Makatukilu 13 - O Mikanda Ikola

Ana a phande-kumbi a a lumbila Jihova

¹ Jihova anga u ambela Mozé, uixi:

² Ngi lumbile ana oso a phande-kumbi, oso a tuama kujikula divumu mu anʼa Izalaiele, a kale athu, a kale ibhaku; kuma ami.

O fesa ia jimbolo jʼòsusu

³ Mozé anga u ambela o mundu, uixi: Lembalalenu kizuuʼiki kia lelu, kizuua ki mua tundu mu Ijitu, mu dibhata dia ubhika; kuma Jihova ua mi katula-mu ni nguzu ia lukuaku luê; kana kúdia jimbolo ja felemendo, kizuua kienhiki.

⁴ Mua tundu kizuua kia lelu, mbeje ia Abibi.

⁵ Kioso-phe Jihova kia kà mi bheka mʼoxi ia Makanana, ni Mahiti, ni Mamodi, ni Mapelezi, ni Mahivi, ni Majebusi, ixi ia lokela jitata jenu ku mi bhana-iu, ixi i kunguluka lete ni uiki, mua kà kuata ue kijilʼiki, mu mbeji iene i tualʼiii.

⁶ Mu sambuadi dia izuua mu kala mu kúdia jimbolo ja kambe felemendu, o kizuua kia kasambuadi, ki kala kia fesa iangene ia Jihova.

⁷ Jimbolo ja kambe o felemendu mu ji dia mu sambuadi dioso dia izuua; ka mi mone ni jimbolo jala ni felemendu, ka mi mone ni felemendu, katé ku mbámbe ienu.

⁸ Kizuua kienhókio mua kʼàmbela anʼenu kuma: Tua ki bhangela mukonda dia kidiuanu kia tu bhange Jihova, mu ku tu katula mʼoxi ia Ijitu.

⁹ Kia kà kala kidimbu ku lukuaku luenu, ni kijimbuete bhu dibhomo, phala ngonge ia Jihova i mi kale mu kanu; kuma Jihova ua mi katula ni lukuaku lua nguzu mu Ijitu.

¹⁰ Kala kiki, mu kuata jinga o kijila kienhiki, bhu kumbi uila bhabha, ku tunda muvu, kuiza muvu.

O anʼa phande-kumbi

¹¹ Kia kà kala-phe ue kiki, kuma Jihova kia kà mi bheka mʼoxi ia Makanana, kala kia mi lokela enu ni jitata jenu, kia kà mi bhana-iu o ku i vua.

¹² Kienhókio mua ká lumbila Jihova oso a tuama kujikula o divumu, ni anʼ oso a ibhaku a tuama ku a vuala, jindumbe ji kala jangene ja Jihova.

¹³ Maji-phe se bulu, o mona a tuama ku mu vuala, mu mu kula ni mbudi; o ki mu kamba ku mu kula, mu mu bukula o xingu; maji ku athu, ana oso a phande-kumbi mu a kula muene.

¹⁴ O ki kala anʼenu hádia a mʼibhula, exi: Kiki kima kiahi? mua kèla kuma: Nguzu ia lukuaku lua Jihova ia bhiti-bhu, mu ku tu katula mu Ijitu, mu dibhata dia ubhika.

¹⁵ Mukonda o mu kuiza ku ki bhanga, kia thathamana Falaó, iú ua di tunuʼê ku tu eha, Jihova ua jibha ana oso a phande-kumbi mʼoxi ia Ijitu, ni ku anʼathu, ni ku anʼa ibhaku; kiene kia ngi bhangesa kuila ana oso a tuama kujikula o divumu, ngʼa a lumbila Jihova, se jimdumbe; o anʼa phande-kumbi ku athu-phe, ngʼa a kula.

¹⁶ Ki kala kidimbu ku lukuaku lué, kala fita ia ku bhiti bhu dibhomo; kuila nguzu ia lukuaku lua Jihova ia bhiti-bhu, mu ku tu katula mu Ijitu.

Nzambi uendesa o mundu mu kikangalakata

¹⁷ Kia bhiti-phe kiki kuila, Falaó kia zubha kueha o mundu nʼaiâ, Nzambi ka a songuela mu njila ia akua Fidíxia, sumbala iene ia batulula; kuma Nzambi ua-mbe, uixi: Sumba mundu a diela, kia-ndu takana ni ita, a mesena a vutukila mu Ijitu;

¹⁸ Kala kiki, Nzambi-phe ua nhungisa o mundu mu njila ia kikangalakata, njila ia Kalunga Kakusuka; anʼa Izalaiele-phe mu kutunda mʼoxi ia Ijitu, ene oso a maneka ibhakatu iâ.

¹⁹ Mozé ue ua katula o ifuba ia Zuze, iu ua i ambatesa; kuma Zuze ua lokesa jinga anʼa Izalaiele, uixi: Nzambi hinu u mi zungila, o mu kuia, ni ifuba iami mu i ambata, muia na-iu.

²⁰ Anga a katuka bhu Sukote, a ta kibangu bhu Etamu, bhu mbámbe ia kikangalakata.

²¹ Jihova anga u a tuamenena; mu muanha mu philadi ia dituta, phala ku a edikiza o njila; o mu usuku mu philadi ia túbhia, phala ku a muikina a kale mua zele; phala a tene kuenda mu muanha, ni mu usuku.

²² O philadi ia dituta mu muanha, ni philadi ia túbhia mu usuku, iemana jinga muene bhu pholo ia mundu, ki ia sondoloka jinga-bhu dingi, muanha ni usuku.