Makatukilu 34 - O Mikanda Ikola

Mabaia òbhe a kuinhi dia ijiia

¹ Bhenhobho Jihova anga u ambela Mozé, uixi: Bhasa dingi mabaia aiadi a matadi kala ió a diangele; eme ngi soneke-ku dingi o maka oso a kexile ku ibasakasa ia mukuá i ua bulu.

² U kale polondo mu kimene, u di meneke dingi mu mulundu ua Sinaiʼumu, u di bhakule ko kuami bhu thala ia mulundu.

³ Kana muthu u banda-nê kumoxi; kana ue muthu a mu muena mu jimbanji ja mulundu; ni ilunga ia jimbudi ni ibhanga ia jingombe ki i kale mu dila mu betekete diê.

⁴ Mozé anga u bhasa mabaia aiadi a matadi, a soko ni ió a diangele; Mozé anga u di meneka, u banda ku mulundu ua Sinai, kala kia mu tumu Jihova, uambata bhu lukuaku luê o ibasakasa iiadi ia matadi.

⁵ Jihova anga u tulukila mu dituta, hé u imana-nê; bhenhobho, u kola o dijina dia Jihova.

⁶ O Jihova kioso kia mu bhita bhu pholo iê, Mozé, u mu kola, uixi: Jihova, Nzambi ia jihenda ni kiadi, ua lenduka, u kokoloka mu kuthathamana, u kôla mu kukuatela henda, ufiiele u vula.

⁷ Jihenda jê ji nangenena ku jimidi ja miji, hé u loloka o kubhukumuka, ni kuxibhaka, ni ituxi, maji ka ẋikina-phe kueha muedi ni ku mu ila ualungu, o kubhukumuka kua jitata, ku bhiẋika kuxixima ku ana ni alaula, katé ku muiji ua katatu ni ua kauana.

⁸ Mozé anga muʼanzanzʼomo, u bhetama pholo iê bhoxi, hé u bheza.

⁹ Uixi-phe: Se ni kidi kiene, nga sange ngalasa ku mesu mé, Ngana, nga ku diondo, Eie-muène endela muʼaxaxi ketu; kuma etu tu mundu ua thathamana jixingu. Tu loloke-phe o kubhukumuka kuetu, ni ituxi ietu, nda u tu tambulule mu kukala tu undundu ué.

Nzambi u ta kikutu

¹⁰ Muene anga u zuela, uixi: Talesa, eme nga-nda ku ta kikutu ni eie. Bhu pholo ia mundu ué uoso, eme ngi bhanga madiuanu, a bhingi kiluua a a bhanga mu ngongo, kana kilômbo a ki muene kiá; ni mundu uoso a mi kala mu jimbandu hinu a mona o kukalakala kua Jihova; kuma ki kuatesa uoma, kima kioso ki ngi bhanga nʼenu.

¹¹ Aiuka kiambote kioso ki ngi ku ambela kizuua kia lelu; nga-nda kukaia bhu pholo ié, o Mamodi, ni Makanana, ni Mahiti, ni Mapelezi, ni Mahivi, ni Majebuzi.

¹² Dilange-phe, kana kuta kikutu kia ukamba ni akuaʼxi kuku ku uia, kuma ki u ki bhanga, ki kala múkala u ua di lungila.

¹³ Maji o kalatódio jâ mu ji bula, iteka iâ mu i bukujula, o matutu ma Axelahe mu a kokela bhoxi.

¹⁴ Mukonda eie, Izalaiele, kana ku bheza jinga nzambi iengi, kuma Jihova dijina diê Difuba, ka ẋikina kuila ku kala mukuâ, mukonda muene Nzambi ia Difuba.

¹⁵ Sumba ki u ta kikutu kia ukamba ni akuaʼxi koko, ene kia bhanga undumbu bhu pholo ia jinzambi jâ, ni kia satela jinzambi jâ, bhu kala uoso u ku ixana-bhu ni u die ku sata ia jibhila o iteka iâ.

¹⁶ Anga muʼijila kiá o kubhenga anʼâ a ahatu phala anʼenu a mala, o anʼâ a ahatu ki aia ni kubhanga undumbu bhu pholo ia jinzambi jâ, ni anʼenu a mala a a sendula ue mu undûmbu ua jinzambi jâ.

¹⁷ Eie-phe kana ku di iudikila jinzambi ja utadi uòzunze.

O fesa jitatu ku muvu

¹⁸ U kuata jinga o kijila kia fesa ia jimbolo ja kambe felemendu. Sambuadi dia izuua u dia jimbolo ja kambe felemendu, kala ki nga ku tumu, thembu ioso i nga mi lekela bhu mbeji ia Abibe; kuma mbejí ioio, ia Abibe, iene i mua tundu na-iu mu Ijitu.

¹⁹ Ima ioso i tuama kujikula divumu, iami eme; ni ibhaku, se ndumbe, ioso i tuama kujikula divumu iami, né ngombe mba mbudi;

²⁰ se monʼa bulu u tuama kujikula divumu, u mu kula ni mona mbudi mba hombo; o ki uila kana ku mu kula, u mu bukula xingu; anʼenu oso a phande-kumbi mu a kula. Kana muthu uiza bhu pholo iami ni maku a hatu.

²¹ Izuua isamanu i u kalakala, kia kasambuadi-phe u ki nhoha, kixi bhu thembu ia kudima, kixi bhu thembu ia kumuna, u ki nhoha muene.

²² U kuata jinga ue o fesa ia jisemana, mu kumateka kumuna tiliku, ni fesa ia kubhongolola o idima ki batuka o muvu bhu bhuilu diê.

²³ Lutatu, ku muvu, mala oso a di bhakula bhu pholo ia Jihova, Nzambi ia Izalaiele.

²⁴ Mukonda eme ngi kaia ifuẋi ia miji iengi bhu pholo ienu, ngi kudisa jimbambe jaʼxi ienu; kana muthu ue u kala ni luimbi lua mavu enu, kioso enu ki mu banda mu ku di bhakula bhu pholo ia Jihova Nzambi ienu, lutatu ku muvu.

²⁵ Kioso ki mu Ngi bhakuila sata, kana kubhakula manhinga ma sata iami ni jimbolo jala ni felemendu, o sata ia fesa ia Phasu ki i zeke usuku katé kuáki.

²⁶ Ibundu ioso i dianga kúbhia ku ibundu ienu i tunda mu mavu, mu i bheka mʼonzo ia Jihova, Nzambi ienu. Monʼa hombo kana ku mu lambela mu lete ia manhʼâ.

²⁷ Nzambi anga uambela dingi Mozé, uixi: Maka oso iá, soneka-u. Mukonda, kala kia lombolola o maka enhá, nga te kikutu kiami ni eie ni Izalaiele.

²⁸ Mozé anga u kala kuenhoko ni Jihova, makuinhi auana a izuua ni makuinhi auana a usuku; ka di mbolo, ka nu menha. Jihova anga u soneka ku ibasakasa ia matadi o maka eneʼá a kikutu, o kuinhi dia ijiia.

Pholo ia Mozé i benha

²⁹ Anga ki bhita-phe kuila, Mozé kia kala mu kulumuka mu mulundu ua Sinai, ni ibasakasa iiadi ia umbangi bhu lukuaku luê, kia zubha ku kulumuka mu mulundu, Mozé ka kʼijidile kuma kikonda kia pholo ié kiala kubenha, mukonda dia kutunda mu kuzuela ni Nzambi.

³⁰ Ni Alá-phe ni ana oso a Izalaiele, kia tale, a mona Mozé kuila kikonda kia pholo iê kí benha; anga a kala ni uoma ua ku mu zukama.

³¹ Mozé-phe anga u a exana; ni Alá ni adiakime oso a kilômbo anga eza dingi kua muene, o muene anga u zuela-nâ.

³² Bhenhobho anʼoso a Izalaiele anga a zukama kiua, muene anga u a tendelesa ioso ia mu ambela Jihova ku mulundu ua Sinai.

³³ Kia zubha Mozé kuzuela-nâ, u di futa kima kiedi kala uandanda mu pholo iê.

³⁴ Mozé anga uia ni kuila-phe, kia bokona kua Jihova mu kuzuela-nê, uandanda u u katula-ku, katé kia tunda; o ki ela ua tundu, u ambela anʼa Izalaiele kioso kia mu tumu Nzambi.

³⁵ Anʼa Izalaiele kienʼiki kia kexi ku mona o pholo ia Mozé; a mona jinga kuma kikonda kia pholo iê kí benha; maji Mozé-phe anga u di futa dingi kima kiedi kala uandanda mu pholo, katé kia bokona dingi mu kuzuela ni Ngana.