Marku 2 - O Mikanda Ikola

Haxi ia kila mu Kafanau

¹ Kia bhiti tuʼizuua, Jezú ua bokona dingi mu Kafanau anga ki fumana kuma iú monzo.

² Mundu anga u bhongoloka katé mʼonzo muezala ni bhu kanga, ka mono dingi kididi. Muéne kia kala mu longa maka,

³ a mu bhekela haxi ia kila, a mu ambata kuala kiuana.

⁴ O ki a sange kuila ka tena ku mu bhixila mukonda dia mundu, a muanga onzo kuthandu bhuoso bhuemana Muéne; o ki a zubha kubhanga dizungu, muanza bhuala mu katela o haxi ia kila, a u zoza ni mikolo.

⁵ Jezú kia mono o kuxikana kuá, u ambela o haxi ia kila, uixi: Mona, ituxi ié ióloloke.

⁶ Bhu kala-phe amoxi ku jimesene ja kulonga Kitumu, a xikama bhenhobho, a kuata ku longolola ku muẋima, exi:

⁷ Ialʼú uala ku tangela-hi kisunji kiki? Muthu iú ua mu ẋonguena Nzambi! Ua tena ku loloka ituxi, mukua-hi? Ki Nzambi ngó!

⁸ Kithanganʼokio Jezú kuma uevu ku muẋima ué ioso iala mu banza ene, uixi: Enu mu xinganekena-hi kienhókio?

⁹ Kiebhi kia uabha-bhu ku ki bhanga? O kuambela haxi ia kila kuila, ituxi ié ióloloke? Inga kuila: zangula muanza ué, uie ni kuenda?

¹⁰ Phala-phe mu kʼijjie kuma Eme ngi Monʼa Muthu ngala ni ungana mu ngongo ua kuloloka ituxi, eie u haxi ia kila:

¹¹ Nga ku tumu kubalumuka, u zangule muanza ué, uie ku bhata.

¹² Muéne anga u balumuka, kithanganʼokio, u zangula muanza, anga u tubhuka bhu pholo ia ene oso. Ene oso anga a diuana, hé a ximana Nzambi, exi: Kienhiki kiluua tu ki mona.

Levi a mu ixana

¹³ Muéne anga u tunda lua mukuá, hé uia bhu mbandu ia kizanga kia Ngalileia. O mundu uoso anga u mu bhongolokela koko, hé u a longa enhoso.

¹⁴ O kia kala mu kubhita, u mona Levi, monʼa Lufeu, ua xikama bhu kididi kia kutambuila o lubhaku, anga u mu ambela, uixi: Ngi kaiele eme. Muéne anga u balumuka, u mu kaiela.

¹⁵ Anga ki bhita kuma Jezú ni maxibulu mé kia xikama ku meza mu kúdia mʼonzo ia Levi, bhu kala akua kutambula lubhaku avulu, ni akua ituxi, a xikama kumoxi ni Jezú ni jixibulu jé. Kuma mundu uavulu a mu nhenganana.

¹⁶ Asoneki-phe ni jifalizeu, kia mu mono kúdia kumoxi ni akua ituxi ni akua kutambula lubhaku, ambela jixibulu jé, exi: Muéne u tena kiebhi kúdia ni kúnua kumoxi ni akua kutambula lubhaku ni akua ituxi?

¹⁷ Jezú kia zubha ku kʼivua, uixi: Athu a disanze ki ene a bhindamena o kimbanda; kikale o jihaxi. Athu ue aiuka, ki ene u ngeza mu ku a exana kudiela, maji akua ituxi.

O ku jejuuala

¹⁸ O jixibulu ja Nzuá ni jifalizeu anga a kala mu jila. Athu amukuá anga eza kua Jezú, exi: Phala-hi jixibulu ja Nzuá ni jixibulu ja jifaliezu ji jila, eie-phe jixibulu je ki jene kujila?

¹⁹ Jezú anga ua ambela, uixi: Kífua enu mua fika kuila anʼa sala ia ukaza, a jila kioso ki ala hanji ni ʼNa iala? Kithangana ki ala hanji ni ʼNa iala, ki ki xikina kujila.

²⁰ Izuua ií iiza-phe, ʼNa iala, a ka a tambula-nê, kizuuʼokio kiene kia jila.

²¹ Kana muthu u banda kitetele kiòbhe ku dikoza diokulu. Se u ki bhanga, o kitetele kiôbhe kiambe kuxita dizungu, ki kianda ku di xibha; kiene ki nomona ku dikoza, anga di tanduka dingi kiaiibha.

²² Kana muthu ue u ta vinhu ia uisu mu isudi iokulu; se u ki bhanga, o ibha iokulu i baza, o vinhu anga i texika, ni isudi iene izangiua. Kiene kia bhekesa kuila o vinhu ia uisu-phe a i ta mu isudi iobhe.

Jezú Ngana ia Sábhalu

²³ Anga ki bhita kuma, Jezú ni maxibulu mê a kala mu bhita mu mábhia ma masa mu kizuua kia sabhalu. Jixibulu anga ji kuata kubukula tu masa.

²⁴ Kuala jifalizeu: Talesa, phalahi maxibulu mê a bhanga kimbamba kia kutondala o Kitumu, ku ki bhanga mu sabhalu?

²⁵ Muene ua ambela, uixi: Kífua kiluua enu mu tanga kia bhangele Davidi, kia tatele ni nzala, ni muene ni akua a di nhengene-nê?

²⁶ Mukonda muene ua bokuene mʼonzo ia Nzambi, mu izuua ia Abiiatale, nganga ia dikota, anga u dia o jimbolo ja bhakela Nzambi, ki ji mu tokala muene ku ji dia, jangene ja jinganga, akua ue a di nhengene-nê anga u a bhana-ku?

²⁷ Anga Jezú ua ambela, uixi: O sabhalu a i bhangela o muthu; muthu ka mu bhangela o sabhalu.

²⁸ Uila kiki, o Monʼa Muthu uala ue Ngana kate ni ia sabhalu.