manhi Kitumu kietu ki êlesa muthu, sé kudianga ku mu ívua, ni kuijiia kioso kia bhange?

⁵² Ene a mu vutuila, exi: Eie ue, u mukua Ngalileia? Tongolola kiambote mu Mikanda Ikôla, u mone kuma mu Ngalileia ki muene kutunda polofeta. [

⁵³ Anga aia kala muthu ku bhata diê; Jezú-phe uia ku mulundu ua Midiva.