Matesu 15 - O Mikanda Ikola

O ijila ia Nzambi ni ijila ia athu

¹ Kienhokio kua Jezú kuiza jifalizeu ni jisaduzeu ja tundu ku Jeluzaleme phala kuzuela-nê anga a mu ibhula, exi:

² Phala-hi jixibulu jê ji tondala o kífua kia lekelela adiakimi okulu? Kuma ene kia dia ka sukula maku, kala kiene o kijila kietu kia tu xila akulu-a-ndamba.

³ Muène-phe u a vutuila, uixi: Enu uenu, phala-hi mu tondala o kijila kia Nzambi, mukonda dia kífua kienu?

⁴ Mbata Nzambi uambe, kuma: Bhana tatʼ ʼenu ni mamʼenu ujitu. O uoso u xinga tatʼâ, mba mamʼâ, muthu ua ku mu jibha.

⁵ Enu-phe muixi: Uoso u ambela tatʼâ mba mamʼâ, uixi: Ioso i ueji kubhandulukila ko-kuami, nga i lumbila Nzambi,

⁶ kuabhu, o tatʼâ ka mu bhanʼê dingi ujitu. Mu kubhanga kiki, o maka ma Nzambi mua ma tumbulula mukonda dia kífua kienu.

⁷ Muala ni kàdia. Kidi kia Izaia, kia mi tange, uixi: Nzambi uambe:

⁸ Athu iá a ngi xila ni mizumbu iâ; miẋima iâ-phe ia ngi kala kualebha.

⁹ A ngi bheza-phe ngó makutu, ni kulonga ijila ia tumu ngó athu, kala Nzambi muène ua i tumu.

Jezu u tanga kioso ki xidisa o muthu

¹⁰ Muène anga uixana kifuẋi, uixi: Ivenu, mu ijiie:

¹¹ Kima ki bokona mu kanu, ki kiene ki xidisa muthu; inda ki tunda mu kanu, kiene ki xidisa o muthu.

¹² Jixibulu anga jiza, ji mu ambela, exi: Eie ua kijiia kuma jifalizeu ja fatuluka mú kuívua o makʼ ama?

¹³ Jezú-phe ua vutuila, uixi: Kidima kioso kia bhingi Tata iami mu diulu ki muène ua ki phaphe, ki bhinga ku ki vuza.

¹⁴ A ehiʼenu! Ala atuameneni a ifôfo. Kifôfo-phe, se ki tuamenena kifofo ni mukuá, kiiadi kiâ a-nda kudibhala mu dikungu.

¹⁵ Phetele u kumbulula, uixi: Tu jimbuile kifikʼ okio.

¹⁶ Jezú-phe, uixi: Ni enu uenu, kífua hanji mua kambe ku kʼijiia?

¹⁷ Kífua ki mu mono kuma kioso ki bokona mu kanu, ki bhita mu mala, anga ki tundila bhoxi?

¹⁸ Ima-phe i tunda mu kanu, ia tundu ku muẋima, iene i xidisa muthu.

¹⁹ Mbata mu muẋima muene mu tunda ixinganeku iaiibha; makujibha, jiphànda, maundumbu, mauii, maumbangi ma makutu, makuxinga.

²⁰ Ima ienhiʼii iene ima i xidisa o muthu; o kúdia-phe ni maku ki mósukule, ki ku xidisa muthu.

Muhatu a mukua Kanana a mu sakela monʼê

²¹ Jezú anga u tunda kuenhoko, uia mu jixi ja Tilu ni Sidónia.

²² Talesa-phe muhatu a mukua Kanana u tunda mu jimbanduʼ omo, anga u di kola, uixi: Ngi kuatele henda, Ngana, u monʼ a Davidi! Monʼami ua muhatu, Diabhu dia mu salula kiaiibha.

²³ Maji Jezú-phe ka mu kumbulula kima. Jixibulu anga jiza, ji mu dionda, exi: Mu kaie, aiê; kuma ua tu nhenganana ni kudikola.

²⁴ Muène-phe u kumbulula, uixi: Eme a ngi tumu ngó ku jimbudi ja jimbidila ja dibhata dia Izalaiele.

²⁵ O muhatu-phe uiza, u mu sambela, uixi: Ngana, ngi kudile!

²⁶ Muène u kumbulula, uixi: O mbolo ia ana, ki i tokala ku i texila tuana tua jímbua.

²⁷ Muhatu-phe, uixi: Kiene, Ngana! Maji o tuana tua jímbua-phe, tu dia ku ixete i lalumuka ku meza a ngana jâ.

²⁸ Jezú bhenhobho u mu vutuila, uixi: Muhatu ua kime, o kuxikana kué kua-vulu! Ki di bhange, kioso ki ua mesena. Monʼê anga u iluka, tunde mu kumbi dienhódio.

Jezú uia mu Ngalileia, hé u saka athu avulu

²⁹ Jezú anga u tunda kuenhoko, hé uiza bhua zukama ni bhu kizanga kia Ngalileia. Anga u banda ku mulundu, u xikama koko.

³⁰ Anga a mu sanga ifuẋi iavulu, kumoxi ni atenguna, ifôfo, ni mabubu, ni inema, ni amukuá dingi avulu, anga a mu tudila-nâ bhu inama iê. Muène-phe, ene oso anga u a saka.

³¹ Katé kifuẋi kia diuana, kia mono mabubu ia zuela, inema íi di sanza, atenguine ia enda kiambote, ifôfo íi mona. Anga a kala mu bhana fuma kua Nzambi ia Izalaiele.

Lua kaiadi o kuvudisa jimbolo

³² Jezú anga uixana jixibulu jê, uixi: O mundu nga a kuatela henda, mukonda nga nange-nâ izuua itatu kiá, kala dingi ni kúdia. Ki nga mesena ku a sulula ni nzala, sumba a sendukila mu njila.

³³ Kuala jixibulu: Kuebhi-phe ku tu mona, mu iangʼumu, jimbolo ji soka, o kifuẋi kiosuʼiki ni kʼikuta?

³⁴ Eme Jezú: Mbolo jikuẋi ji muala na-ju? Exi: Sambuadi, ni tumbiji tuòfele.

³⁵ Muène anga u tuma kifuẋi kuxikama bhoxi.

³⁶ Anga u zangula sambuadi dia mbolo, ni tumbiji, hé u sakidila Nzambi, u ji bhasujula, anga u ji bhana ku jixibulu, o jixibulu anga ji bhana o kifuẋi.

³⁷ Ene oso anga a dia, hé ekuta. Ku ibhasu ia subhujuka anga a nona-ku sambuadi dia inda iezala.

³⁸ Ene adi-ku a tena midi jiuana ja mala; ahatu ni anandenge engi.

³⁹ Muène anga u sulula o ifuẋi, u di longa mu bote, anga uiza mu jimbambe ja Mangadana.