Matendelelu 1 - O Mikanda Ikola

Dilûnda dia Mozé mu dinhana dia Njolodá

¹ Didi diene o dilûnda dia Mozé dia tela Izalaiele ioso, ku sámbua kunu dia Njolodá, mu kikangalakata kia Alabha, bhu kiphenza bhua lulama ni kizanga kia Sufe, bhu kaẋi ka Palane ni Tofele, ni Libano, Hazelote ni Dizahaba.

² Tunde bhu Holebe, mu njila ia kubhitila ku mulundu ua Seíle, katé bhu Kadexe-Baneia, bhuala kuinhi dia fundu ni imoxi.

³ Anga kibhita kuila, o makuinhi auana a mivu kia tena, kua kambe ngó mbeji imoxi, mu kizuua kia dianga kia mbeji ia kamoxi ku kuinhi, Mozé uzuelesa anʼa Izalaiele, kala kia tumu Jihova ku a tangela.

⁴ Kia zubha-phe ku buidisa Sihone muenexi ua akua Mamodi, ua tungile mu Hezebone, ni Hoke, muenexiʼa Basane, ua tungile mu Axitalote, bhu Dileie.

⁵ Ku sámbua kuná dia Njolodá, mʼoxi ia Mouabhi, Mozé uandeka kulombolola o kitumu kiki, uixi:

⁶ Jihova Nzambi ietu ua tu zuelesa bhu Holebe, uixi: Bhu mulundu iú mua nakina-bhu kinéne.

⁷ Bilukenu, mu katuke, muie ku mulundu ua akua Mamodi, ni oso a zukama kuenhoko ni ku kiphenza, ni ku mulundu, ni mu dikôlo muná ni ku sulu, ni ku Nengabe ku mbanduʼa musanza, mʼoxi ia Kanana, ni ku Libano, katé kiá ku ngiji iadikota ia Ufâlate.

⁸ Talesenu, oxi ioso iii nga mi bhana-iu enu; bokonenu muʼvue oxi ia lokela Jihova ku jitata jenu, Mbalahamu ni Izake ni Jakobo, ku a bhana-iu ene ni mbutu iâ kuema diâ.

O usolelu ua akuatekexi

⁹ Bhenhobho-phe eme nga lenguluka ku mi tangela-kiu, ngixi: Eme ngó ubheka uami, ki ngi tena ku mi ambata.

¹⁰ Jihova Nzambi ienu ua mi sokolola kiá; xinganekenu kuma leluʼidi mua vulu kiá, muedi kiá kala mu jithéthembua bhulu.

¹¹ Jihova Nzambi ia jitata jenu a mi bandekeze muene, o ki mualʼokio a ki bhange dingi katé mu lumidi; ende ni ku mi zediuisa kala kia mi tangela-kiu kiá kuala muene.

¹² Eme-phe o kukolamena o udibhonji uenu ni inemenu ienu, ni ku-di-thatheka kuenu, ngi ki tena kiebhi ubheka uami?

¹³ Solenu-ku athu muʼaxaxi ka ibuka ku ibuka ienu, oso mua a mono ni unjimu ni kutetuluka, oso ende kiabhu o ngongo nda ngʼa bhange makotʼenu a ku mi tambula konda.

¹⁴ Enu-phe, mua ngi vutuila, muexi: Sembele kubhanga ki uazuela.

¹⁵ Nga kuatele-phe adienu mu miji ienu, mala a jinjimu, ende kiabhu o ngongo, eme nga a bhange makota phala ku mi tambula konda; o iá jikabhitangu ja kutumina jimidi, o iá jikabhitangu ja kutumina jihama, o iá jikabhitangu ja kutumina makuinhi atanu, o iá jikabhitangu ja kutumina dikuinhi; amoxi nga a bhange jinguvulu ja kuendesa ibuka ia miji ienu.

¹⁶ Eme nga tendelela afundixi enu, ngixi: Endenu ni kuividila jiphange jenu, kioso kia di kuata milonga, mua a batuile mu kidi o madimanda ma phange ni phange, katé ni nzuá-ngiza uala kumoxi ni ene muʼaxaxe kâ.

¹⁷ O ki mu fundisa ki mu suue muthu; ua tolo mu muivua, o ua kulu mu mu ivua; ki bhu kale pholo i mi kuatesa uoma, kuma o kubatula milonga kima kia Nzambi; maji se bhu kala mulonga ua mi bhônzo, muiza-na-u kokuami, eme anga ngi uʼívua.

¹⁸ Kienhókio, mu thembu ienʼoio kiene ki nga mi tendelela ima ioso i mua fuama kubhanga.

Kuinhi dia muthu ni kiiadi a a tumikisa kulonda o ixi ia Kanana

¹⁹ Kiene kiua ki tua katuka, mu kutunda ku Holebe, anga tuhuha kikangalakata kiosuʼokio ki mua di muena enu-enu; tua bhitila ku milundu ia akua Mamodi, kala kia tu tumina Jihova, Nzambi ietu; anga tu bhiẋila bhu Kadexe-Baneia.

²⁰ Ngixi-phe; Mua bhiẋila kiá ku milundu ia akua mamodi ia-nda ku tu bhana kuala Jihova Nzambi ietu.

²¹ Talesa-ze, o Jihova Nzambi ié ua ku bhana oxi i ua mono iii; banda, lundula-iu, kala kia ku tangela Jihova Nzambi ia jitata jenu; ku kale-phe ni uoma, kana, mba ngó kusasumuka.

²² Bhenhobho-phe enu mua ngʼendela, muexi; Tu tume-ku hanji mala nda a tu londele oxi, eze a tu tudile mahezu; bhene bhu tu muena ioso njila i tua-nda ku di tela mu kubanda-mu, ni joso jisanzala ji tua-nda kubokona.

²³ Eme kienhókio nga ki muene kutetuluka; kiene kia ngi bhangesa kukatula kuinhi dia muthu ni kiiadi, ku muiji ni muiji kua tundu muthu.

²⁴ Iá endele, abandela mulundu iú, a bhitakena katé mu dikolo dia Xikole ni kulonda oxi.

²⁵ Anga a kanza-mu ibundu iaʼxi, eza na-iu bhu maku mâ, a tu tudila mahezu, exi: Oxi ia tu bhana Jihova Nzambi ietu iauabha muene kiambote.

Mundu atambula ni uoma o maka ma iá ele mu kulonda ixi

²⁶ Maji enu-phe kubanda nguenu; inda mua xibhaka kia tumu Jihova Nzambi ietu.

²⁷ Mua kuata kungonga mu jibalaka jenu, muexi: Jihova ua tu bhange-kiu mukonda dia ku tu zemba, ua tu katula ku Ijito phala ku tu tula bhu maku ma akua Mamodi mbé nʼa tu buikisa.

²⁸ Tuia dingi kuebhi? Phange jetu ene a tu botomokesa o miẋima, exi: Athu ala koko a makota kulebha kuvula etu ndenge, a tu tundu; o jimbonge ue ja makota, imbaka iâ ia tuta muene ku maúlu. Exi dingi: Tua mono-ko ue o anʼa Anake, o mazonda.

²⁹ Eme ngixi: Ki mu tale hadi, enhó kʼathu a ku a kuatela uoma.

³⁰ Jihova Nzambi ienu, uoso ua-nda ku mi tuamenena, muene ua-nda ku mi bhangela o mvunda, kala kia mi bhange mu ima ioso ia bhange kiá, ki mua di muena ku mesuʼenu mu Ijito;

³¹ ni mu kikangalakata, mu mua bhiti ni ku mi ambata kuala Jihova Nzambi ienu kala muthu kiʼambata monʼê, mu njila ioso mu muejila katé ki mua bhiẋila bhu kididiʼiki.

³² Enu-phe ku thandu dia ku mi tetulula kiki, mua lembua kuxikana Jihova Nzambi ienu,

³³ ió ua mi tuamenena mu njila ioso iii, mu ku mi kengela kididi kia kizalu bhu mu zekela; anga uenda ni kuila, o mʼusuku uendela mu kitúbhia, mbé o ku mi muikina mu njila i mua tokala o kuila, o mu muanha-phe, mu dituta kiá.

O kaxtiku ka Nzambi

³⁴ Jihova phe, kievu o dízui dia kuzuela kuenʼuku, ua di vunza anga u loka, uixi:

³⁵ Ni kidi kiene, o muiji ua isuéia u kala kiki, ki bhu kala dingi muthu u mona oxi iauabha kiókio i nga lokela ku i bhana jitata jenu.

³⁶ Hé kima, Kalebe ngó monʼa Jefune; sembele ió u i mona muene, o ixi ia diata kiá, ngi mu bhana-iu muene, ikala ia muene ni anʼê; kuma muene uabalakata ni kukaiela kiambe Jihova;

³⁷ Jihova bhenbhobho ua di vunza ue nʼeme, mukonda-phe dienuʼenu, uixi: Eie ue (u Mozé) mʼoxiʼomo kua ká bokona-mu.

³⁸ Josuué, monʼa Nune, uala kunanga bhu pholo ié, muene ua kà bokona-mu; mu suinise-phe muene, kuma muene ua-nda kua kà i lunduisa Izalaiele.

³⁹ O anʼenu-phe, u muedi, muixi: Anda kukituka mbole, o anʼenu a kambe o kuijiia kiauabha ni kiaiibha leluʼidi, ene a-nda kukutuka-mu, ene nganda ku a bhana-iu anga a iʼvua.

⁴⁰ Maji enu-phe bilukenu, mu vutukile mu kikangalakata, ditedienu mu kikoka kia musanza ua Kalunga Kakusuka.

Kifuẋi kia Izalaiele a a tolola bhu kalundu ka Holoma

⁴¹ Enu-phe mua ngi vutuila, muexi: Jihova tua mu te kituxi; inda o bhabha tu banda kiá muene, tua kà lua ita, kala kia tu tumu Jihova Nzambi ietu. Anga mu maneka o ibhakatu ienu ia ita, kala muthu o iê, hé mu andeka o ku katuka mu kubanda o mulundu.

⁴² Jihova phe kienhókio ua ngʼambela, uixi: A tangele: Kana kubanda. Ki mu di metene kúlua, mbata Eme ki ngala muʼaxaxi kenu; muavula kukuamiua, bhu pholo ia jinguma jenu.

⁴³ Maji ki nga zuelʼiki, enu ki mua ki suu; Jihova mua mu ẋinukina kiá, mua di zangeleka, nguenu kutumaka o kizuelu kiê. Anga mu banda muene o mulundu.

⁴⁴ Akua Mamodi-phe, a tungile ko mulunduʼoko, hé a mi endela; anga a mi landameka mukuá ni kiene kubhanga o jinhuki; a tunda mu Seíle ni ku mi tolola katé bhu Holoma.

⁴⁵ O ki mualuluka, anga muiza kudidila Jihova, Jihova kʼevu o kudikola kuenu, mba ku mi suua dingi.

⁴⁶ Kienhokio anga mu xikama bhu Kadexi ndumba dia izuua mukonda dia kienhiki, kala ki mua kʼijiia kiá.