Makatukilu 25 - O Mikanda Ikola

Anʼa Izalaiele a bheka maujitu

¹ Jihova anga u ambela Mozé, uixi:

² Ambela anʼa Izalaiele a ngi bhekele ujitu ua ku di fikisila. Ku athu oso a zanguka muxima iâ, mu kubhana ni kieha, kuene ku mu ngi tambuila ujitu uami.

³ Ujitu u mu ngi tambuila uenhú: ni ulu, ni phalata, ni ngôndo,

⁴ ni jingoji ja azulu, ni ja pulúpula, ni ja kalumezim, ni linhu ia fina, ni ndemba ja jihombo,

⁵ ni ibha ia ilumbe ia jimbudi ióteke ni husu, ni ibha ia kiama kia menha, ni mabaia ma muẋi ua xitimi,

⁶ ni maji ma kandeia, ni fufuta ia mazumba phala maji a kuuesa ni amukuá phala o isensu ue ia dixi dia dizumba,

⁷ ni matadi ma sardonika, ni matadi ma mukuá ma kusokeka ku efodi ni ku kixita-thulu.

⁸ A ngi iudikile kibúta kikôla phala ngi tunge muʼaxaxi kâ.

⁹ Kioso ki ngi ku idikiza, kiene kidifua ki u fikisa, ni balaka ni imbamba iê ioso, kiene muene ki u i iudika.

O Alaka ia Umbangi

¹⁰ A iudika ue álaka ia muẋi ua xitimi; o kulebha kuê kôvadu jiiadi ni kaxaxi, o kuzanza kuê kua kôvadu ni kaxaxi, kuzonga kuê kua kôvadu ni kaxaxi.

¹¹ Anga u i xiia ulu ua fina ni moxi ni ku kanga, u i kondoluesa dikoloua dia ulu ku mizumbu iê.

¹² Uiẋika ue ni malenge auana a ulu, anga u a sokeka bhu thungi jê jiuana; malenge aiadi ku mbandu imoxi, malenge aiadi ku mbandu ia mukuá.

¹³ Anga u iudika ni mikambu ia muẋi ua xitimi; mikambu anga u i xiia ni ulu.

¹⁴ Mikambu iii, u i bhitisa mu malenge ku mbandu jiiadi ja álaka, i kala ia kuambatela álaka.

¹⁵ Mikambu i kala muene mu malenge ma álaka, ka i fomona-mu dingi, kana.

¹⁶ O moxi dia álaka u ta-mu umbangi uoso u nga-nda ku ku bhana.

O kibhuna kia kiadi kia ulu ua fina

¹⁷ U iudika ue ni kibhuna kia kiadi, ki kale kia ulu ua fina; kulebha kuê kovado jiiadi ni kaxaxe, kuzanza kuê kôvado ni kaxaxi.

¹⁸ Anga u iudika ue ni jixelube jiiadi ja ulu; ufunu ua kusula u bhita-bhu; ji suka bhu pondo ni pondo ia kibhuna kia kiadi.

¹⁹ Ku sungu ia kunu ku kala xelube imoxi, ku sungu ia koko xelube ia mukuá; ji di kuatenena kumoxi ni kibhuna kia kiadi ku ji sungu jê.

²⁰ Jixelube jiji jʼòleka o mabhabha mâ bhulu, anga ji vungina o kibhuna kia kiadi ni mabhabha mâ, jene kiiadi kiâ ji di bhana jipholo; o jipholo jâ ji bhetamene-phe ku kibhuna kia kiadi.

²¹ Kibhuna kia kiadi u ki ta ku thandu dia álaka; o moxi dia álaka, u ta-mu umbangi uoso u nga-nda ku ku bhana.

²² Bhenhobho bhene bhu tu takanena jinga, ki ngiza kokué; bhu thandu dia kibhuna kia kiadi, bhene bhu nga kà zenzamena mu ku ku zuelesela mu kaẋi ka jixelube jala ku thandu dia álaka ia umbangi, o ima ioso i ngi ku tuma kuambela anʼa Izalaiele.

O meza a mabaia ma xitimi

²³ U iudika ue ni meza ma muẋi ua xitimi; o kulebha kue ku kale kua kôvado jiiadi, kukula kuê kôvado imoxi, kitala kiê kôvado ni kaxaxi.

²⁴ Meza u a folala ni ulu ua fina, u a ta ni dikoloua diê dia ulu di a kondoloka ku mizumbu iê.

²⁵ Ku bhita ue dibaia di kondoloka mu inama ia meza, kukula kuê ku kale kua dikanda dia lukuaku; ku dibaia ue ku bhite makembu a ulu.

²⁶ U iudika ue ni malenge auana a ulu, eie hé u ta o malenge mu jithungi ja inama iê iuana.

²⁷ O malenge a zukame mu dibaia dia kondoloka, phala ma kale ma kutela mikambu ia kuambatela meza.

²⁸ U iudika ue ni mikambu ia muẋi ua xitimi, anga u i xiia ni ulu, mikambu i kale ia kuambatela meza.

²⁹ U iudika ue ni malonga mê, ni jingutu jê, ni itutu iê ia fuama, ni jinganza jê ja mubhaku ua makunua; jene joso ji kale ja ulu ua fina.

³⁰ O ku meza-phe u ta jinga-ku o jimbolo ja ku ngi tela sata, ji kale jinge bhu pholo iami izuua ioso.

O kandeia ka ulu

³¹ U iudika ue ni kandeia ka ulu ua fina; ufunu ua kusula u bhita-bhu mu iudika kandeia, ni inama iê ni lumbungu luê, ni kopho jê jedi ni kixina ni itulu iê, iene ioso a i sudila kumoxi;

³² ku kala ue thangu jisamanu ji tunda mu jimbanji jê, mbandu iii ia kandeia thangu jitatu, o mbandu ia mukuâ thangu jitatu;

³³ luthangu lu kala ni kopho jitatu jedi kala itulu ia mumendouela ni kixina kiê ni kitulu; luthangu lu kala ni kopho jitatu jedi kala itulu ia mumendouela, ni kixina kiê ni kitulu; thangu joso jisamanu ji tunda ku kandeia, kiene;

³⁴ maji o ku kandeia kuene ku kala kopho jiuana jila kala itulu ia mumendouela, ni ixina iê ni itulu iê;

³⁵ thangu jiiadi ji kala ni kixina kimoxi, iene ioso a i sudila kumoxi; thangu jiiadi ji kala ni kixina kimoxi, iene ioso a i sudila kumoxi; thangu jiiadi ji kala ni kixina kimoxi, iene ioso a i sudila kumoxi; Kifua thangu jisamanu joso ja tundu ku kandeia, thangu jiiadi kixina, thangu jiiadi kixina.

³⁶ Ni kixina ni jithangu ji kala kima kimoxi ni kandeia; iene ioso a i sudila kumoxi, ia ulu uòkenze.

³⁷ Ku thandu diê u ta-ku jikandeia ji kala sambuadi; a ji sendela jinga phala ji muikine bhu pholo ia kandeia bhuoso bhu kemana; ua kà iudika ue sambuadi dia jikandeia nʼu ji te bhu thandu diê phala a ji bambule jinge ni kumuikina bhuala kandeia.

³⁸ O itokelu iê ni ijiminu i kala ia ulu uòkenze.

³⁹ Talendu ia ulu ua kenzuluka i ia-mu, mu kuiudika kandeia kene, ni ima iê ioso iamukuá ia tokala-ku,

⁴⁰ o ulungu uê uene ua ku idikiza mu mulundu.