Matesu 22 - O Mikanda Ikola

Kifika kia Sobha i bhanga fesa. Kizuatu kia ukaza

¹ Jezú anga u kuata ku a tela dingi ifika, uixi:

² Utuminu ua diulu ua difangana ni sobha ia bhangele fesa ia ukaza ua monʼê.

³ Anga u tuma jiselevende jê kuixana asonhi a fesa ia ukaza, ene-phe nguauâ kuiza.

⁴ Muène anga u tuma jiphunga jamukuá, uixi: Asonhi a fesa a tangedienu kuma, Seialu iami iíi, nga i iudika kiá. Jingombe jami ni ibhaku iami ianete iójibhe, imbamba ioso ióiudike kiá. Zenu ku fesa ia ukaza!

⁵ Ene-phe a exanene ka ki suu; a di tela njila jâ; iú ku díbhia diê, iú ku uenji uê.

⁶ Axala-ku anga a kuata jiphunga jê, a ji bhanga ufusa, a ji jibha.

⁷ Sobha anga njinda i mu kuata; u katula ita iê, ijibhangangʼoio anga u i buikisa, mabhata mâ u ma ta mu túbhia.

⁸ Muène anga u ambela jiselevende jê, uixi: Ukaza uala polondo, asonhi-phe tua exanene, ka fuamene ku a bhanga-kiu.

⁹ Ndenu-phe mu ikoka bhu jiphambu, oso-oso mu a mona, a exanienu ku fesa ia ukaza.

¹⁰ Jiselevendeʼojo anga ji tunda mu ikoka, ji bhongolola athu oso-oso a a mono, aiibha ni auabha. O ku inzu ia ukaza anga kuizala asonhi.

¹¹ Sobha-phe kia bokona mu ku di mona ni asonhi, u sanga-mu muthu ka zuata kizuatu kia ukaza.

¹² Anga u mu ambela, uixi: Kamba, eie ueza kiebhi mumu ua kambe o kizuatu kia ukaza? Muène-phe kia zuela ka ki mono.

¹³ Sobha anga uambela jiselevende jê, uixi: Mu kutienu o maku ni inama, mu mu texi ku kanga, kua vunduʼoko; kuene kuà kala o kudila ni ku di kokota ku mazu.

¹⁴ Mbata avulu a exana; atolo a a tungula.

O phata ia kubhakuila Sézalu

¹⁵ Jifalizeu anga jiia, ji di longesa kioso kia mu kuatela mu kuzuela kuê.

¹⁶ Anga a tumikisa kua muène jixibulu jâ, ni akua Helode, exi: Mesene, etu tuejiia kuma Eie u mukua kidi, u longa njila ia Nzambi sé makutu, sé uôma; ku tena kulenga pholo ia muthu.

¹⁷ Uila kiki, tu tangele: Eie ua fika kiebhi? O lubhaku lua Sézalu lua tokala ku lu bhana, inga kana?

¹⁸ Jezú-phe, kuma uejiia unguma uâ, uixi: Mu ngi bhombela-hi, mu akua mangonha?

¹⁹ Kitadi kiene kia lubhaku, ngʼidikienu na-kiu. Anga a mu tambuisa denádia.

²⁰ Muène anga u ambela, uixi: O kídifua kiki, ni kidimbu kiki, kia nanhi?

²¹ Exi: Kia Sézalu. Muène anga u a ambela, uixi: Bhakuilenu-phe kua Sézalu, ima iangene ia Sézalu; kua Nzambi, o ima iangene ia Nzambi.

²² Ene kia zubha ku kʼivua, a diuana, anga a mu xa, a muangana.

O phata ia difukunukinu

²³ Kizuua kienhókio anga kuiza jisaduzeu, ene mu kuila kana-ku difukunukinu.

²⁴ Anga a mu ibhula, exi: Mesene, Mozé uambele kuma: Diiala se dí fua, hé u xisa muhatu, sé kuxa mona, phangʼiê a sakane muhatuʼê, o mutudi a mu xisʼó, nda a vuale ana, a sokolole o mbutu ia phangʼiê uafu.

²⁵ Etu-phe tua kexile ni sambuadi dia mala, anʼa kamama. Dikota anga u sakana, u fua; kuma ka xiê mbutu, muhatuʼê ua mu xila kiubha kiê.

²⁶ Kiubha kia kaiadi, ni kia katatu, kiene kimoxi, katé sambuadi dioso diabhu-ku.

²⁷ Ene oso kia zubha kúfua, o muhatu uê uafu.

²⁸ O kiki-phe, ku difukunukinu, ku sambuadʼidi, muhatu ua kà kala muhatu a nanhi? Kuma ene oso a mu sakanene!

²⁹ Jezú-phe ua a vutuila, uixi: Enu mua tondala, mukonda Madivulu Makôla ki mua mejiia, ni kutena kua Nzambi ki mua kuijiia.

³⁰ Kuma ku difukunukinu athu kà sakana, kà bhana mu kusakana, a kala-phe mukuâ ni jianju mu diulu.

³¹ O phata ia madifundu kufukunuka, kífua kiluua mu tanga kia mi ambela Nzambi, uixi:

³² Eme ngi Nzambi ia Mbalahamu, Nzambi ia Izake, Nzambi ia Jakobo? Nzambi ki Nzambi ia madifundu, maji ia athu a muenhu.

³³ O mundu kia zubha ku kʼivua, a diuana ulongelu uê.

Kioso o kijila kia dikota

³⁴ Jifalizeu-phe, kia kʼivu kuila jisaduzeu ua ji belêsa, a di bhongolola kumoxi.

³⁵ Muthu umoxi-ku, ndongixi, anga u mu ibhula phala ku mu londa, uixi:

³⁶ Mesene, kiebhi o kijila kia dikota mu Kitumu?

³⁷ Jezú ua mu vutuila, uixi: Zola Ngana, Nzambi iê, ni muẋima ué uoso, ni muenhu ué uoso, ni kilunji kié kioso.

³⁸ Kiene kijila kia dianga kia dikota.

³⁹ Kia kaiadi kia difuê ngó ni kia dianga, kiki: Zola mukuenu kala ki ua di zola eie-muène.

⁴⁰ Ku ijila iiadi ienhiʼii, kuene kua nhenganana o Kitumu kioso ni jipolofeta.

Kristu monʼ a nanhi?

⁴¹ Kiosuʼiki kia bhongoloka o jifalizeu kumoxi, Jezú ua ebhula, uixi:

⁴² Kristu, enu mua mu fika kiebhi? Muène monʼa nanhi? Exi: Monʼa Davidi.

⁴³ Kuala muène: Davidi-phe mu Nzumbi ua mu edi kiebhi, Ngana, kuma uixi:

⁴⁴ Ngana uambela Ngana iami, ngi xikamene ku madilu mami, katé ki ngi ku bhakela o jinguma bhoxi dia inama ié.

⁴⁵ Davidi se ua mu edi Ngana, u kala kiebhi monʼê?

⁴⁶ Bhenhobho kana muthu ua tena ku mu vutuila dízui dimoxi. Tunde mu kizuua kienhókio ue, kana muthu ua bhumina dingi kufunda-nê phata.