Nehemiia 10 - O Mikanda Ikola

¹ Oso a jikile o kikutu ni kidimbu enhá: Nehemiia, dia nguvulu, monʼa Hakaliia, ni Zedekiia,

² Selaia, Azadiia, Jelemiia,

³ Paxule, Amadiia, Malkiia,

⁴ Hatu, Sebaniia, Maluke,

⁵ Hadime, Melemote, Obadiia,

⁶ Daniiele, Jinetone, Mbaluke,

⁷ Mesulame, Abiia, Miamine,

⁸ Mahasiia, Bilingai, Semaia; iá ene a kexile o jinganga.

⁹ Akua Leví: Jessua, monʼa Azaniia, Binui, ku anʼa Henadade, Kadimiiele;

¹⁰ ni jiphange jê; Sebaniia, Hodiia, Kelita, Pelaia, Hanane,

¹¹ Mika, Lehobe, Hasabiia,

¹² Zakule, Selebiia, Sebaniia,—

¹³ Hodiia, Baní, Beninu.

¹⁴ O atumini a kifuxi: Palehuji, Pahate-Mouabhe, Elame, Zatu, Baní

¹⁵ Buni, Ajingade, Bebai,

¹⁶ Adoniia, Bikivai, Adine,

¹⁷ Atele, Hixikiia, Azule,

¹⁸ Hodiia, Hasume, Besai,

¹⁹ Hadife, Anatote, Nebai,

²⁰ Mangepiia, Mezulame, Hezide,

²¹ Mezezabiiele, Zadoke, Jaduua,

²² Pelatiia, Hanane, Anaia,

²³ Hozeia, Hananiia, Hasube,

²⁴ Holohe, Pilha, Sobeke,

²⁵ Lehume, Hasabena, Mahaseia;

²⁶ ni Ahiia, Hanane, Anane,

²⁷ Maluke, Hadime, Bahana.

²⁸ Ni kifuxi kia xala-ku, ni jinganga, ni akua Leví, ni alangidi a mielu, ni jingimba, ni ateki a menha ni aẋangi a jihuinhi, ni oso kiá a di sanduile ku ifuẋi ia akua jixi mu kutumaka o kitumu kia Nzambi, ni akajʼâ, ni anʼâ a mala, ni anʼâ ahatu, ni jinjimu joso a kexe ni kuijiia iá a tongoloka a kexe ni kilunji,

²⁹ o a beta o uthu mudiʼâ, a di bande ue ku jiphange jâ ni kujiza kuoso, anga a diẋikina mu kubela ku mázui ni ku mulôko, kuila endela mu kitumu kia Nzambi, kia bhele mu ukunji ua Mozé, ngunza ia Nzambi; ni kuila a kuata anga a tumaka o ijila ioso ia Jihova Nzambi ietu, ni mabatuilu mê ni jingonge jê.

³⁰ Tua di bhela ue kizuelu, tuixi: Ki tu sakanesa anʼetu a ahatu ni malʼakua ixi ioio, né kusakanesa o anʼâ ahatu ni anʼetu a mala;

³¹ ni kuila, akua ixi ki a bheka uenji uoso-uoso mu kizuua kia sabhalu, mba mu izuua ia kizokola, ni jimbundu joso-joso ja kusumbisa, etu ki tu sumbu-nâ kima mu sabhalu, mba mu kizuua kiòkole; ni mavu, etu a kudima, mu muvu ua kasambuadi tua nhohesa, ki tu bhingi-mu ku tu futa dikongo dioso-dioso.

³² Tua di xikina etu tua di xindi ue kala kijila, kuila muthu ni muthu u futa mbandu ia katatu ia xikulu ku muvu, phala o kikalakalu kia tokala ku ukunji ua inzo ia Jihova, Nzambi ietu;

³³ mbé kusumba o jimbolo ja munôno, ni mubhaku ua musa kizuua ni kizuua, ni sata ia kuoha kizuua ni kizuua, ni sata ia jisabhalu, ni ia jimbeje ja thethama, ni ia izuua iangene, ni ima iòlumbile, ni ia jisata ja kiluuluilu kia ituxi, ni ja kuluulula Izalaiele ioso, ni kubhangesa kikalakalu kioso mʼonzo ia Nzambi ietu.

³⁴ Tua te ue jisorte muʼaxaxi ka jinganga, akua Leví, ni mu kifuẋi, phala kuijiia oso a bhana o jihuinhi ja kubheka mʼonzo ia Nzambi ietu, ku jinzo ja jitata jetu, mu ithangana i a xindi, ku muvu ni muvu, ia kuohela ku kalatódio ka Jihova, Nzambi ietu, kala ki a ki soneka mu kitumu.

³⁵ Ni kuila ue tu bheka mʼonzo ia Jihova o idima ia dianga ia mábhia metu ni ibundu ioso ia dianga ia miẋi ioso, ku muvu ni muvu;

³⁶ ni jithungunu jetu ja mala, ni ja ibhaku ietu, tu bhanga kala ki a ki soneka mu kitumu; ni kuila o ʼthungunu jetu, ni ja ʼmbudi jetu, tu ji bheka mʼonzo ia Nzambi ietu, ku jinganga, ene mu bhanga o ukunji mʼonzo ia Nzambi ietu.

³⁷ Ni kuila ue o dikènde dietu dia kutomona, ni maujitu metu ma kubhuka, ni kibundu kia muxi uoso, ni vinhu ni maji, tuiza na-iu ku jinganga, mu maxilu ma inzo ia Nzambi ietu; ni kakuinhi ka mábhia metu ku akua Leví: ni kuila o mbandu ia kakuinhi ka idima itunda ku mábhia, tu i bhana kua akua Leví, kuma ene a a lekelela kutambula o kakuinhi ka tunda mu jisanzala jetu joso.

³⁸ Ni kuila ue, o nganga, monʼa Alá, u kala kumoxi ni akua Leví kioso akua Leví kia kala mu tambula o kakuinhi, ni kioso akua Leví kia bhana ue o kakuinhi ka kakuinhi ka tambula ue ene, hé a ka bheka mʼonzo ia Nzambi ietu, mu maxilu ma inzo ia kubhakela o jimbongo ja Nzambi.

³⁹ Mukonda anʼa Izalaiele ni anʼa Leví a tokala a bheka o maujitu ma kubhuka ma jimbundu ni ma vinhu ni ma maji, mu maxilu ió; mbata muene muala o itutu ia kididi kikôla, muene muala ue o jinganga ja kuata o ukunji, ni alangidi a mielu, ni jingimba; kífua mu kubhanga kienhiki, o inzo ia Nzambi ietu ki tu a-nda ku i ehelela.