Makatukilu 29 - O Mikanda Ikola

O kulumbila Alá ni anʼê

¹ O ki tokala ku a bhanga kienhiki, mu ku a lumbila phala ku ngi kalakela ku unganga: U kuata ngombe ia ndumbe ia kiubha, ni ilumbe iiadi ia jimbudi, ia kambe kunemana mba mabaka.

² Ni jimbolo jakambe kifulu-fulu, ni jibolaxa jakambe kifulu-fulu jólunge ni maji, ni ja mukuá ja kambe kifulu-fulu ja tolo mukômo jóuese ngó maji ku thandu; jene joso a ji iudika ni fuba ia tiliku ia fina.

³ Anga u ji ambatela mu kinda kumoxi ni ngombe ia kiubha ni ilumbe iiadi ia jimbudi.

⁴ Ni Alá-phe ni anʼê a mala u a bheka bhu muelu ua balaka ia kutakanena, anga u a eẋika bhenhobho ni menha.

⁵ Anga u zangula izuatu u i zuika Alá ni mbinza, ni kapote ka efodi, ni efodi iene, ni muxila, u mu kuta ni phonda ia ufunu ua matunda.

⁶ U mu ta kijinga ku mútue, ni kitundu kikôla ki bhita ku thandu dia kijinga.

⁷ Bhenhobho-phe u kuata maji a kuunda u mu lunduluila-nâ mu mútue, kiene ki u mʼundʼiki.

⁸ Hé u bheka ue kiua ni anʼê, u a zuika mavunga.

⁹ U a kuta jiphonda, ni Alá ni anê, u a ta ijinga mu mútue, phala unganga u kala uâ-ene, ua kijila ki ki moneka bhu kia suku; kienhiki ki u a lumbila-u, ni Alá ni anʼê a mala.

¹⁰ O ngombe ia kiubha u i bheka bhu kanga dia balaka ia kutakanena; ni Alá-phe ni anʼê, a tula maku mâ ku thanduʼa mútue ua ngombe.

¹¹ O ngombe anga u i jibhila bhobho, bhu pholo ia Jihova, bhu muelu ua balaka ia kutakanena.

¹² Anga u tambula-ku ku manhinga ma ngombe, ni u te ni mulembu ué ku jimbinga ja kalatódio, a mukuá oso u a eẋika bhoxi dia kalatódio.

¹³ U kuata ue o banha ioso i tunda ku dikutu, ni kikonda ki bhita ku thandu dia muxima, ni anasonhi aiadi, ni banha iala ku anasonhi, anga u i ohela ku kalatódio.

¹⁴ Xitu-phe ia ngombe ni kibha kiê, ni ditobe diê, u ioha ni túbhia ku mukáu, mu kibangu u tunda-mu; kuma sata ia ituxi.

¹⁵ Kienhókio ku ilumbe ia jimbudi u kuata-bhu ue kimoxi; Alá ni anʼê anga a tula maku mâ ku mútue ua kilumbe;

¹⁶ kilumbe anga mu ki jibhila bhenhobho, o manhinga mê u ma sangela mu jimbandu ja kalatódio ku thandu diê.

¹⁷ Kilumbe anga u ki bhanga ku idiandu, miẋima u i sukula ni inama iê, anga u i tula kumoxi ni idiandu ia mukuá, ni mútue uê.

¹⁸ Kilumbe kioso kia muvimba anga u ki ohela ku kalatódio; kífua sata ia Jihova ia kuoha; dizumba diambote, ujitu ua ku bhakula ni túbhia kua Jihova.

¹⁹ Kilumbe kia mbudi kia mukuá anga u ki kuata ue; Alá ni anʼê anga a tula maku mâ ku mútue ua kilumbe.

²⁰ O kilumbe anga mu ki jibhila bhenhobho, u katula ku manhinga mê, anga u ta-ku bhu sungu ia dítui dia Alá, ni dia mbandu ia kadilu, ni bhu sungu ja mátui ma anʼê bhu mulembu uâ ua dikota ua lukuaku ni ua kinama, ku mbandu ia kadilu, o manhinga ma mukuá u a sangela kuthandu mu jimbandu joso ja kalatódio.

²¹ U katula ue ku manhinga mala ku kalatódio, ni ku maji a kuuesa, u ma sangela kua Alá, ni ku izuatu iê, ni ku anʼê ni ku izuatu ia anʼê kumoxi ni muene.

²² Kala kiki ni muene ni izuatu iê, kumoxi ni anʼê ni izuatu iâ, a kale oso òlumbe kua Jihova. Kienhókio o ku kilumbe ue u katula banha iê ni mukila uê ua nete, ni banha i tunda ku dikutu, ni kikonda ki bhita ku muxima, ni anasonhi aiadi, ni banha iala ku anasonhi, ni kinama kia taku kia mbandu ia kadilu, kuma kiki kilumbe kia kulumbila ku unganga.

²³ Anga u katula dikende dimoxi dia mbolo, ni bolaxa imoxi iólunge ni maji, ni iamukuá ia mukomo uófele, mu kinda kia jimbolo jakambe kifulúfulu ji mua bheka bhu pholo ia Jihova;

²⁴ iene ioso iii anga mu i bhana bhu maku a Alá, ni bhu maku a anʼê, anga a i sakesa bhu pholo ia Jihova, sata ia Jihova ia kusakesa.

²⁵ O ki u i tambula bhu maku mâ, u i ohela ku kalatódio, ka jisata ja kuoha kifua dizumba diambote kua Jihova, ujitu ua kubhakula ni túbhia kua Jihova.

²⁶ U katula-phe o phetu ia kilumbe kia Alá, kia ku mu lumbila ku unganga, anga u i sakesa bhu pholo ia Jihova, sata ia Jihova ia kusakesa, o phetu iii anga i kala diene o dikânda diê.

²⁷ O phetu iii ia kusakesa, u i lumba kumoxi ni kinama kia taku ki ua sakesa, kiókatule ku kilumbe kia tokala Alá ni anʼê.

²⁸ Di kala diene o dikânda dia Alá ni anʼê, kuila kiâ ku anʼa Izalaiele ku thembu joso, dikânda dia kunomona, kuma a i nomona ku jisata ja paze ja bheka anʼa Izalaiele kua Jihova; ujitu uangene ua Jihova, kuma uene ujitu ua bheka anʼa Izalaiele kua Jihova.

²⁹ O izuatu ikola ia Alá, i kala ue ia anʼê oso a kà mu bhingana; iene ia unda na-iu, iene ia a lumbila na-iu ku unganga.

³⁰ Ku anʼê, uoso u mu bhingana ku unganga, u i zuata mu sambuadi dia izuua, kioso kia kà bokona mu balaka ia kutakenena, mu bhanga unganga mu kididi kikôla.

³¹ O kilumbe kia kulumba na-kiu, xitu iê u i lambela bhu kididi kiê kia ngene kikôla.

³² Ni Alá ni anʼê a dia xitu ienhiʼii, ni jimbolo jala mu kinda, a i dila bhu muelu ua balaka ia kutakanena.

³³ A kà dia ima ienhiʼii, ia sata ia kilumbe phala ku a lumbila ni ku a kôlesa; o muthu uengi-phe ka tena kudia-ku, mukonda ikola.

³⁴ Se ku xitu ia kulumbila ku subhuka kama, mba ku mbolo iê, anga i zeka katé kuáki, ioso ia subhuka-ku kikale u i oha mu túbhia; kana muthu u dia-ku, mukonda ikola.

³⁵ Kiene ki u bhangʼiki kua Alá ni anʼê kala kiá kioso ki nga ku tumu, kiene ki u kumbidila; u ki bhanga mu sambduadi dia izuua mu ku a lumbila.

³⁶ Kala kizuua ni kizuua u bhakula ue ngombe ia kiubha mu sata ia ituxi, ia kubhuisa ikuma; ni kalatódio u ka bonza ue, mu ku ka bhuisa ue ikuma ni kiamenga anga u ka unda ni maji, mbé u ka kôlese.

³⁷ Mu sambuadi dioso dia izuua, kalatódio u ka bhuisa ikuma, u ka kôlesa; kuma o kalatódio ka kôla kinéne; uoso u tula-ku ngó lukuaku muthu ukôla kiá.

O jisata ja izuua ioso

³⁸ O sata i u satela jinga ku kalatódio ienhiʼii: Mbudi jiiadi ja kiubha izuua ioso.

³⁹ Mbudi imoxi u i sata mu kimene, o mbudi iamuká mu ngoloxi, kuila mixinda ia maku ia jimi kiá.

⁴⁰ Ku mbudi imoxi u kuata ni mbandu ia kakuinhi ia efah ia fuba ia fina, iólunge ni mbandu ia kauana ia hine ia maji òzunze; ni mbandu ia kauana ia hine ia vinhu ia kiamenga.

⁴¹ O mbudi iamukuá u i sata mu ngoloxi, kuila mixinda ia maku ia jimi kiá; i kala ni mubhaku ua musa, ni kiamenga kiê, kala mu kimene, dizumba diambote, ujitu ua kubhakula ni túbhia kua Jihova.

⁴² Sata iii ia kuoha izuua ioso, mu ngi satela jinga na-iu ku miji ienu ioso, sé kumoneka bhu ia suku, bhu muelu ua balaka ia kutakanena bhu pholo ia Jihova, bhene bhu tu takanena jinga, bhene bhu ngi mi zuelesela.

⁴³ Bhenhobho bhene bhu ngi takanena jinga ni anʼa Izalaiele phala ku unene uami, ngʼa kitule athu a kôla.

⁴⁴ Anga ngi kôlesa ue ni balaka ia kutakanena, ni kalatódio; o Alá ue ni anʼê ngʼa kôlesa ue phala ku ngi kalakela ku unganga.

⁴⁵ Nga kà tunga mu kaẋi ka anʼa Izalaiele, ngi kala ngi Nzambi iâ.

⁴⁶ Ene hé a kèjiia kuma eme Jihova ngi Nzambi iâ, nga a katula mʼoxi ia Ijitu phala ni ngi tunge mu kaẋi kâ; emʼeme ngi Jihova Nzambi iâ.