Matesu 26 - O Mikanda Ikola

Jinganga ni Adiakime a sota ndunge ia kukuata Jezú, ni ku mu jibha

¹ Kia zubha Jezú ku longa maka mosoʼama, u ambela jixibulu jê, uixi:

² Enu mua kʼijiia kuila kua kambe ngó izuua iiadi, kuanda kuiza Fesa ia Phasu, o Monʼa Muthu-phe a-nda ku mu thelekala phala ku mu phaphela ku dikulusu.

³ Kienhókio jinganga ja makota, ni adiakimi ku mundu, a bhongoloka ku lumbu lua Nganga ia dikota, a mu ixana Kaiafa;

⁴ anga a kala mu di longesa kioso kia kuata Jezú mu ndunge, phala ku mu jibha.

⁵ Exi-phe: Mu thembu ia fesa kana; imoxi ki bheka mvunda ku mundu.

Jezú a mu ta maji kuala Muhatu mu Betaniia

⁶ Kiki Jezú kia kala mu Betaniia, mʼonzo ia Ximá, mukua dibhute,

⁷ kuiza muhatu uambata thenda ia alabasa ia maji ma dizumba, ma te itadi iavulu. Anga u ma lundulula ku mútue ua Jezú, kioso kia xikama ku meza mu kúdia.

⁸ Jixibulu-phe, kia ki mono, a longolola muhatu, exi: O kutexi kuosʼuku, mukonda diahi?

⁹ Hinu ua ma sumbisa mu itadi iavulu, ni a i bhane ku jingadiama!

¹⁰ Jezú-phe kuma ua kʼijiia, ua ambela, uixi: Muhatu mu mu tateselahi? Muène ua ngi bhange kima kiambote.

¹¹ Mukonda jingadiama mua xalela na-ju; eme-phe ki ngi xalela, kana!

¹² Muène kia ngi lunduluila majiʼama ku mukutu, ua ki bhangela o ku ngi iudika phala ku ngi funda.

¹³ Kidi kiene ngi mi ambela: Kuosokuoso kua kà tula Njimbu iíi Iambote mu ngongo ioso, ni kiki kia ngi bhange o muhatu iú a kà ki tanga phala dilembalelu diê.

Jezú a mu ta uenji kuala Juda

¹⁴ Kienhókio umoxi ku kuinhi ni kiiadi, a mu ixana Juda, mukua Kadiota, uia ku jinganga ja makota,

¹⁵ uixi: Mu ngi bhana-hi se Jezú ngi mi thelekalanê? Ene anga a mu pezalela makuinhi atatu a itadi ia phalata, hé a mu bhana.

¹⁶ Tunde bhobho, Juda muène u kala mu sota o kithangana kiambote kia ku mu thelekala.

O Seialu ia Ngana ni Jixibulu jê

¹⁷ Mu kizuua kia dianga kia Fesa ia Jimbolo ji Kamba Kithûthume, jixibulu jiza kua Jezú, exi: Tu ku iudikila kuebhi, Ngana, ku ua mesena kudila o Phasu?

¹⁸ Kuala muène: Ndenu mu mbonge, kua nganji, mua kà mu ambele, muixi: Mesene uixi kiki: Thembu iami ia ngi bhiẋilu. O Phasu ngi i bhitisila mʼonzo ié ni jixibulu jami.

¹⁹ Jixibulu anga ji bhanga kala ki a tumu Jezú; anga a iudika o Phasu.

²⁰ Kutula mu ngoloxi, muène u xikama ku meza ni kuinhi dia xibulu ni kiiadi phala kúdia.

²¹ O kia kala mu kúdia, Jezú, uixi: Kidi kiene ngi mi ambela, mudienu sai-mu muthu ua-nda ku ngi thelekala.

²² Ene anga a kenanana kiavulu! A kuata ku mu ambela ene oso: O kuila eme, Ngana?

²³ Kuala muène: Uoso ngala kumama-nê mbolo bhu dilonga, muène uanda ku ngi thelekala.

²⁴ Monʼa Muthu iú uia mu kúfua, kala kia mu soneka mu Mikanda Ikôla. Muthu ió-phe kokolo diê, ua-nda kuthelekala Monʼa Muthu! Kimuua, muenhó se ka mu vualele!

²⁵ Muène Juda, u mu thelekala, uixi: O kuila eme, Mesene? Jezú ua mu ambela, uixi: Eie-muène ua ki tange.

O seialu ia Ngana

²⁶ O kia kala mù kúdia, Jezú u katula mbolo, u sakidila Nzambi, hé u i bukujula, anga u i uanena jixibulu, uixi: Amenu, mu die. Uene o mukutu uami.

²⁷ Anga u katula kopho, u sakidila Nzambi, anga u a bhana, uixi: Nuenuku enuenu oso.

²⁸ Kuma iá ene o manhinga mami, ma di zunza mukonda dia mundu phala kuloloka o ituxi. Mene o manhinga ma kuatesa o Kikutu Kióbhe bhu kaxi ka athu ni Nzambi.

²⁹ Ngi mi ambela-phe: Tunde kiki, ku sumu ia muvide ki ngà ka nua-ku dingi, katé ki nga kà i nua ia ubhe, ni enu kiá kumoxi, ku mbanza ia Tata iami.

³⁰ Kia zubha kuimba muimbu, a tunda, anga aia ku mulundu ua Midiva.

Phetele a mu dimuna

³¹ Jezú anga u ambela, uixi: Usuku uenhú, enu oso muanda kulenga hé mu ngi xa, kuma mua-nda kujuuala mukonda diami. Mbata a soneka, mu Mikanda ia Ngana, exi: O mubidi ngi mu jibha, jimbudi ja kilunga ji di muanga.

³² Maji ki nga kà fukunuka-phe, nga kà mi tuamenena ku Ngalileia.

³³ Phetele anga u kumbulula, uixi: Né-mbé ene oso a juuala mukonda dié, hé a ku-xa, eme ki ngi ku xisa, lémbua!

³⁴ Kuala Jezú: Kidi kiene ngi ku ambela, kuma usuku uenhú, kioso o dikolombolo kiluua di kokola, eie uanda ku ngi di tuna luatu kuila ku ngʼijiia.

³⁵ Kuala Phetele: Né-mbé kia bhingi tu fuetu ngó, eme ki ngi ku di tunu kuila ki nga kuijiia. Jixibulu joso ue kiene ki ambe.

Jezú mu Ngetesemane

³⁶ Jezú anga uiza mu kadibhia, a kexana Ngetesemane, anga u ambela jixibulu jê, uixi: Xikamenu bhabha, eme ngiie bhaná ku pholo mu kusamba.

³⁷ Anga u ambata-nê Phetele, ni ana kiiadi a Zebedeu. Muène anga u kala mu kenanana, ua tate kiavulu.

³⁸ Anga ua ambela ene, uixi: Muẋima ua ngi kala kiavulu ni malamba, bhulu-bhulu dia kùfua. Xalenu bhabha, mu ngi langidise.

³⁹ Anga u sondoloka-bhu kòfele, u fukama, u ta pholo bhoxi, hé u samba, uixi: Tata iami, se ki xikina, dikáu dienhidi dia phaxi iíi, ngi katule-diu. Maji-phe ki ngi sola eme, kana, inda ki u sola eie.

⁴⁰ Anga uiza ku jixibulu, u sanga aii ku kilu; anga u ambela Phetele, uixi: Kífua ni ku ngi langidisa ola imoxi, ku tena?

⁴¹ Langidilenu, mu sambe, phala ki mu di bhale mu mubhetu ua Nguma. Nzumbi ia xikina kidi o kùlua ni jitendasá, maji o xitu-phe ia bhuila.

⁴² Anga lua kaiadi dingi uia, u samba, uixi: Tata iami, se kia bhingi kuila dikáu dia phaxi didi ki di tena ku ngi somboka, katé ki ngi di nua, kioso ki ua solo Eie ki bhite.

⁴³ Anga uiza dingi, u sanga áii ku kilu, mukonda mesu mâ ma neme ni kilu.

⁴⁴ Anga ua xa dingi, uia u samba lua katatu, o mambu ene amoxi.

⁴⁵ Anga uiza ku jixibulu, u ambela, uixi: Enu hanji mua zeka? Muàii muene ku kilu? Talenu, ola ieza kiá, Monʼa Muthu ia a mu thelekala kiá bhu maku ma akua ituxi.

⁴⁶ Fundumukenu, tuienu-tu, kuma muène ua ngi thelekala, iú uizʼú kiá.

Jezú mu kuika

⁴⁷ Kioso Jezú kiala hanji mu zuela, talesa, Juda, umoxi ku kuinhi ni kiiadi u tula. Muene ueza ni mundu uavulu kumoxi, ambata jixibhata ni jimbangala, a a tumu kuala o jinganga ja makota ni adiakimi.

⁴⁸ Muène ua mu thelekala-phe ua a bhele kijimbuete, uixi: Uoso ngi mu bhana nzóbole, muenhó; mu kutienu!

⁴⁹ Juda bhenhobho anga u bhiẋila kua Jezú, uixi: Mesene, nga ku menekena! Anga u mu bhana nzobole.

⁵⁰ Jezú-phe u mu ambela, uixi: Kamba bhanga kioso kia ku bheka! Ene anga a bhiẋila, Jezú a mu kuata, hé a mu kuta.

⁵¹ Muthu umoxi-phe, kua iá ala ni Jezú, u zangula lúkuaku, u fomona xibhata iê, hé u i vunda ku mubhika ua nganga ia dikota, anga u mu batula dítui.

⁵² Jezú anga u mu ambela, uixi: Fomeka dingi o xibhata ié mu kizu. Kuma oso a katula xibhata, a kà fua ku xibhata.

⁵³ Inga mua fika ki ngi tena kubhinga Tata iami, muène nʼa ngi bhana kindala kienhiki kuinhi dia ibuka ni ʼiadi ia ji-anju?

⁵⁴ Maka mòsoneke mu Madivulu-phe ma Ngana, meji kubhita kiebhi, mambe kuma kia bhingi kubhita kienhiki?

⁵⁵ Kithanganʼokio Jezú anga u ambela o mundu eza mu ku mu kuta, uixi: Kífua enu mua tundu ni jixibhata ni jimbangala mu ku ngi kuata, kala ngi kifumbe? Nga xikamene izuua ioso mu Tembulu ni kulonga, maji ki mua ngi kuata.

⁵⁶ Kiene kiosuʼiki-phe kia bhiti, phala kubhitisa o Maka mòsoneke mu Madivulu ma misèsedi. Bhenhobho jixibulu joso ji mu-xa, ji lenga.

Jezú a mu bheka bhu Kionge

⁵⁷ Iá a kuata Jezú, anga aia-nê ku inzo ia Kaiafa, nganga ia dikota, kua bhongoloka o jimesene ja kulonga o Kitumu, ni adiakimi a Jijudé.

⁵⁸ Phetele-phe u mu kaiela dikanga ku dima, katé ku lumbu lua nganga ia dikota, anga u bokona, hé u xikama bhuamoxi ni akua mbèle, phala kutalesa kioso kianda kubhita.

⁵⁹ Kiki jinganga ja makota, ni ene oso kiá bhu kionge, a sota umbangi ua makutu ua kuêlesa Jezú ni a mu jibhe,

⁶⁰ maji a u lémbua, sumbala jimbangi ja makutu jeza-ku javulu. Anga kuiza kiua kiiadi,

⁶¹ exi: Ialʼú ua tangele, uixi: Tembulu ia Nzambi nga soko-bho ku i bula, ni ngi i tunge mu izuua itatu.

⁶² Nganga ia dikota anga u imana, u ambela Jezú uixi: Eie ku fundu? O kia ku tatela enhá, kiedi kiebhi?

⁶³ Jezú-phe ua di xibhê. Nganga ia dikota anga u mu ambela, uixi: Nga ku lokesa mu dijina dia Nzambi ia muenhu, tu tangele mba eie u Kristu, Monʼa Nzambi.

⁶⁴ Jezú u mu ambela uixi: Eiemuène ua ki tange, kiene muene. Ngi mi ambela dingi-phe: Hinu mua kà mona Monʼa Muthu ua xikama ku madilu ma Nzambi ua Tena-ioso, iú tuluka mu kuiza ku matuta ma diulu!

⁶⁵ Nganga ia dikota anga u tandujula izuatu iê, uixi: Muène ua ẋonguena Nzambi! Umbangi uahi dingi ngó u tua bhindamena? Talesenu, dixongo diê enuʼenu mua dʼivu bhenhabha!

⁶⁶ Enu-phe mua fika kiebhi? Ene a vutula, exi: Muène ua tokala kúfua!

⁶⁷ Anga a mu ṗhamena mathe mu pholo, a mu bhana jihome. Amoxi a mu bhana jihuxi, exi:

⁶⁸ Zambula, eie u Kristu: Mukua-hi ua ku beta?

Phetele u di tuna Ngana

⁶⁹ Phetele-phe hanji kia xikama bhu kanga mu lumbu. Monʼa kilumba, uene mu xibhidila o nganga ia dikota anga uiza-bhu, uixi: Eie ue ua kexile ni Jezú dia Ngalileia.

⁷⁰ Muène-phe udituna bhu pholo ia ene oso, uixi: Ki uala kuzuela, eme ki nga kʼijiia.

⁷¹ Kia tubhuka ku mbalanda-phe, kilumba kia mukuá u mu tongolola, anga u ambela athu ala-bhu, uixi: Ialʼú ue ua kexile ni Jezú dia Nazalé.

⁷² Muène anga udituna dingi ni kulôka, uixi: Xinge phaietu muène! Iala muenhó ki nga muʼijiia ngó!

⁷³ Kubhanga kithangana, athu emana bhenhobho eza kua Phetele, exi: Kidi kiene, eie ua tokala-nâ, kuma o mbimbi iê ia ku tukulula!

⁷⁴ Muène anga u kuata kuxinga ni kulôka, uixi: Nzambi a ngi bhane kaxtiku, se o diiala dienhidi eme nga mu ijiia ngó! Kindala kienhókio dikolombolo anga di kokola.

⁷⁵ Phetele anga u tukumuka o maka ma tangele Jezú, kuila: Kioso o dikolombolo kiluua di kokola, eie ua-nda ku ngi dituna lutatu. Anga u tubhuka, u dila kisoxi kiavulu.