Ndongixi 1 - O Mikanda Ikola

Ima ioso ku Mundu kingoho ni ukumbu ngó

¹ Maka a tele Ndongixi (Mulongixi), monʼa sobha ia Jeluzaleme, uambe uixi:

² Kingoho mu kingoho! Mulongixi, uixi: Kingoho mu kingoho! Ioso muene ukumbu ngoho!

³ O muthu u bhanduluka-ku ihi ku kikalakalu kiê kioso kia mu bhanga ni hadi kulu dia mundʼuku?

⁴ Ku tunda muiji, kuiza muiji; maji o ixi ia kalé, kiene ki iene kiene.

⁵ O dikumbi di tunda, di tula, o ku dia tundila kiá kuene ku di vutukilé dingi, bhu kididi kiê bhu diene mu tundila.

⁶ O kitembu kiia ku Sulu, hé ki kondolokela ku Suku; anga kienda ni kunhungʼé kienhiki, o mu kia bhitile kiá muene mu ki bhitʼé dingi ni kunhingumuka mu kunhunga kuê kuene na-ku.

⁷ O jingiji joso jiia ní ku kungulukila mu kalunga, maji-phe o kalunga kene kuizala. O kuoso kuene mu kiia o jingiji joso ni ku kunguluka, kuene ku jene mu kuia kiá, kuene ku ji kuata o kuié dingi.

⁸ Ima ioso ienhiʼii i bhuidisa kinéne, kana muthu-phe u tena ku i jimbulula. O mesu ka zumbuka mu kumona, o mátui ue kʼezala ni kuívua.

⁹ O kima kia kexile-ku kiá, hádia kiene kia kà kalèku dingi; O kiókio kia bhangele kiá, ku hádia a kà ki bhanga dingi lua mukuá; kia bhangesa kuila kulu-dia-mundu kana-ku kima kieza lelu.

¹⁰ Kuala kima kiela exi: Tala, kima kiki kia ubhe? Kia kexile-ku kiá ku mivu ia bhiti, kuila etu kiluua ngó tu kala-ku.

¹¹ Kuma o ima ia bhiti kiá athu kene ku i lembalala dingi; o ima ia kèza-ku ue, ka kà i lambalala dingi ku athu a kèza-ku, kuila o iene ia bhiti kiá.

Kioso imʼiii ki ia tongolokela o Ndongixi

¹² Eme, ngi Ndongixi, nga kexi ngi sobha ia Izalaiele, mu Jeluzaleme.

¹³ Ngixi-phe, o muẋima uami ngi u ta hanji ku unjimu, phala ngi tongolole, ngi solokote kiambote ni kuijiia kuoso, o ima ioso iene ku bhita kulu-dia-mundu. O ki nga iʼdi suí: Ngixi ikalakalu ioso iii o Nzambi ua i bhana anʼahu phala ngó ku a longela-mu.

¹⁴ Nga tonginina ku ikalakalu ioso iene kubhanga athu kulu-dia-mundu, nga i mono kuila ioso muene kingoho ni lamba dia muẋima.

¹⁵ O kia bhengalala, kia bhengalala kiá muene, kene ku ki iukisa dingi; o kiókio kia kambe-bhu, kene ku ki zonga.

¹⁶ Anga ngi zuela mu muẋima uami, ngixi: Eme nga di bhange munéne; o mu kuijiia ue nga a tundu ene oso a ngi diangelele mu Jeluzaleme, kidi-phe muene. Muẋima uami uezala kiavulu ni unjimu ni kuijiia kua di-xala.

¹⁷ Anga ngiia, ngixi: O muẋima uami ngi u te hanji mu kutongolola o unjimu ni kuijiia kiambote o Ulaji ni Uôua; o ki nga iedi sui, nga tetuluka, ngixi: Mbé iene iosuʼiii ue dilamba ngó ku muenhu.

¹⁸ Mbata o mu kuvula o kuijiia, muala ue kubhuila kua nzugule; kuma o ió u vula o kuijiia, u vula ue ni ia kubhanga, o dilamba ue di mu vudila dingi.