Matesu 13 - O Mikanda Ikola

Kifika kia mukuni a jimbutu

¹ Kizuua kiókio Jezú u tunda mʼonzo, hé u xikama bhu mbanduʼ a kizanga kia Ngalileia, anga u kuata kulonga athu.

² Mundu uavulu, hé u mu bhongolokela, katé kia di longo mu bote, hé u xikama momo. O mundu uoso-phe uemana ku ndùndu.

³ Muène anga ua tangela ima iavulu mu ifika, uixi: Talesenu, ku kala mukuni a jimbutu u tunda mu ku kuua.

⁴ O kia kala mu ku kuua, jimbutu jamukuá ja sonokena bhu mbanduʼa njila, o jinjila anga jiza ji ji moma.

⁵ O jamukuá ja sonokena bhu ididi iala ndànji, bhuala mavu mòfele ngó. Anga ji sabhuka kindala, mukonda mavu mala ngó ku thandu.

⁶ Kiatu o muanha-phe, ja lela, o mukonda dia kukamba jindànji, ki ja nange kukukuta.

⁷ Jamukuá ja sonokena mu minha, o minha anga i kula i bhaka o jimbutu mua vundu.

⁸ Jamukuá ja sonokena mu mavu mambote, anga jʼima ibundu. Bhuala lumbundu lu bhana hama ia lumbundu, bhuala lulu lu bhana makuinhi a samanu, bhuala lu bhana makuinhi atatu.

⁹ Uoso uala ni mátui, évue.

Kia bhangesa o ku a zuelesa mu ifika

¹⁰ Jixibulu anga jiza, ji mu ibhula, exi: Mukonda diahi, Ngana, uala ku a zuelesa mu ifika?

¹¹ Muène u a vutuila, uixi: Enu Nzambi ua mi bhana-kiu, o kuijiia ikutu ia Utuminu ua Diulu, ene-phe ka a bhana-kiu.

¹² Kuma uoso uala, muène a mu bhana, mbé a kale ni kiavulu. O uoso-phe kala, ni kiki kiala na-kiu a mu tambula-kiu.

¹³ Kiene ki ngala ku a zuelesela mu ifika; mukonda kia tala, ka mono, o kievua, ka kʼivu, ka kʼijiia.

¹⁴ Kua ene kua tenena kia zambula Izaia, o musèsedi, uixi: O kuívua, mu ivenunu, anga mu tokoka o kuijiia. O kutala, mu talenunu, anga mu tokoka kumona.

¹⁵ Mbata o muẋima ua mundu iú ua kolokota, Mátui mâ ma kokoloka kuívua, mesu mâ a ma jika; ku lengesa o kumona ni mesu, kuívua ni mátui, kuijiia ni muẋima, nʼa lunguluke dingi, eme ni ngʼa sake.

¹⁶ Enu-phe ma zediua o mesu menu, mbata ma mono; ni mátui menu, mbata mevu.

¹⁷ Kuma ngi mi tangela kidi, jipolofeta javulu ni athu aiuka endile kumona o ima o mua-lu monʼenu, maji ka i muene; ni kuívua ima i muala kuivʼenu, maji ka ivile.

O dijimbuluilu dia kifika

¹⁸ Ivenu-phe, muijiie kia lombolola o kifika kia mukuni a jimbutu,

¹⁹ kʼivua muthu uoso o maka ma Utuminu ua Nzambi, anga u tokoka ku a ejiia, bhenhobho Dimonho diza di sumbununa ioso ia kuuile mu muẋima uê. Muenhú a mu kuua bhu mbanduʼ a njila.

²⁰ A mu kuua ididi bhu ndànji, muenhú uívua maka, anga u ma tambulula kindala ni ngalasa.

²¹ Maji moxi diê-phe ua kambe lundanji, u nanga ngó kithangana. O ki moneka phaxi, mba ku kala ku mu zukutisa mukonda dia maka, kindala ua di bhale.

²² A mu kuua mu minha, muenhú uívua maka, maji o luímbi lua mu ngongo-phe ni kusênduka kua jimbongo, kubhaka o maka mu a vundu, anga u tokoka kuima ibundu.

²³ A mu kuua mu mavu ma mbote-phe, muenhú uívua o maka, anga u mejiia; ió uima kidi ibundu, bhu kala ni iú umoxi u bhana hâma, iú makuinhi a samanu, o iú makuinhi a tatu.

Kifika kia jimbundu ja iangu

²⁴ Jezú anga u a tela kifika kiamukuá, uixi: Utuminu ua Diulu ua dufangana ni muthu u kuua jimbutu jambote mu díbhia diê.

²⁵ Kioso-phe kiai athu ku kilu, nguma iê uiza, mu jimbutu jambote anga u kuua-mu jimbundu ja iangu, iu uaiê.

²⁶ O kia sabhuka jimbutu, hé ji mateka kuima, ku moneka dingi ni jimbundu ja iangu.

²⁷ Jiselevende ja mukua dibhata anga jiza, ji mu ibhula, exi: Ngana, eie mu dibhia dié kua kuuile-mu jimbutu ja mbote? Muala-phe kiebhi ni jimbundu ja iangu?

²⁸ Muene u ambela, uixi: Sai-ku nguma ia ngi bhange kienhiki. Kuala jiselevende: O kiki, ua mesena ni tuie ku ji nona-mu?

²⁹ Muène-phe, uixi: Kana! Sumba ki muia kunona-mu jimbundu ja iangu, mu ji vuzila kumoxi ni jimbutu ja mbote.

³⁰ Ehelenu-ju, jene joso ji kudile bhuamoxi katé kia kà bhia o idima. O bhu thembu ia kubhongolola kiene ki ngà kʼambela abhongolodi, kuila: Diangenu kubhongolola o jimbundu ja iangu, mu ji kute ita, phala ku ji oha. Maji o jimbutu jambote-phe mu ji bhongoluela mu kitula kiami.

Kifika kia lumbundu lua mustarda

³¹ Anga u a tela kifika kia mukuá, uixi: Utuminu ua Diulu ua Difangana ni lumbundu lua mbutu ia mustarda, muthu ua lu katula, anga u lu kuna mu díbhia diê.

³² O luene kidi kiene, lua suku-ku mu kutola ku jimbutu joso; ki lua-nda kukula-phe, idima ioso i kala ndenge, muiza muẋi ua kuila jinjila ji bhita bhulu jenda ni kutula mu jithangu jê.

O kithûthume

³³ Anga u ambela kifika kia mukuá, uixi: Utuminu ua Diulu ua difangana ni kithûthume, a ki katula kuala muhatu, anga u ki sueka mu izongelu itatu ia fuba, katé iene ioso ia futunuka.

Kioso kia bhangesa Jezú ku a zuelela mu ifika

³⁴ Ima ioso iíi Jezú ua i tangela ifuẋi mu ifika. Sé kifika, ka a tangelediʼê kima;

³⁵ phala ni ki bhite kia tangele polofeta, uixi: Dikanu diami ngi di jikuila mu ifika, ngi tanga ima iósueke tunde ku dimatekenu dia ixi.

Dijimbuluilu dia kifika kia jimbundu ja iangu

³⁶ Bhenhobho o mundu ua u xisa, uia mʼonzo. Jixibulu anga ji mu sanga, exi: Tu jimbuile kifika kia jimbundu ja iangu mu díbhia.

³⁷ Muène u kumbulula, uixi: U kuua jimbutu jambote, o Monʼa Muthu.

³⁸ O díbhia mu ngongo ioso; jimbutu jambote, o anʼa Utuminu ua Nzambi; jimbundu ja iangu, o anʼa Dimonho.

³⁹ O nguma uoso ua ji kuua, muene Diabhu; o thembu ia kubhongolola, o dizubhilu dia mundu; abhongolodi, o jianju.

⁴⁰ Kala-phe kia bhongolola o jimbundu ja iangu, a ji oha mu túbhia, kiene ue kia kà bhita ku dizubhilu dia mundu.

⁴¹ Monʼa Muthu ua kà katula ji-anju jê, ni ja kà bhongolola mu Utuminu uê o ima ioso i bhangesa kudibhala, ni oso a bhanga úsueia,

⁴² hé a kà a texi mu kitúbhia kia dikota. Muenhomo muene muà kala o kudila ni ku di kokota ku mazu!

⁴³ Kienhókio athu aiuka a kà di muika kala dikumbi ku mbanza ia Tata iâ. Uoso uala ni mátui, évue.

Kifika kia kitadi kiósueke

⁴⁴ Utuminu ua Diulu ua difangana ni kitadi kiósueke ku mukáu; anga bhu kala muthu u ki bonga, hè u ki dinga. Mu kutana kuê anga uia, u sumbisa ioso iala na-iu, anga u sumba o mukáu uenhó.

Kifika kia phélula

⁴⁵ Luamukuá dingi, Utuminu ua Diulu ua difangana ni ngenji u kala mu kufuna jiphélula jambote.

⁴⁶ O kia-ndu bonga phélula imoxi iate kiavulu, uia, u sumbisa ioso iala na-iu, anga u i sumba.

O kifika kia uanda

⁴⁷ Luamukuá dingi, Utuminu ua Diulu ua difangana ni uanda, a u takula mu menha, anga u kuata jimbiji ngó joso-joso.

⁴⁸ O ki uizala, atona a u sungila ku kanga, anga a xikama, o mbiji joso ja uabha a kuata ku ji nonena mu itutu, o jaiibha a ji texi.

⁴⁹ Ni ku dizubhilu dia mundu, kiene ue kia kà bhita. O ji-anju ja kà tunda mu ku tungula athu aiibha, mua iá aiuka.

⁵⁰ O aiibha há a kà a texi mu kítubhia kia dikota. Kuene kuà kala o kudila ni ku di kokota ku mazu.

Kidi kiʼobhe ni kiʼokulu.

⁵¹ Ima ioso iíi mua ivuenunu kiambote? Exi, Xi!

⁵² Kuala muène: Uila kiki, mesene ioso u longa o Kitumu, hé u di bhanga xibulu ia Utuminu ua Diulu, u difangana ni tata ua tambula konda ia dibhata, u katula mu dilundilu diê ima ióbhe ni iókulu.

Jezú mu sanzala iâ

⁵³ Anga ki bhita, kuila kia zubha Jezú ifik ʼii, bhenhobho u tunda-bhu.

⁵⁴ O ki eza mʼoxi iê-muène, u kuata ku a longa mu dilombe diâ; ene iá a diuana, exi: Kuebhi kuene kua mono muthu muenhú o unjimu uosʼú, ni isum ʼiíi ia-lu bhanga?

⁵⁵ Iú ki muène monʼa kalupindelu? Mamʼâ ka mu ixana exi: Madiia? O jiphange jê ki ene a Tiiaku, ni Zuze, ni Ximá ni Juda?

⁵⁶ Ni jiphange jê ja ahatu, ene oso ki etu-nâ? Muthu iú ima ioso iii, ua i sange kuebhi?

⁵⁷ Anga a mu longolola. Nguauâ ku mu suua. Jezú-phe u ambela, uixi: Polofeta, bhu mu kamba ngó ujitu, kikale mʼoxi iê-muène, ni bhu bhata diê.

⁵⁸ Muène bhenhobho ka tenene kukalakala-bhu isumua iavulu, mukonda dia ene kukamba o kuxikana.