Mukumbi ua Mikumbi 3 - O Mikanda Ikola

¹ Mu usuku, bhu hama iami bhu nga zeka, kazola ka muenhu uami nga mu sota; nga mu sota muene, maji ki ngi mu mono.

² Nga balumuka-phe, anga ngi kuata kunhunga mu mbonge; ni mu nzunga ni bhu itanda, nga kuata kusota ió uoso a mu zola kuala o muenhu uami; nga mu sota muene, maji ki ngi mu mono.

³ Kienhokio alangidi a kexi mu langa mbonge, a ngi sange; eme hé nga ebhula, ngixi; O ió a mu zola kuala o muenhu uami, enu mua mu mono?

⁴ O ki nga a xi ngó bhuòfele, kazola ka muenhu uami nga mu sange. Nga mu naminina, ki ngi mu ehela dingi, katé ki nga mu bokuesa mʼonzo ia mamʼetu, ndú mu xilu da ió ua ngi vuala.

Diiala

⁵ Nga mi lokela muene, enu mu anʼa ilumba mu Jeluzaleme, ni ku jingulungu ni ku jimbambi ja kitumba, kuila, jihenda jami kana ku mu tonesa mba mu mu fundumuna, katé kioso muene kia mesena.

Kukaiela

⁶ Kiki kima kiahʼiki, ki tundila mu kikangalakata kala mufundangala ua dixi, diezala ni uasu ua dizumba, ni ua sumuna ni ua libana ni fufuta ioso i bhana dizumba dia mbote iene mu funa o jingenji?

⁷ Kiki kiene o kixakata kia Solomá; mu jimbandu jê muala makuinhi a samanu a mazonda, mazonda ma Izalaiele,

⁸ ene oso a bhakata jixibhata, jimbâmba ja kúlua mu ita; edi muthu ni xibhata iê mu mbunda, muthu ni xibhata iê mu mbunda, mukonda dia ima i kuatesa uoma mu usuku.

⁹ Sobha Solomá ua di iudikila kixakata kia mixi ía muxitu ua Libanu.

¹⁰ Ua ki iudikila mikambu ia phalata; o tudilu dia inama iê dia ulu; o dixikamenu diê dia thanga i kusuka; o moxi diê a kembesa-mu ni kubolodala-mu ni henda kuala anʼa ilumba mu Jeluzaleme.

¹¹ Tundenu, enu mu anʼa ilumba mu Ziione, mu tale Sobha Solomá ni kitundu kia mu tula ku mútue kuala mamʼâ, mu kizuua kia bhenga o dibhànga diê, mu kizuua kia kusanguluka kua muẋima uê.