Marku 3 - O Mikanda Ikola

Muthu ua kukuta o lukuaku a mu saka

¹ Muene anga u bokona dingi mu dilombe dia kusambela Nzambi, anga mu kala muthu ua kukuta o lukuaku.

² Ene anga a kala ku mu tonginina mba u mu saka kia sabhalu, phala a mu tatele.

³ Anga u ambela o muthu ua kukuta lukuaku uixi: Imana bhu ʼaxaxiʼabha.

⁴ Anga ua ambela, uixi: O sabhalu a i tange kiebhi mu Kitumu kietu? Kia kidi o kubhanga mbote kia sabhalu, inga kidi o kubhanga phulu? O kubhulula muenhu, inga o kujibha. Ene-phe a di xibha. Ki bhuala muthu ua vutula kima.

⁵ Muene ua exi suí, ene oso, ni dilamba ni njinda, mukonda kia mu iibhila o kukola kua kua muẋima, mbata nguâ-uâ ku tongolola, nʼejiie. Anga u ambela o diiala: Sunununa lukuaku. Muene kia lu sunununa, lukuaku lue lua disanze kala lua mukua.

⁶ Jifalizeu anga a tunda, kithanganʼ okio a mu tela kionge kumoxi ni akua Helode, mbe kumona kioso kia bhanga phala ku mu jibha.

Jezú u saka jihaxi jamukua

⁷ Jezú-phe u tunda bhenhobho ni jixibulu je, he uia ku kizanga kia Ngalileia. He kifuẋi kiavulu kia akua Ngalileia a mu kaiela, ni ku Judeia,

⁸ ni ku Jeluzaleme, ni ku Idumeia, ni ku sambua dia Njoloda, ni ku akua Tilu ni Sidonia. Kifuẋi kia dikota, ki evu imbamba iala kubhanga Jezú, eza he a mu sanga.

⁹ Muene anga u ambela jixibulu je ku mu sotela bote mu a di longa jinga, mukonda dia kifuẋi ku mu bhaka bhu ʼaxaxi.

¹⁰ Kuma ua sakula mundu uavulu, kia bhangesa athu ku mu phopheka, mukonda oso ala ni mabhebhu a-lu sota ku mu kuata.

¹¹ Ni oso ala ni jinzumbi ja xidi, kia mu mona, a di bhala bhu pholo ie ni kudikola, exi: Eie, Ngana, u Monʼa Nzambi!

¹² Jezú muene anga nzumbi ja xidi u ji kidika kiavulu phala ka mu tange.

Jezú u sola kuinhi dia Poxolo ni kiiadi

¹³ Anga Jezú u banda ku mulundu, he u tuma kuixana oso a mesena muene; anga a mu sanga.

¹⁴ Anga u sola kuinhi ni kiiadi oso a-ndu kala-nâ, ni ku a tuma mu kuboka o Njimbu ia Ubhulukilu. Anga o kuinhi ni kiiadi dienhidi u a luka uixi: Jipoxolo.

¹⁵ He ua a bhana o kusaka mahaxi ni kutundisa o madimonho.

¹⁶ O kuinhi ni kiiadi enhá: Ximá, a mu luku dingi dijina dia Phetele;

¹⁷ Ni Tiiaku, monʼa Zebedeu, ni Nzuá pange Tiiaku; enhá ua a luka dingi dijina dia Beneleje, dijina dia kuila: Anʼa Kinuminu kia Nzaji;

¹⁸ ni Mandele, ni Felipe, ni Matulu, ni Matesu, ni Tomé, ni Tiiaku dia Lufeu, ni Tadeu ni Ximá mukua Kanana

¹⁹ ni Juda mukua Kadiota, u mu thelekala.

Asoneki a tanga kisunji

²⁰ Anga u bokona mʼonzo, o kifuxi anga ki bhongoloka katé ni muéne ni maxibulu mé ka tenene ngó kúdia.

²¹ O jindandu jé kia zubha ku kʼivua, aia ku mu kuata, mukonda, exi: Ua tekuka.

²² O jimesene ja kulonga Kitumuphe, a tundu mu Jeluzaleme, exi: Uala ni Belezebubu, kota dia madimonho. O kota dia madimonho muéne ua mu bhana nguzu ia mu lendesa kutundisa o madimonho.

²³ Muéne anga ua exana, hé ua tela ifika, uixi: Kífua Satana u di kaia muéne Satana?

²⁴ Kilombo kia sobha se kia di lungulukila ene mudiá, kilombo kiókio ki ki nange ku di muanga.

²⁵ Ni akua bhata se a di lungulukila ene mudiá, dibhata diodio ki di tena kutunga.

²⁶ O ki kala Satana ua di kitukila muéne, iu ua muangana, ka tena kunanga, sai kiá bhua suka.

²⁷ Muthu-phe kubokona mʼonzo ia dizonda, ni ku mu bhunda o dibhata, kikale u dianga kukuta o dizonda, nʼa bhûnde kiua o dibhata.

²⁸ Ngi mi ambela kidi, anʼathu ituxi iá ioso a a loloka-iu, ni maxongo moso ma ẋongona na-u.

²⁹ Uoso-phe u ẋonguena o Nzumbi Ikóla, ki kuene dingi ku mu loloka, maji kituxi kié ki xalela.

³⁰ Mukonda ene a mu ambe exi: Muéne uala ni nzumbi iaxidi.

O jindandu ja Jezú

³¹ Mamʼá ni jiphange jé anga eza, emana bhu kanga, hé a tuma ku mu ixana.

³² O kifuẋi kia xikama kia mu bhake bhuʼaxaxi, anga a mu ambela, exi: Talesa, mamʼenu ni jiphange jé iá bhu kanga, ala ku ku sota.

³³ Kuala muéne: Mamʼetu nanhi? O pange jami akua-hi?

³⁴ Muéne bhenhobho ua tonginina oso a mu kondoloka ni kuxikama, uixi: Talesenu mamʼetu ni jiphange jami!

³⁵ Kuma uoso u bhanga vondadi ia Nzambi, muéne phange iami ia diiala, muéne phange iami ia muhatu, muéne mamʼetu.