Ndongixi 2 - O Mikanda Ikola

¹ Hé ngʼambela o muẋima uami, ngixi: Izá ngi ku teze hanji ni kusanguluka; kala kiki, kemba, sanguluka! Maji mu ku kʼila ue suí, nga ki mono kuma ukumbu ngó.

² Katé ni kuolela nga ku mono kutekuka; o ngalasa iene i ngi bhandululʼahi?

³ Nga kenga mu muẋima uami kioso ki ngi di-ta mu kúnua vinhu, (maji ni kutumina o muẋima uami ni kilunji), ni kiki kioso ki ngi di-bhakula ku ulaji katé ki ngi mona kioso kia fuama anʼathu kubhanga kulu-dia-mundu, mu kithangana kioso kia izuua iâ ia butuʼiii ia muenhu uâ.

⁴ Anga ngi di iudikila ima ia matunda! Nga di-tungila jinzo; nga didimina mábhia a mivide.

⁵ Nga didimina jindombe ni mabakala a itulu; mixi i bhana o ibundu, kana-bhu ua kambe-mu mu mábhia eneʼá.

⁶ Nga bhange ue ni izanga ia menha, mbé kutekela na-iu o ditutu dia mixi ia mu kula.

⁷ Nga sumbu abhika a mala ni abhika a ahetu; nga kexile ue ni abhika a a vualela kiá ku bhata diami; nga vuile ue ndumba dia jingombe ni jimbudi, ene oso a ngi diangelele mu Jeluzaleme ndenge.

⁸ O phalata ni ulu anga ngi i bhaka ku maxita-maxita, ni makembu oso a jisobha ni ma akua jixi; nga dʼizalesa ue ni jingimba ni mala ni ahatu, ni ima ioso ia uabhela anʼathu kulu-dia-mundu; ndumba ia mala ni ahatu, ni ima ioso kiá ia kuxikila o mimbu ue.

⁹ Anga o ku kula kuami ku vula kinéne, hé ngi tûnda, ngi kala muene kotʼélele ene oso a ngi diangelele mu Jeluzaleme a kala ndenge. Hanji-phe, mu ima iosuʼiii, o kilunji kiami kikié.

¹⁰ Iene ioso iandalele o mesuʼami, ki nga a fudisa na-iu; o muẋima uami ki ngi u bhangesa kufula kusanguluka kuoso-kuoso; maji inda muẋima uami ua sanguluka jinga mu ikalakalu iami ioso, mukonda diene o dikânda diami, mu ikalakalu iami ioso i nga bhange kuludia-mundu kunu.

¹¹ Anga ngi bhetuka o mesu mu kutala ima ioso ia kalakala o maku mami, ni kikalakalu kioso ue ki nga bhange kia tundu mu kukalakala kuami, o ki nga iede sui, mu nga bhiti ni dibhuilu diê, nga i mono kuila ioso ku mundu mbé ukumbu ngó ni ʼlamba dia muẋima, kuma ioso bhoxiʼabha ki iala ni kubhanduluka kua kima.

¹² Anga ngi lungulukila ue o kutongolola ki kala o kuijiia, ni ulaji, ni uôua; kuma o muthu uoso hádia u kaiela kua sobha, ua kà bhanga kima kiahi? Ua kà bhangʼé muene ioso kiá ia bhanga jinga akuá.

¹³ Bhenhobho nga mono kuila o kuijiia kua beta muene kota mu ku ta o uôua ndenge, mukuâ ni muanha ki u kala kota mu ku uabha o usuku ndenge.

¹⁴ O njimu mesuʼê a mu kala mu mútue, o kiôua-phe uendela mua vundu; sumbala a di tungula maji nga tetuluka kuila o ima i bhita kua iú iene ue i bhitʼê kua ió.

¹⁵ Anga ngi kiʼamba mu muẋima uami, ngixi: Kioso ki bhita na-kiu o kiôua, kiene ue kiʼanda kua kà bhita nʼeme; abha-phe eme nga sotelaʼhi ngó kuijiia kuosuʼku? Anga ngi kiʼamba muene mu muẋima uami ngixi, o kiki ue manhi ukumbu ngoho.

¹⁶ Mbata ki tu fike kuila o njimu a kà beta o ku mu lembalala, o kiôua ni ki kale ndenge; kuma ku izuua ia hádia, o ima ioso ka kà i lembalala dingi, kuila bhua bhiti kiá tu izuua. Ene oso a kà fua kiò-muene, kutale o njimu uejiia, uixi o kiôua kejiia kima.

¹⁷ Anga o muenhu iú u ngi iibhila, mukonda o ikalakalu ioso ku mundu i bheka ngó malamba! Kidi muene. Ioso muene kulu-diamundu kingoho ni ʼlamba dia muẋima!

¹⁸ Anga o ikalakalu iami ioso i nga bhange kulu-dia-mundu i ngi iibhila mukonda dia uxilu u nga-nda ku i xila o muthu uoso hádia ua-nda ku ngi bhingana.

¹⁹ Kuma nanhi ua kʼijiia se u kala njimu mba u kala kiôua kia hatu? Maji-phe o muenhú muene-muène ua kà i lundula, ia kà kituka iê-muène, o ima ioso i nga kalakala ni unjimu uoso kulu-dia-mundu; kiki ue kingoho muene.

²⁰ Kienhiki kia ngi bhekesa kuambela o muẋima uami, ngixi: Jimba-ku! Kana kudielela ku ikalakalu ioso i nga bhange kulu-dia-mundu. Anga ngi suína muene kubhangesa kuila o muẋima uami ki u kale ni kudielela kua kima kulu-diamundu.

²¹ Kuma sai muthu o kikalakalu kiê u ki bhanga ni unjimu uoso ni kuijiia kuoso ni uhete ua maku a sakalala, maji, o mungu, u ki xilé ngó muthu uengi ka kalakala-ku; ki kituka dikânda diê-muène kiá. Kidi muene. Kiki ue ukumbu ngoho ni nzungule ia dibhuilu!

²² Mbata kima kiahi kiene, muthu kia kala na-kiu dingi ku kikalakalu kiê, kioso kia bhanga kulu dia mundu kunu, ni ku di-buila-buila ngó o muẋima mu ima ioso ia mu kuenda ni kubhanga leluʼidi?

²³ Kuma o izuua iê ioso ia jindolo ngó, o ibhangelu iê ia malamba muene; katé ni mu usuku o muẋima ua muthu ki u nhoha. Èlé! kiki ue ukumbu ngoho!

²⁴ Manhi ki kima kiambote muene o muthu kúdia ni kúnua, o muenhu uê ni u kembe mu mbote ia kikalakalu kiê? O kienhiki ue nga ki mono kuila ki tunda ku lukuaku lua Nzambi.

²⁵ Mbata se ki luene, nanhi u ngi tunda, hé u ngi somboka eme mu kúdia ni kúnua ni kukemba?

²⁶ Kuma o muthu ua iuka, Nzambi u mu bhana o unjimu ni kuijiia, hé u mu tela-ku o kusanguluka; maji o mukua ituxi-phe, Nzambi u mu bhana kukalakala mbé a bhongolole, a lunjijiké ima ia-nda kubhana kua ió a muindi kuala Jihova. Maji kienhiki ue ukumbu ngoho ni ʼlamba dia muẋima.