Makatukilu 27 - O Mikanda Ikola

O jiphiladi ji kuata bhoxi mu ibaka itanu ia ngôndo. O Kalatódio ka Sata ja kuoha

¹ U iudika ue ni kalatódio ka muẋi ua xitimi, kulebha kuê kôvado jitanu, kuzanza kuê kôvado jitanu; mbandu jê jene kiuana kiâ ji sokela kumoxi; o kitala kiê kôvadu jitanu.

² U iudika ni jimbinga ji kala bhu jithungi jê jiuana, ji kuatenena koko, ki ji ẋikina ku ji katula-ku; kene koso anga u ka xiia ngôndo.

³ U iudika ue ni jímbia jê ja kuambatela o utókua, ni jipá jê ni jimbasinha, ni jingalufu, ni iomuenu ia kuambatela o makala a túbhia; iselengenhe iê ioso iii, i kala ia ngôndo.

⁴ U iudika ue ni kiseselu kia ngôndo kila kala uanda; o ku jithungi jê jiuana u iudikila-ku malenge mauana.

⁵ Uanda iú u kondoloka o kalatódio, o malenge iá ua kondoluesa mu jimbandu ja kalatódio, phala o ditala dia uanda di suke ngó muʼaxaxe ka kalatódio.

⁶ Anga u iudika ue ni mikambu phala o kalatódio, mikambu ia muẋi ua xitime, anga u i xiia ni ngôndo.

⁷ Mikambu a i ta mu malenge mu jimbandu ja kalatódio, phala mu kuambata o kalatódio ni ikale mu jimbandu.

⁸ O kalatódio u ka iudika ka mabaia, o moxi ka kala kitutu ngó, kala kioso kia ku idikiza ku mulundu.

Kithâdi kia balaka

⁹ U iudika ue ni kithâdi kia balaka; ku mbandu iê ia mediia ku sulu, o kithâdi ki kala ni jikulutina ja linhu ia fina iòuinde, mbandu imoxi i kala hama ia kôvadu mu kulebha.

¹⁰ O jiphiladi jê ue ji kala makuinhi aiadi, ni ibaka iê makuinhi aiadi, ia ngôndo ioso; ni jingôua ja kunhengena jikulutina, ni jiphidika ja philadi, ji kale ja phalata.

¹¹ Kiene ue kimoxi ku mbandu ia kusuku ku kala jikulutina, kulebha kuê hâma ia kôvadu; o makuinhiʼê aiadi a jiphiladi ni makuinhiʼê aiadi a ibaka i kala ia ngôndo ioso; o jingôua ja kunhengena jikulutina, ni jiphidika ja jiphiladi, ji kala ja phalata.

¹² O bhu kuzanza kua kithâdi, ku mbandu ia mutudila-kumbi, ku kala jikulutina kulebha kuê makuinhi atanu a kôvadu; jiphiladi jê dikuinhi, ibaka iê dikuinhi.

¹³ Kiene ue kimoxi bhu kuzanza kua kithândi ku mbandu ia mutundila-kumbi, makuinhi atanu a kôvadu.

¹⁴ Kala kiki, ò jikulutina ja mbandu imoxi ia muelu, ji kala kuinhi dia kôvado ni kitanu; jiphiladi jitatu, ibaka itatu.

¹⁵ O ku mbandu iamukuá ia muelu, jikulutina jê kuinhi dia kôvadu ni kitanu; jiphiladi jitatu, ibaka itatu.

¹⁶ O ku muelu ua kithâdi ku kala dibeka dia makuinhi aiadi a kôvado, dia azulu, ni púlupula, ni kalumezim, ni linhu ia fina iakuinda, ufunu ua mesene ia jinjikita; jiphiladi jê jiuana, ibaka iê iuana.

¹⁷ Jiphiladi joso ja kithâdi ji bhita mu jimbandu, a ji kondoluesa jiphidika ja phalata; o jingôua jê ji kala ja phalata, maji o ibaka iê ia ngôndo.

¹⁸ Kithâdi kioso bhu kulebha ki kala kia hama ia kôvadu, o bhu kuzanza makuinhi atanu a kôvadu, o kitala kia kôvadu jitanu, o jikulutina jê ja linhu ia fina iakuinda, maji o ibaka iê ia ngôndo.

¹⁹ O ku imbamba ioso ia tokala mu balaka, ni mu ikalakalu ioso ia ku i ximbika, ni jiphapha jê, ni jiphapha ja kithâdi, ji kala ja ngôndo.

Muanu ua kukuatela o jikandeia

²⁰ Eie-phe ua kà tuma anʼa Izalaiele, a ku bhekele maji a zele a mudiva, a tunda mu kukama jinjotona, phala kuuika o kandeia; mbé o kandeia ka kale mu uama izuua ioso.

²¹ O mu balaka ia kutakanena, bhu kololo, bhua bhiti o kibatulu, umbangi anga u kala mu xilu, bhene bhu kala o kandeia; Alá ni anʼê ene a ka tambula konda, tunde ngoloxi katé kimene, bhu pholo ia Jihova; ki kala kijila kiâ, kutunda muiji, kuiza muiji, ku ana Izalaiele.