Makatukilu 28 - O Mikanda Ikola

O izuatu ia Jinganga

¹ Ua kèxana phange ié Alá ni anʼê a mala, mu kaẋi ka anʼa Izalaiele, nʼa ku zukame, u a unde ku ngi kalakela ku unganga; ni Alá, ni Nadabe, ni Abihu, ni Eliezale, ni Itamale, ni anʼa Alá.

² Ua kà iudika izuatu ia kuzela ni kuiuka phala phange ié Alá, izuatu ia kuuabha ni kukemba.

³ Ua kà zuelesa ue jimesene oso ejiia kiambote, nga undu ni uhete ku muxima, a kuate kutunga izuatu ia Alá, phala ku mu lumbila, mbé ende ni kubhanga o kikalakalu kiami kia unganga.

Izuatu ia unganga

⁴ O izuatu-phe ia ka iudika, ienhiʼii: Ni kixita-thulu ni efodi, ni mbinza, ni divunga dia makembu, ni kijinga, ni phonda; a kà iudika izuatu ia kuzela ni kuiuka phala phange ié Alá ni anʼê a mala, phala a ngi kalakele ku unganga.

⁵ A kuata ni ulu, ni azulu, ni pulúpula, ni kalumezim, ni linhu ia fina.

⁶ O ki u iudika efodi, i kala ia ulu, ni azulu, ni pulúpula, ni kalumezim, ni linhu ia fina iòuinde, ufunu ua mesene ia mulongo.

⁷ I kala ni fita jiiadi ji bhita bhu isuxi, phala kutakanesa o mbandu ia mu thulu ni mbandu ia ku kunda, phala i kale iene imoxi.

⁸ O phonda iê iuabha, phala ku i kutila ku mukutu, i kale iene imoxi ni efodi iene, ki i di kalela, kana; a i iudika ni ulu, ni azulu, ni pulúpula, ni kalumezim, ni linhu ia fina iòuinde.

⁹ U katula ue ni matadi aiadi a sardónika, anga a seta-ku o majina moso ma anʼa Izalaiele;

¹⁰ majina masamanu a kala ku ditadi dimoxi, o majina masamanu ma xala-ku ma kala ku ditadi diamukuá, kala kioso kia a vuala ku iubha iâ.

¹¹ Ua kà a iudika ni ufunu ua mesene mukua kuiudika jisineta, uene u bhita-bhu, phala kuseta majina ma anʼa Izalaiele ku matadi maiadiʼama; anga a ma sokeka mu makuatelu ma ulu.

¹² Matadi maiadi enhá, anga a ma jika ku jifita ja efodi ji bhita bhu isuxi, phala a kale matadi ma dilembalelu dia anʼa Izalaiele; Alá ki aia jinga bhu pholo ia Jihova, u ambata majina mâ bhu isuxi iê iiadi, phala Ngana a a te muxima.

¹³ Uiudika ue ni makuatelu ma ulu,

¹⁴ ni malubhambu maiadi ma ulu uóxise kala jingoji, malubhambu enhá a kuata mu makuatelu.

Muxila ua kuzambuila

¹⁵ U iudika ue ni muxila ua kuzambuila, ufunu ua mesene ia mulongo u bhita-bhu; ufunu uê u kala uene umoxi ni ua efodi; u u iudika ni ulu, ni azulu, ni pulúpula, ni kalumezim, ni linhu ia fina iòuinde, kiene ki u u bhanga.

¹⁶ U u budika, phala mbandu jê jiuana ji sokela: o kulebha kuê kànda dia lukuaku, o kuzanza kuê ue kànda dia lukuaku.

¹⁷ Ku thandu diê ku kala mikalatata iuana ia matadi mosokeke mu ulu; mukalatata ua kamoxi u ambata ni sardia, ni topazio, ni kalubúngulo;

¹⁸ mukalatata ua kaiadi u ambata ni esmeralda, ni safira, ni diiamande;

¹⁹ mukalatata ua katatu u ambata ni jasindo, ni agata, ni ametista;

²⁰ mukalatata ua kauana u ambata, ni turkeza, ni sardónika, ni jaspe; ene oso a ma sokeka mu makuatelu ma ulu.

²¹ Matadi ma kala kuinhi ni kiiadi, mu kuinhi dia muiji ni kiiadi ia anʼa Izalaiele; kala ditadi a di seta, mukuâ ni sineta, ni dijina dia muiji umoxi ua Izalaiele.

²² Ku muxila iudikila-ku ue malubhambu ma ulu uóxise kala jingoji, ulu uê ua fina.

²³ Ku muxila ue u iudikila-ku malenge maiadi ma ulu, malenge maiadi enhá a kala ku jisungu ja thandu dia muxila.

²⁴ O malubhambu maiadi ma ulu uóxise kala jingoji, u ma ta mu malenge maiadi mala ku jisungu ja thandu dia muxila.

²⁵ O jisungu jiiadi jamukuá ja malubhambu ji kuata ni makuatelu mu jifita ja efodi ja bhiti bhu isuxi, ji ja tulukila mu thulu.

²⁶ U iudika dingi malenge maiadi ma ulu, u ma ta ku jisungu ja bhoxi ja muxila, ma kalela moxi ku efodi.

²⁷ U iudika ue malenge aiadi a ulu, hé u a ta mu jifita bhu isuxi ku efodi moxi ku pholo, bhua takanena o jifita ku thandu dia phonda ia makembu ku efodi.

²⁸ O muxila-phe ni malenge mê ma bhoxi, ni malenge mala ku efodi, a ma kutila kumoxi ni ngoji ia azulu ku thandu, phala muxila u tule ku phonda ia makembu iala ku efodi, o muxila u kuatenena ku efodi, kuene ku u kala, nuka dingi u tunda-ku.

²⁹ Kienhokio-phe Alá, kioso kia kà bokona mu kididi kikôla, majina ma anʼa Izalaiele ua a ambatela ku muxila ua kuzambuila bhu thulu iê, phala dilembalelu bhu pholo ia Jihova izuua ioso.

³⁰ O moxi dia muxila ua kuzambuila u ta-mu ue Udimi ni Tumimi, i kale bhu thulu ia Alá kioso kia kà bokona kua Jihova; Alá kifua uambata jinga bhu thulu iê mu thembu joso o hasa ia anʼa Izalaiele bhu pholo ia Jihova.

Izuatu iamukuá ia unganga, o Udimi ni Tumimi

³¹ U bhanga ue o mandu ia efodi, u i iudika ia azulu ioso.

³² I kubuka dizungu mu kaẋi mu bhita o mútue, o ngola i kondoloka jinjikita, kala ngola ia kibhakatu kia ita, phala ki i tanduke.

³³ Bhu suka o muxila, ue, bhoxi, u iudika-bhu jibola ja azulu, ni pulúpula, ni kalumezim, jila kala mabhole, ji kondoloka muxila uoso; ni manzuela ma ulu ue mu kaẋi ka mabhole.

³⁴ Kifua ku kala dinzuela ni dibhole, dinzuela ni dibhole, katé muxiku uoso ua mandu ua takana.

³⁵ Alá u i zuata kioso kiala mu sedivila; o kuxika kua manzuela, anga a ku ivua kioso kia bokona mu kididi kikôla, bhu pholo ia Jihova, ni kia tunda, phala ka fue.

³⁶ U iudika ue ni kítandu kia ulu ua fina, anga u setela-ku, mukua ni kuseta kua sineta: Kuzela Kukola Kua Jihova.

³⁷ Kitandu kiki u ki kutila ku kijinga ni fita ia azulu, ku pholo muene ia kijinga kuene ku ki kexila.

³⁸ O Alá anga u i zuata bhu dibhomo diê, Alá anga u ambata o kutondala kua anʼa Izalaiele mu ima ioso ikola ni mu maujitu mâ moso ma kôla ma lumbila Nzambi; i kale jinge bhu dibhomo diê, phala ene a a tambulule kua Jihova.

³⁹ O divunga a di tunga ku mulongo, di kale dia linhu ia fina; u iudika ue ni kijinga kia linhu ia fina; u iudika ni phonda, ufunu uê ua mesene ia jinjikita.

⁴⁰ Anʼa Alá ue u a iudikila ni mavunga, ni jiphonda, ni ijinga, u i iudika ue i kale ia fuma ni makembu.

⁴¹ O izuatu iii anga u i zuika kua phange ié Alá, ni anʼê, ni ku a unda ni maji, ni ku a lumba, ni ku a zelesa, mbé ende ni ku ngi kalakela ku unganga.

⁴² U a iudikila ue ni jikalasá ja linhu, phala kuxita jituẋi jâ, ji tunda bhu kinhonga katé mu matabela;

⁴³ a ji zuata ni Alá ni anʼê, kioso ki aia mu balaka ia kutakanena, mba ki a zukama ku kalatódio mu bhanga unganga uâ mu kididi kikôla; phala ka bonge kuêla nʼa fue; ki kala kijila ku thembu joso, ni kua muene ni ku mbutu iê hádia i mu bhingana.