Marku 1 - O Mikanda Ikola

Nzuá dia Batizu

¹ O njimbu iambote ia Jezú Kristu, monʼa Nzambi, ia mateka.

² Kala kia ki soneka mua polofeta Izaia, exi: Nzambi uambe: Talesa, ngi tuma mukunji uami ku pholo ié, u ku iudikila o njila;

³ u kala dízui di di kola mu ditutu, kuila: Iudikenu njila ia Ngana, iukisenu o ikoka ié ia ku bhitila.

⁴ Kienhiki Nzuá dia Batizu kia tukuluka mu ditutu, hé u kala mu batizala o mundu ni kukola o batizu ia kudiela kubhekela o muloloko ua ituxi, uixi: Ambulenu o ituxi ienu, nda a mi batizale, o Nzambi ni a mi loloke.

⁵ O athu a tungu mu ixi ioso ia Judeia anga a tunda ku mu sanga, ni akua Jeluzaleme, muéne anga u a batizala mu ngiji ia Njolodá, kioso ene ki aia ni kufisala o ituxi iá.

⁶ O Nzuá muéne ua zuata ndemba ja kamelu, ua di kutu phonda ia kibha mu mbunda, u dia mahoho ni uiki ua ditutu.

⁷ Anga u kala mu tangela o mundu, uixi: Ku dima diami, ku kuiza muthu ua ngi tundu. Eme ku mu bhetamena ngó ni ngi mu jituina o mbaia ia haii jé ki kia ngi fuama.

⁸ Eme nga mi batizala ni menha, muéne-phe ua ká mi batizala ni Nzumbi Ikóla.

Jezú kia mu batizala, ni kia mu thendala

⁹ Anga ki bhita mu izuʼomo kuma Jezú u tunda ku Nazalé, ku Ngalileia, anga a mu batizala kuala Nzuá mu ngiji ia Njoloda.

¹⁰ Kithangana kia kala mu zauka ku menha, Jezú ua mono ku diulu kua jikuka, ni Nzumbi iedi kala diembe, iala mu tuluka ku thandu die.

¹¹ Anga dízui di tunda ku diulu, dixi: Eie-muene u Monʼami nga ku zola, ua ngi uabhela kiambote.

O tendasá ia Jezú

¹² Kithangana o Nzumbi i mu takula ku ditutu.

¹³ Anga u kala kuenhoko, ku ditutu, makuinhi auana a izuua, ni ku mu thendala kuala Satana. He u kala kumoxi mi iama, maji o ji-anju ji kala mu ku mu langidila.

Jipoxolo ja dianga ku jixana

¹⁴ Kia zubha Nzuá ku mu ta mu ʼaleia, Jezú uiza ku Ngalileia ni kutanga o maka ma Njimbu Iambote ia tundu kua Nzambi, uixi:

¹⁵ O thembu ia tenena kia, Utuminu ua Nzambi ua zukama. Dielenu o ituxi ienu, mu xikane o Njimbu Iambote i mi bhana o kubhuluka.

¹⁶ O kia kexi kubhita bhu mbandu ia kizanga kia Ngalileia, u mona Ximá, ni Mandele, phange ia Ximá, ala mu ta uanda mu menha, kuma atona a jimbiji.

¹⁷ Jezú ua ambela, uixi: Ngi kaiedienu eme, ngi mi bhange mu kala mu atona a athu.

¹⁸ Ene kithanganʼokio a xa o manda, anga a mu kaiela.

¹⁹ Kuenda-ku dingi kadikanga, u mona Tiiaku monʼa Zebedeu, ni phangʼiê Nzuá, ala ue mu bote mu banda o manda.

²⁰ Kithanganʼokio Jezú kiiadi kia u a exana. Ene anga a xa tatʼâ Zebedeu mu bote, ni jingunza ja sedivisu, anga a mu kaiela.

Dilaji dia Kafanau a mu saka

²¹ Anga aia ku Kafanau. Kithanganʼokio, kuma kia sabhalu, Jezú u bokona mʼonzo ia dibhezelu dia Nzambi, anga u kala mu longa.

²² Athu anga a diuana ulongelu ue. Kuma ua a longo ni ungana, o ulongelu ua asoneki uengi.

²³ Kithanganʼokio mu dilombe dia mu kala diiala uala ni nzumbi iaxidi. Muene iu ua di kola, uixi:

²⁴ Etu tua kuata-hi ni eie Ngana, u Jezú dia Nzalae? Kífua eie ueza ku tu muanga? Eme nga ku ijiia muene kiambote! Eie u Muthu Ukola a ku tumikisa kuala Nzambi.

²⁵ Jezú anga u mu bazela, uixi: Dixibhe, u tunde mu mukutu ue!

²⁶ O nzumbi iaxidi anga i mu vunda bhoxi, i mu sanhesa, anga i di kola ni dízui dia suina, he i tunda mu mukutu ue.

²⁷ Ene oso anga a diuana, a kuata ku dibhudisa mudia, exi: Kueza-hi? Ulongelu uengi, kuambe! Muene u tumina ni ungana, kate ni jinzumbi jaxidi ji mu tumaka.

²⁸ O fuma ia Jezú kithanganʼokio anga i sambuka mikau ioso mʼoxi ioio ia Ngalileia.

Ukôuʼ a Phetele a mu saka

²⁹ Kithanganʼokio, Jezú ni maxibulu mê kia zubha kutunda mu dilombe dia ku sambela Nzambi, a bokona mʼonzo ia Ximá ni Mandele, kumoxi ni Tiiaku ni Nzuá.

³⁰ Ukouʼa Ximá ua muhatu ua kexi kukata febele. O kia bhixila Jezú, kithanganʼokio, a mu tangela-kiu.

³¹ Muene anga uiza, u mu kuata lukuaku, u mu bhetula; o febele anga i mu xa, he u kala mu ku a sedivila.

Jezú u saka dingi haxi javulu, he uia ku Ngalileia

³² Mu ngoloxi, kia tula o dikumbi, a mu bhekela jihaxi joso jala kukata, ni ia a saluka ni madimonho.

³³ O mbonge ioso anga i bhongoloka bhu kanga dia ʼnzo mua kexi Jezú.

³⁴ Muene anga u saka avulu a kate mahaxi moso-moso, u tundisa madimonho mavulu. O madimonho-phe Jezú ka ehela kuzuela, mukonda a mu ijiia.

Jezú ni njimbu iambote

³⁵ Mu kimene-phe, kuila kuma hanji kua vundu, ua di meneka mu iangu mu kusamba.

³⁶ Ni Ximá ni akua anga a kala ku mu sota ku mbandu joso.

³⁷ O kia mu sange, exi: Ene oso Ngana, iá a ku sota.

³⁸ Muene-phe ua ambela, uixi: Tuienu kuengi, ku jisanzala jamukuá, nga ká tange-ku maka; kuma kiene kia ngi bheka.

³⁹ Anga uia ku Ngalileia ioso ni kutanga maka ma Njimbu Iambote mu malombe má, ni kutundisa o madimonho.

Jezú u saka mukua dibhute

⁴⁰ Anga kuiza mukua dibhute ni kudionda, ni ku mu fukamena, uixi: Se eie Ngana, uambe ku ki bhanga, ua ki soko, o ku ngi bhana kudisanza.

⁴¹ Jezú-phe, kuma henda ia mu kuata, ua sunununa lúkuaku lué, hé u mu babata, uixi: Nga mesena! Ngi ki bhanga muene; disanze!

⁴² Kithanganʼokio o dibhute di mu xa, anga u disanza.

⁴³ Muéne anga u mu kusa, kithanganʼokio, u mu tundisa, uixi:

⁴⁴ Aiuka, ku ki zuele ni muthu uoso-uoso; ndeie-phe kua nganga, ua ká dʼidikize, o muéne a ku kengelele mukutu ué. Kienhókio ka ká bhakule mu kudisanza kué o sata ioso ia tumine Mozé, phala ene a ki tambule umbangi, kuila eie uadisanze.

⁴⁵ Maji muéne-phe kia zubha kutunda-bhu, u kuata ku ki fumanesa, ni ku ki bhela jingolokela kuene kuoso; kia bhangesa kuila Jezú ka tenene kubokona dingi mu mbonge ioso-ioso, maji u kala mu tula ku kanga ku mikáu. Athu anga aia ni kutunda ku mbandu joso, a mu sanga koko.