Makatukilu 36 - O Mikanda Ikola

¹ Kienhiki Bezalele ni Aholiiabe, o jimesene, kia kalakala ni akuâ, oso a undu ni uhete kuala Jihova, mu ufunu ua kuiudika imbamba ioso ia dibhezelu, kala kioso kia i tumu Jihova.

O mundu a bheka maujitu andumba

² Mozé anga u ixana Bezalele ni Aholiiabe, ni jihete joso ja muxima oso Jihova ua undu ni uhete, oso o miẋima iâ ue ia a tumu kuiza ku kikalakalu phala nʼa ki bhange.

³ Eneʼá anga a tambula kua Mozé ujitu uoso ua bheka anʼa Izalaiele, o ima ia kuiudika imbamba ioso ia dibhezelu. Ene hanji-phe enda ni ku mu bhekela maujitu ma vondadi izuua ioso mu kimene.

⁴ Jihete jala mu kalakala ufunu uoso ua dibhezelu, anga a tunda ku sedikvisu iâ.

⁵ Eza kua Mozé, exi: Ima iala kubheka o mundu phala ufunu uoso ua dibhezelu kala kia tumu Jihova, iavulu kiá, kuabhu!

⁶ Mozé anga u tuma kuxikisa ngonge mu kibangu kioso, uixi: Né diiala, né muhatu, kana muthu u bheka dingi imbamba ia kikalakalu kia dibhezelu. Kienʼiki kia fudisa o mundu kubheka dingi imbamba.

⁷ Kuma imbamba ia thungu, ia soko mu kikalakalu kioso kia-nda kubhanga, anga i subhuka.

Kioso kia tunga o Balaka

⁸ Kala kiki o jihete joso ja muxima eza ku kalakala, a tunga o balaka ni kuinhi diê dia kulutina; a iudika ni linhu ia fina ioxise, ni jingoji ja azulu, ni ja púlupula, ni ja kalumezim, a ta-ku ni jixelube, ufunu ua mesene ia mulongo; iene ioso, Bezalele ua i iudikisa.

⁹ Kulutina imoxi kulebha kuê makuinhi aiadi a kóvadu ni nake, o bhu lubongo kôvadu jiuana; mbongo joso midila imoxi.

¹⁰ Mbongo jitanu a ji tungila kumoxi, kifua thanga; mbongo jitanu a ji tungila kumoxi, kifua thanga ia mukuá.

¹¹ Anga u iudika mazanzu ma azulu ku muhuhu ua suku ku kanga ku thanga imoxi, ni ku muhuhu ua suku ku kanga ku thanga ia mukuá.

¹² Makuinhi atanu a mazanzu ku thanga imoxi, ni makuinhi atanu ku thanga ia mukuá; mazanzu ma di lulama mudiâ.

¹³ Anga u iudika ue makuinhi atanu a koloxete ja ulu, u takanesa kumoxi jithanga ja jikulutina ni jikoloxete; balaka ioso anga i kala imoxi.

¹⁴ Anga u iudika ue ni jikulutina ja ndemba ja jihombo, ji kale thanga ia kubhitisa ku thandu dia balaka; anga a ji iudika kuinhi dia mbongo ni mbongo imoxi.

¹⁵ Mbongo imoxi i kala makuinhi atatu a kóvadu mu kulebha, o bhu lubongo kôvadu jiuana; kuinhi dia mbongo ni mbongo imoxi jene joso ji kala midila imoxi.

¹⁶ Mbongo jitanu u ji tungila kumoxi, kifua thanga; mbongo jisamanu u ji tungila kumoxi, o thanga ia mukuâ.

¹⁷ Anga u iudika makuinhi atanu a mazanzu ku muhuhu ua suku ku kanga ku thanga imoxi, ni makuinhi atanu a mazanzu ku muhuhu ua suku ku kanga ku thanga ia mukuá.

¹⁸ Anga u iudika ue makuinhi atanu a koloxete ja ngôndo, phala kutakanesa o jithanga kumoxi, phala o balaka i kale iene imoxi.

¹⁹ Anga u iudika divunga dia balaka, dia ibha ia ilumbe ia jimbudi ióteke ni husu ii ia kusuka, ni divunnga dia mukuá ibha ia kiama kia menha diene dia suku ku thandu.

²⁰ Anga a iudika o mabaia ma jingunhi ja balaka ja muẋi ua xitimi, anga u ji imika.

²¹ O mabaia iâ kulebha kuê kuinhi dia kôvadu, o kuzanza kuê kala dibaia kôvadu ni kaxaxi.

²² Kala dibaia di kala ni inama iiadi bhoxi, o dibaia dia kuata ni mikangala; kiene kia iudika o mabaia oso a balaka.

²³ O mu ku iudika o mabaia iâ a balaka, a iudika makuinhi aiadi a dibaia ku mbandu i bhana ku sulu.

²⁴ A iudika ue makuinhi auana a ibaka ia phalata, i kala bhoxi dia makuinhi aiadi a dibaia, ibaka iiadi i kala ni mazungu i kala bhoxi dia dibaia dimoxi mu kuatela inama iê iiadi, ni mabaia a mukuá ue kiene.

²⁵ Mbandu ia kaiadi ia balaka i bana ku suku, a i iudikila ue makuinhi aiadi a dibaia,

²⁶ ni makuinhi auana a ibaka ia phalata; dibaia ni ibaka iê iiadi, dibaia ni ibaka iê iiadi.

²⁷ Mbandu ia balaka ia xilu, i bhana ku mutudila-kumbi, a i iudikila mabaia a samanu.

²⁸ Anga a iudika mabaia aiadi a jithungi ku xilu, mbandu jene kiiadi kiâ.

²⁹ O mabaia aiadi iâ a a sokeka kumoxi tunde bhoxi katé bhulu bhua a kuatesela ni delenge; kienhiki kiene kia bhange ku mabaia oso a thungi jiiadi.

³⁰ Nake dioso dia mabaia ni ibaka iâ ia phalata, kuinhi dia ibaka ni kisamanu; kala dibaia ibaka iê iiadi.

³¹ Anga a iudika ni mnikangala ia muii ua xitimi; mikangala itanu ia kukuata mabaia ku mbandu imoxi ia balaka,

³² mikangala itanu ia kukuata mabaia ku mbandu ia mukuá ia balaka, mikangala itanu ia kukuata mbaia a xilu mbandu ia bhana ku mufila-kumbi.

³³ A bhitisa ue mukangala mu kaẋi ka mabaia tunde ku thungi iii katé ku thungi ia mukuá.

³⁴ O mabaia ua a folala ulu, malenge mê ma kala ma ulu, mu bhitila o mikangala, ni mikangala iene u i folala ue ulu.

Kibatulu, ni jiphiladi

³⁵ Anga a iudika kibatulu kia azulu, ni púlupula, ni kalumezim, ni linhu ia fina ioxise; ku kala ni jixelube, ufunu ua mesene ia mulongo.

³⁶ A iudika ni philadi jê jiuana ja múẋi ua xitimi, a ji folala ni ulu; ni jikoloxete jê ja ulu; anga u iẋika ni ibaka iê iuana ia phalata i kala bhoxi.

³⁷ A iudika ue dibeka dia kuxita bhu muelu ua balaka, di kala dia azulu, ni púlupula, ni kalumezim, ni linhu ia fina ioxise, ufunu ua mesene ia jinjikita;

³⁸ Ni philadi jê jitanu ni jikoloxete jê; o ibaka iê ia thandu ni moldura iê a i folala ni ulu; o ibaka iê ia bhoxi i kala ia ngôndo.