Marku 4 - O Mikanda Ikola

Kifika kia mukuni a jimbutu

¹ Muéne anga u kuata dingi kulonga bhu mbandu ia kizanga kia Ngalileia. Anga bhu bhongoloka kifuxi kia dikota, katé muéne ua di longo mu bote, ua xikama ku menha, o kifuxi, kioso kiemana ku ngonguenha.

² Anga u a longa ima iavulu mu ifika; mu kulonga kué iu ua ambela, uixi:

³ Ivenu! Muthu umoxi, mukuni a jimbutu anga utunda, uia mu kukuua.

⁴ O kia kala mu ku kuua, jimoxi-mu ja sonokena bhu mbandu ia njila, o tunjila anga tuiza tu ji moma.

⁵ Jamukuá ja sonokena bhu ndánji, bhuala tumavu tuófele ngó. Kithangana anga ji sabhuka, mukonda mavu ma tolo-bho.

⁶ Kiatu o muanha-phe, ja lela, mukonda dia ku kamba jindanji, ja kukuta.

⁷ Jamukuá ja sonokena mu minha, o minha anga i kula, i bhaka o jimbutu mua vundu, anga ji tokoka kuima.

⁸ Jamukuá ja sonokena mu mavu mambote, anga jima ibundu, ji kula, ji sokoloka, jimoxi ji bhana makuinhi atatu, jimoxi makuinhi a samanu, jimoxi háma.

⁹ Anga ua ambela, uixi: Uoso uala ni mátui ma kuivila, évue.

Jezú u lombolola o kifika kia mukini a jimbutu

¹⁰ O kia kala ku ubheka, oso a di nhenge-né, kumoxi ni kuinhi ni kiiadi, a mu ibhula o ifika, exi: O kifikʼiki kiambe kiebhi?

¹¹ Muéne anga ua ambela, uixi: Enu Nzambi ua mi bhana o kuijiia ikutu ia Utuminu ué. Ió-phe, oso ala ku kanga, ima ioso a a tela-iu mu ifika.

¹² Phala kia tala a tale, maji a kambe kumona; ki evua, evue, maji a xite mu thulu; a fule kubiluluka kua Nzambi, o kituxi kiá nʼa ki loloke.

¹³ Anga ua ambela, uixi: Kífua o kifikʼiki, ki kia mi jimbulukila? Muanda kuijiia kiebhi o ifika ioso?

¹⁴ Mukuni a jimbutu, ió u kuua o maka ma Nzambi.

¹⁵ Oso-phe a a kuua bhu mbanduʼa njila, enhá, kia zubha kuívua maka, kithanganʼokio Satana uiza, u katula o maka oso a kuuile ku miẋima ia.

¹⁶ Oso a a kuua bhu ndanji ue, kiene; enhá ki evua maka, kithanganʼokio a ma tambulula ni ngalasa.

¹⁷ Kuma ka moneka jindanji-phe, a nanga ngo kathangana. O kʼiza o phaxi ni kuzukutisa mukonda dia maka, kindala a di bhale.

¹⁸ Sai amukuá a a kuu mu minha, enhá ki evua maka,

¹⁹ o jihele ja mundu iu, ni músendu ua jimbongo ni maluimbi ma ima iengi, ma bokona, anga ma bhaka o maka mua vundu, he ma tokoka kuima ibundu.

²⁰ Oso-phe a a kuu mu mavu ma mbote, enhá, ki evua maka, a ma tambulula kiambote, anga a bhana ibundu; bhu kala lumbundu lu bhana makuinhi atatu a jimbundu, lulu makuinhi-a-samanu, lulu hama.

Kifika kia kandeia

²¹ Jezú anga ua ambela dingi, uixi: Kífua kandeia ene ku ka uika ni ku ka vungina kitutu, mba a ka bhaka moxi a hama? Nga fika kana! Inda a ka tudika ku meza ni ka muikina kiambote mʼonzo.

²² Kuma kima kioso kiòfute, a ki futila o kuvulumuka; kima kiòsueke, a ki suekela o kutukuluka,

²³ Se bhuala muthu uala ni matui ma kuivila, evue.

²⁴ Anga ua ambela dingi, uixi: Alukenu kioso ki muívua: kuma o nzongo ioso i mu zonga na-iu phala akuenu, enu uenu iene Nzambi ia mi zongela; anga a mi tela-ku dingi.

²⁵ Kuma uoso uala, muene a mu bhana dingi; uoso-phe kala, ni kofele kaka kala na-ku a mu tambula-ku.

Kifika kia mbutu

²⁶ Ngana Jezú uixi: Kienhiki o Utuminu ua Nzambi uedi kala muthu u ta mbutu mu mavu.

²⁷ Anga u zeka, u balumuka, ngoloxi ni kimene, o mbutu-phe kioso ki i sabhuka, ki i kula, muene ka kʼijiia.

²⁸ O mavu a di imina ene, ku dianga o kixina, kuiza o disa, he ku kaiela o jimbundu jadisanze ku disa.

²⁹ O kibundu-phe ki kia-nda kúbhia, kithanganʼokio u sunga kibhôlola, kuma thembu ia bhixila ia tokala o kumuna.

Kifika kia lumbundu lua mustarda

³⁰ Uixi: O Utuminu ua Nzambi tu u fika kiebhi? Tu u lombolola ni kixanga kiahi?

³¹ Ua di fangana ni lumbundu lua mbutu ia mustarda, kia lu kuua mu mavu, sumbala luala ndengiʼèlele ku jimbutu joso mu ngongo.

³² O kia lu kuua, lu sabhuka, anga lu kala kota mu ku kula, idima ioso ndenge. Lu bhana jithangu, o jinjila ji bhita bhulu anga ji tula mu jithangu je, anga jibhanga ikalanga mu kilembeketa kie.

³³ Anga u a tela maka mu ifika iavulu kala iíi, kioso kia tena ene kuívua.

³⁴ Ka a tangela kima se kifika. Maji ku ubheka, jixibulu je u a lomboluela jinga ima ioso.

Jezú u bateka o mabhuku

³⁵ Kizuua kienhókio, kutula mu ngoloxi, Jezú ua ambela, uixi: Tu zaukienu ku sambua dia kizanga.

³⁶ Ene anga a sulula o mundu, a xa o kifuẋi, he a di longa mu bote muala Jezú, anga aia-nê. Ni jibote jamukua jala-bhu, ji ila-nâ kumoxi.

³⁷ Ku musanza anga ku balumuka kitembu kia suina, mabhuku ma kala mu ku di lukula mu bote, o iene i sota kuizala ni menha.

³⁸ Muene-phe, ku dizulu dia bote, ua zeka ku phetu, uaii ku kilu. Anga eza ku mu tonesa, exi: Mesene, kífua ki ki ku kuatela kima? Tuanda kufua!

³⁹ Muene anga u tona, u kidika o kitembu, he u ambela o menha, uixi: Batamenu mu dixibhe! Kitembu anga ki batama, kuma ku kala kutululuka kua nzungule.

⁴⁰ Anga ua ambela, uixi: Mualela-hi ni uoma kiki? Kífua kiluua mu xikana?

⁴¹ Uôma anga u a kuata kiavulu, a di ambela mudia, exi: Mukua-hi muene u kala kiki, u bhinga ni kitembu ni mabhuku ma mu belesela?