Ngalásia 5 - O Mikanda Ikola

O kuimana mu ufolo ua Kristu

¹ Jezú Kristu ua tu jituna, phala tu kale mu kidi tu jifôlo. Uila kiki, Emanenu-phe mu ufolo uenʼ iú, kana kusukamena dingi mu ophe ia ubhika.

² Talesenu! Eme, Phaulu, nga mi ambela kuma, se mua toloka phala ku mi saia, Kristu-phe ka mi bhandulula ni kima.

³ Kiene muene, ngi ki tanga lua kaiadi kuila: O muthu uoso ua tambulula o kusaia, nga mu bhana umbangi kuma ua di bidikala kukumbidila o Kitumu kioso.

⁴ Mua batuka kua Kristu, enu oso mua mu mesena kuila mu lungila mú kualuka o Kitumu. Ku kiadi kia Nzambi mua tokoka-ku.

⁵ Kuma etu, tuala ni kudielela kuila hadia Nzambi ua kà tu xikina. Mukonda kienʼ iki kiene ki tua kinga mu kutena kua Nzumbi ia Nzambi, ió u tena o kukalakela mu kuxikana kuetu.

⁶ Kuma kioso ki tu kala mu umoxi ni Kristu Jezú, ki u kala a ku saie, ki u kala ka ku saie, kiene kioso ki kia kate kima; kia kate-ku o kuxikana ku kalakala ni henda.

⁷ Enu mua kexi mù kuenda kiambote! Nanhi ua mi fudisa, phala o kidi mu kambe ku di tuma na-kiu?

⁸ Muthu muenʼ ió ua mi tolola kiebhi? Kuma o ku di tuma ku mua kuatʼ oko, ki kua Nzambi ió ua mʼ ixana, kana!

⁹ Kala kiene mù tanga, exi; Kakithuthume kofele ka ketesa o dikende dioso.

¹⁰ Maji eme-phe hanji nga mi dielela mua Ngana. Kuma o kuongama kuetu mua Ngana, kua ngi dielelesa kuila, ki nga mu xinganeka emʼiki, enu uenu ki muandù kala dingi ni ilunji iengi. Maji nga ki dielela ue kuila, ió uoso ua mi tatesa, a kuliê, a toliê, hadia Nzambi ua kà mu bhana kaxtiku kê.

¹¹ O ki kala, jiphange, se eme hanji ngene kulongesa o kusaia, kima kiahi-phe kia a bhekela o ku ngi zukutisa? Se kia kexile kia kidi, o dilebhu dia dikulusu di ngene mù kola hinu diabhu-ku.

¹² Eme ngʼ inda kuila enʼ ió ala ku mi vunza a di nongona ene mu lumoxi ʼté ku hádia!

¹³ Kuma enu, jiphange, a mʼ ixanena kukala mu jifôlo. Maji o ku ofôlo uenu ki mu katule-ku maditatu ma kuehela o jihanji ja xitu ku mi tumina, maji muenda ni ku di bhikila mudienu ni henda.

¹⁴ Kuma o Kitumu kiene kioso kia tenena mu kizuelu kimoxʼ iki, exi: Mukuenu u mu zola kala ki ua di zola eie-muene.

¹⁵ Maji se mu kala uila mu iama, ni ku di ta mazu, ni ku di hamena mudienu, di langienu-phe, kuma muanda kudiua enu oso, hé mu jima o mbutu, se mu kamba kukuata kilunji.

O imbamba ia xitu, ni ibundu ia Nzumbi

¹⁶ Ki ngambe-phe, kiki: Ehelenu o Nzumbi ia Nzambi ku endesa o mienhu ienu, ki mu kale mu kutumaka dingi o jihanji ja xitu.

¹⁷ Mbata o xitu i kuata hanji ia iibhila o Nzumbi, o Nzumbi i kuata o hanji ia iibhila o xitu; kuma kiiadʼiki kia di zemba; phala enu mu lémbue kubhanga o ima i mua mesena.

¹⁸ Maji se a mi endesa kuala o Nzumbi ia Nzambi, ki muala dingi mu ubhika ua Kitumu.

¹⁹ Imbamba ioio i bhanga o xitu ki i jimbi, ienʼii: Undumbu, ufusa, uhabhu.

²⁰ Ubhezelu ua iteka, uanga, athu a di kuatela unguma, a di dia milonga, a di bhanga kusuina, a di temena, a di kuata jimvunda, akua difuba, akua luimbi. A di zemba, a di muangununa ku madianda-madianda, ni ku ibuka-ibuka.

²¹ Akua dixinga, ijibhanganga, jihôlua, o muenhu uâ ua ku di ta ngó mu izomba iaiibha, ni ima iamukuá ia di fu kiki. Ienʼ iii, nga mi dimuna, kala ki nga tuamene ku mi dimuna, kuma oso akua kubhanga ima kala iii, kà tena kubhingana mu Utuminu ua Nzambi.

²² Maji o ibundu iima o Nzumbi-phe, henda, ngalasa, kutululuka, kuxididika, kulenduka, kubhanga mbote, kukala fiiele,

²³ kubelesela, ni ku di tumina jihanji. O ima kala iii, kana-ku kitumu kia ku i kidika.

²⁴ Oso-phe a tokala Kristu Jezú, o xitu a i fuisa kiá ku dikulusu, ni jingânji jê, ni jihanji ja uhabhu.

²⁵ Muenhu uetu se ua tundu kua Nzumbi, tu endienu-phe kiá ni Nzumbi.

²⁶ Ki tu kale ni izala, ki tu di thathamese mudietu, ki tu di kuatele dixinga.