Makatukilu 39 - O Mikanda Ikola

Kioso kia bhanga o izuatu ia Jinganga

¹ O jingoji ja azulu, ni púlupula, ni kalumezim a iudika na-ju izuatu iótunge uhete, ia kusedivila na-iu mu kididi kikôla, iene izuatu iangene ia Alá; kala kia tumu Jihova kua Mozé.

² Ua iudika efodi ni ulu, ni azulu, ni púlupula, ni kalumezim, ni linhu ia fina ioxise.

³ O ulu a dianga ku u sula ibasakasa ia fina, anga a u batujila kala jingoji ji ẋikina ku ji tungila kumoxi ni ja azulu, ni ja púlupula, ni ja kalumezim ni linhu ia fina, uhete ua ufunu ua mesene ia mulongo.

⁴ A i iudika ni jiphakatela jê ji bhita bhu isuxi, phala kutakanesa efodi ku thulu ni ku kunda.

⁵ Ni phonda iê iauabha ia ku i kutila ku mukutu, i kala iene imoxi ni efodi iene, ufunu uê uene umoxi, ua ulu uólunge ni azulu, ni púlupula, ni kalumezim, ni linhu ia fina iòuinde; kala kia tumu Jihova kua Mozé.

⁶ Anga a iudika matadi ma onixe a a sokeka mu makuatelu a ulu, a a seta kala ki ene kuseta o sineta, a seta-ku o majina ma anʼa Izalaiele.

⁷ Eneʼá anga u ma jika ku jiphakatela ja efodi bhu isuxi, phala a kale matadi ma kulembalesa anʼa Izalaiele; kala kia tumu Jihova kua Mozé.

⁸ Anga u iudika ue muxila, uòbhange ni uhete ua ufunu ua mesene ia mulongo, ufunu uene umoxi ni ua efodi; ua tungu kumoxi ni ulu, ni azulu, ni púlupula, ni kalumezim, ni linhu ia fina ioxise.

⁹ Mbandu jê jiuana ja sokela kumoxi, o muxila uene a u budika mu luiadi; kulebha kuê palma ia kànda dia lukuaku, kuzanza kuê palma ia kànda dia lukuaku.

¹⁰ Anga a sokeka ku thandu diê mikalatata iuana ia matadi; mukalatata ua sárdio, ni topáziu, ni kalubunkulu, uene o mukalatata ua kamoxi;

¹¹ ua kaiadi uambata esmeralda, ni safira, ni diiamande;

¹² ua katatu uambata jasindu, ni ángata, ni ametista;

¹³ ua kauana uambata turkeza, ni sardónika, ni jaspe; ene oso a a sokeka mu makuatelu ma ulu.

¹⁴ Matadi a ma sokesa ni majina ma anʼa Izalaiele, kuinhi dia ditadi ni kiiadi; majina a ma seta kala kuseta kua sineta, kala muiji ni dijina diê, kala muiji ni dijina diê, kuinhi dia miji ni kiiadi.

¹⁵ Ku muxila a iudikila-ku malubhambu ma ulu uóxise kala jingoji, ulu uê ua fina muene.

¹⁶ A iudika ue makuatelu maiadi ma ulu, ni malenge maiadi ma ulu, phala o muxila; malenge eneʼá a ma ta ku jipondo ja muxila ja thandu.

¹⁷ O malubhambu maiadiʼama ma ulu uóxise kala jingoji, a ma ta mu malenge maiadi mala ku jipondo ja muxila ja thandu.

¹⁸ O jipondo ja mukuá ja malubhambu maiadi ma ulu uóxise, ja kuata ni jingôua mu jiphakatela ja efodi ja tundu bhu isuxi, ku pholo.

¹⁹ Anga a iudika dingi malenge maiadi ma ulu, a ma ta ku jipondo ja muxila ja suku bhoxi, ku muhuhu ua zukamena ku efodi moxi.

²⁰ A iudika ue malenge maiadi ma ulu, a ma ta ku jiphakatela jiiadi ja efodi ja tundu bhu isuxi, bhua takanena o jiphakatela ni phonda ia uabha ia efodi.

²¹ Muxila-phe ni malenge mê ma bhoxi, ni malenge mala ku efodi, a ma kutila kumoxi ni ngoji ia azulu, phala muxila u kuate ku phonda ia uabha ia efodi, ka i katula dingi ku efodi; kala kia tumu Jihova kua Mozé.

²² Anga u iudika o divunga dia efodi, diótunge ku mulongo, azulu ioso;

²³ ia a di kubula dizungu mu kaẋi mu bhita o mútue; dizungu a di kondoluesa ngola ia jinjikita, kala ngola ia kibhakatu kia ita, phala ki di tandujuke.

²⁴ Ku muxiku ua divunga bhoxi, ua kembesa-ku ni jibola ja azulu, ni púlupula, ni kalmezim, ni linhu ia fina iòuinde.

²⁵ Anga a iudika ue ni manzuela ma ulu ua fina; a a lungisa kumoxi ni mábhole ku muxiku ua divunga katé a kondoloka;

²⁶ aii ni kuila dinzuela-bhu, dibhole-bhu, dinzuela-bhu, dibhole-bhu, katé muxiku uoso ua divunga ua takana, O divunga dia kusedivila ku unganga; kala kia tumu Jihova kua Mozé.

²⁷ A iudika ue ni jimbinza ja linhu ia fina, jótunge ku mulongo, ja Alá ni anʼê,

²⁸ ni kijinga kia linhu ia fina, ni jiboné ja uabha ja linhu ia fina, ni jikalasá ja linhu ia fina iòuinde.

²⁹ Ni phonda ia linhu ia fina iòxise, ni jinjikita jê ja azulu, ni púlupula, ni kalumezim; ufunu ua mesene ia mulongo, kala kia lekelela Jihova kua Mozé.

³⁰ Anga a iudika xapa ia ulu ua fina, ia kitundu kikôla, anga a seta-ku, mukua ni kuseta kua sineta exi: O Kuzela Kukola Kua Jihova.

³¹ Anga a i ta ni fita ia azulu, a i kutila ku kijinga ku pholo; kala kia tumu Jihova kua Mozé.

O kutenesa o imbamba ia Balaka

³² Kienhiki kia zubha o sedivisu ioso ia kibuta kia balaka ia ditakanenu; o anʼa Izalaiele a kumbidila kioso kia tumu Jihova kua Mozé, kiene muene kia bhange.

³³ Anga a bheka o balaka kua Mozé, ni balaka ia ditakanenu ni imbamba iê ioso, ni jikoloxete, ni mabaia a jingunji, ni mikangala iê, ni jiphiladi, ni ibaka iê,

³⁴ ni divunga dia ibha ia ilumbe ia jimbudi ióteke ikusuka, ni divunga dia ibha ia kiama kia menha, ni dibeka dia kibatulu;

³⁵ ni álaka ia umbangi, ni mikambu iê, ni kibhuna kia kiadi;

³⁶ ni meza, ni malonga mê, ni jimbolo ja kilumbu;

³⁷ ni kandeia kazela, ni jilâmbada jê, ni jilâmbada ja mutendelelu, kioso ki ja tokala ku ji ta ku kandeia, ni maji mê ma kusendela;

³⁸ ni kalatódio ka ulu, ni maji ma kuundila, ni isenso ia uasu ua uabha dizumba, ni dibeka dia muelu ua balaka;

³⁹ ni kalatódio ka ngôndo, ni kiseselu kiê kia ngôndo, kila kala uanda, ni mikambu iê ni imbamba iê ioso, ni mbasinha ia ku di sukuila, ni mbunda iê i tula bhoxi;

⁴⁰ ni jikulutina ja kithâdi, ni jiphiladi jê, ni ibaka iê, ni dibeka dia kuxita bhu muelu ua kithâdi, ni mikolo iê, ni jiphapha jê, ni imbamba ioso ia sedivisu ia balaka, ku balaka ia kutakanena;

⁴¹ ni izuatu iótunge uhete ia kubhikila na-iu mu kididi kikôla, izuatu iangene ia Alá, nganga, ni izuatu ia anʼê, ia kukalakela na-iu ku unganga.

⁴² Kioso kia tumu Jihova kua Mozé, kiene muene kia kumbidila anʼa Izalaiele mu kikalakalu kioso.

⁴³ Mozé kia tale o kikalakalu kioso, ua mono kuma a ki kalakala muene; kioso kia tumu Jihova, kiene muene kia bhange. Bhenhobho Mozé anga u a benzela.