Matendelelu 33 - O Mikanda Ikola

O unéne ua Nzambi

¹ Didi-phe diene o dibesá dia besouala na-diu anʼa Izalaiele kuala Mozé, muthu ua Nzambi, kiosuʼiki kia lungu mu kúfua.

² Uixi: Jihova uatulukila ku Sinai, iú ua bandela ku Seíle; ua lekujukila ni ku mulundu ua Palane, ueza ni kuinhi dia midi dia jisandu ku madilu mê kua kexile o kitumu kiauama túbhia phala ene!

³ Muene mu kidi ua zola o ifuẋi; athuʼê angene ala bhu lukuaku luê; ene enda ni kuxikama bhu inama iê, phala kala muthu nʼende ni kutambula-ku ku maka mê.

⁴ Mozé ua tu tambuisa o kitumu, kuma uene undundu ua tokala o kionge kia Jakobo.

⁵ Uakexe ue Sobha mu Jesulume, kioso kia di bhongoluele o makota moso ma kifuẋi ni miji ioso ia Izalaiele.

Mabesá ma miji ia Izalaiele

⁶ Lubene akôle muenhu, kʼafue, athuʼê a di sokolole muene.

⁷ Ki kiene kia tanga Juda, uixi: Jihova ividila dízui dia Juda. Mu bhixidise muene mu kifuẋi kiê; ende ni kubhandulukila ku maku mê-muene. Eie-phe di bhange u Dikuatekesu diê, bhu kaẋi ni kúlua o jinguma jê.

⁸ Utanga Levi, uixi: O Tumimi ni Udimi ié, ikale iangene ia kazola ké. Uoso eie ua mu bhitixile ku polova bhu Masá, ió ua zokele-nê bhu menha ma Mediba.

⁹ Muene o muthu kejiia tatâ mba mamâ; utanga uixi, kiluua ngʼa mona; kejiia jiphange, né mbé utongolola ana; ene-phe o maka mé a ma lundu, o kikutu kié a ki aiuka.

¹⁰ A longo mabatuilu mé kua Jakobo, ni kitumu kié kua Izalaiele; Eʼmuene isenso ia dizumba dia uabha a ku fenhesa-iu, sata ja kuoha a ku tela-ju bhu kalatódio ké.

¹¹ Uzonda ué mu tele-u dibesá, Jihova tata! Xikina o kikalakalu kia maku mê; a kuame mu malombo oso a mu kanena muene, ni ió oso a mu zemba, phala nuka dingi a balumuka.

¹² Kia tanga Bejamí, uixi: Kazola kangene ka Jihova, ua-nda kutunga-nê bhua kondama. Kumbi dioso dia kambàmba, unanga ni ku mu vungina; muene anga ubutama bhuʼaxaxi ka isuxi iâ.

¹³ O kua Zuze, uixi: O mabesá ma Jihova, a kà kala mʼoxi ié, o mabesá ma diulu a ku bhane idima ia matunda, ni dimume ni menha a tunda koxi a mavu.

¹⁴ Ni mabesá mʼejila ku dikumbi di bhisa ibundu, ni mabesá mʼejila ku muthethamenu ua mbeje, a sabhukisa o idima katé ki ima.

¹⁵ Mabesá ma tundu ku milundu iôkulu, ni mabesá ma tundu ku tu-thuthulùndu tua kalelà-ku tunde xahulu.

¹⁶ Ni mabesá ma mukuá, ma tunda ku mavu kuene ni kuizala kuê kuoso, mejila kumoxi ni jinzungule ja jimbote ja luná uoso uatungile mu kisasa mabesá mê ma tuluke ku mútue ua Zuze, ma tule mu mútue ua ió ua di tungula mu jiphange jê.

¹⁷ Muene akale ni uzonda kala ua ngalote ia ngombe iê ia phande-kumbi. O jimbinga jê jile kala kaluimba. Jene ja-nda ku kuama na-ju bhuamoxi o ifuẋi katé ku jimbambe jaʼxi. Enhá ene o kuinhi dia midi ja Ifalaíme, ene o jimidi ja Manasa.

¹⁸ Kia tanga Nzebulone, uixi: Nzebulone enda ni kutana, mu matundilu mé. Eie ue u Isakale, enda ni kutanena mu jibalaka jé.

¹⁹ Enhá kiiadi kiâ a kʼexana ifuẋi ku mulundu. Kuenhoko kuene kua kà bhakuila mibhaku ia kuiuka. Mbata a kà bha jimbote janzungule jene ku misanza ia kalunga, ni ma-umvama mʼosueke mu museke.

²⁰ Anga utanga Ngadi, uixi: A tane-ku, uoso usanzumuna Ngadi; Ngadi utunga muene kala mama ia hoji, u saúna lukuaku, ubula kisòko-soko, kia mútue uê.

²¹ Muene ualundula mbandu iadianga, mukonda kuene kuaxala o dikànda dia tokala o kilolo kia kitumu. Kiene ki ejiia ku pholo ni jixefe ja povo iê. Ua kumbidila ni ukuenze o kidi kia uiukilu ua Jihova. Mabatuilu ma Jihova kua Izalaiele muene ua ma te mu ididi iê.

²² Ua tange ue Dane, uixi: Dane ua di bhanga hoji ia munzangala, ua-nda kutukila mu Basane.

²³ Utanga Nafitali, uixi: Nafitali, mukua jimbote muene, uezala muene, ni mabesá ma tunda kua Ngana. Ikuta muene ni jimbote ja Jihova; uvua mbandu ia luiji ni mbandu ia sulu, a di bhanga uene undundu ué.

²⁴ Iú uatange Asele, uixi: Asele atane-ku, ni muene ni anʼê; a di bhane kiambote ni jiphange jê. A bondeke kinama kiê mu máji.

²⁵ Sabhatu ié felu ni utadi; uzonda ué usoke ni izuua ié i u kola muenhu.

²⁶ Kazola kami, kana-ku muthu ua di fu ni Nzambi ié! Ukanduka maúlu mu kuiza ku ku banda; o unéne uê u di-leka-na-u ku matuta moso ma beta kuia bhulu.

²⁷ Nzambi kene mbambe, akale muene o disuamu dié. Bhoxi dié, maku manangenena, ma ku fikidile. Muene a kà kaie Nguma ku pholo ié, nda a ku bhue ku mesu, Muene uila: A buikise muene!

²⁸ Kala kiki Izalaiele ua kà tunga ua kà soma, ubheka uê, mu ixi ia dijiia dia Jakobo. Mʼoxi ia masa ni maluvu; o maúlu mê ma suka jinga mbundu.

²⁹ Kuzediua kué Izalaiele, tata! Nanhi ua soko nʼeie? Kifuẋi kiòbhulule kuala Jihova, muene o ngubu ié ienda ni ku ku banda. Muene ue o xibhata ia unéne ué; kiene kia-nda kubhangesa o jinguma jé ku ku tolokela, eie anga uendela ku thandu diâ, ni ku a tumina.