Ngalásia 6 - O Mikanda Ikola

O kudikuatekesa mudienu

¹ Enu jiphange jami, né-mbe bhu kala muthu u di jimba, nʼ a mu kuate mu kituxi, enu muala mu nzumbi, muthu ió mu mu kuatekesa phala ku mu bheka dingi bhu kididi. Maji mu ki bhanga-phe ni muẋima uabatama. Muila ue ni ku di langa enuʼenu, phala enu ue ka mi diangule.

² Mu enda ni ku di ahujula o imbamba mudienu; o mu kubhanga kiki, kiene ki mu kumbidila o Kitumu kia Kristu.

³ Kuma se o muthu ua di fika kukula, manhi muene ki kima, muene ua dinganala.

⁴ Kala muthu a lole o uendelu uê, mbé o kia ta nzabala, i kale ia kibhangelu kiê-muene, sé kubhindamena kudifikisa mu uendelu ua athu engi.

⁵ Kuma muthu ua bhingi uambata o kimbamba kiê, muthu uambata o kimbamba kiê.

⁶ Uoso ala ku mu longa o maka ma Njimbu Iambote ia Kristu, a bindumune ue mesene iê uoso ua mu mu longa, ni ima ioso iambote.

⁷ Kana ku di nganala, Nzambi kene ku mu tobhesa. Kuma muthu kioso kia kuua, kiene kiandù bhongolola.

⁸ Uoso u kuuila ima inda o xitu, ku xitu iê uandù bhongolola kalunga. Maji uoso u kunina ku ima iandala o Nzumbi ia Nzambi, ku Nzumbi uandù bhongolola muenhu ki uabhua.

⁹ Ki tu kadienu ni usudi mu kubhanga kiambote. Kuma hinu ki tu bhixila bhu thembu ia tokala, tua kà bhongolola, se tua kambe kubhuila.

¹⁰ Uila kiki, bhuoso bhu tu muena o kithangana, tu bhangienu mbote athu oso, kota-kota-phe a tokala mu dianda dia kuxikana.

O maumenekenu ni mitendelelu ia suku-ku

¹¹ Talesenu o mukanda uakulu kiki o jiletala u nga mi sonekena ni llukuaku luami eme-muene!

¹² Oso andala o ku dʼidikiza ni ku di ximana (ku di ta nzabala), mu xitu, ene a mu mi bhinjika ni ku mi saia. A ki bhangela-phe ngó o kuiengesa ku a zukutisa, mukonda dia dikulusu dia Kristu.

¹³ Mukonda katé-phe ni ene a tambula o kifua kia kusaia, a lémbua ku aiuka o Kitumu. Maji andala-phe a mi bhitisa o kifua kia kusaia, phala ene a di te thathe kuila ene a tesa o kidimbuʼ iki ku mikutu ienu.

¹⁴ Eme-phe kuta thathe nga ki tokoka, kikale ngi di thathela ngó o dikulusu dia Ngana ietu Jezú Kristu. Kuma o dikulusu dia Kristu diene dia fuisa mundu iú phala eme, diene ue dia ngi fuisa eme phala o mundu iú.

¹⁵ Kuma mua Kristu Jezú, ki u kala a ku saie, ki u kala ka ku saie, kiene kioso ki kia kate-ku kima; kia kate-ku o ku mi bhangulula athu obhe.

¹⁶ Oso kijila kiki, kiene o kijila kiâ kiala kuenda na-kiu, ku kale paze, ni henda ku thandu diâ, ni ku thandu dia mundu uoso ua Nzambi!

¹⁷ Kala kiki, ku pholo ku tuia, ki bhu kale dingi muthu u ngi tela ima i ngi tatesa. Kuma o itote i ngʼ ambata ku mukutu uami, iene idimbu ia mu kuidikisa kuila ngi selevende iangene ia Jezú.

¹⁸ O kiadi kia Ngana ietu Jezú Kristu, ki kale jinge ni enu oso, jiphange. Amén.