Makatukilu 12 - O Mikanda Ikola

Kioso kia tumu kuiudika Phasu

¹ Jihova anga u ambela Mozé, ni Alá, mʼoxi ia Ijitu, uixi:

² Mbeji iii muene, iene i kala ienu ia kamoxi ku jimbeji joso; phala enu iene o mbeji ia dianga ku muvu.

³ Ambelenu o kionge kioso kia Izalaiele kuma: Kizuua kia kakuinhi ku mbeji iii, kala diiala uoso uala kiá ni dibhata diê, a kuate seseme ia mbudi, kala dibhata ni mbudi iê, kala kioso kiala ku mabhata ma jitata jâ;

⁴ maji se o dibhata-phe dia tolo, ka tena kúdia mbudi nʼa i zubha, a di bundè ni dibhata dia mukuá, kioso kia di zukama ku jinzo; kabasa mienhu ia soko kioso kia tokala o udilu ua muthu, mu di sokesa kuila mbudi imoxi mua soko na-iu o ku i dia.

⁵ O mbudi iene i kala iadisanze sé ngó unema, ndumbe ia kiubha kimoxi; hé ku jimbudi mu katula, hé ku jihombo mu katula;

⁶ anga mu i bhaka katé mu kizuua kia kauana ku dikuinhi, ku mbeji imoxi ienhiʼi, kizuuʼokio-phe, mu kumbi dia ngoloxi, o kionge kioso kia muiji ua Izalaiele kiene kia i jibha.

⁷ Hé a kuata-phe o manhinga-mê anga a ma sangela ku mikangala ia dibhitu iene kiiadi kiâ, ni ku phidika ja thandu ja mabhitu ma jinzo muoso mu ala ku dila.

⁸ Xitu a i dia usuku uenʼió, ia uóhe ku túbhia, ni jimbolo ja kambe felemendu; a i elela mafe a lulu.

⁹ Ki mu die-ku kama koso-koso ka uisu, mba mu i lamba mu menha, kikale mu i oha ku túbhia; ni mútue uê, ni inama, ni miẋima ioso moxi.

¹⁰ Kana kuxia-ku kima katé ki kúkia; se kuxala katé kuáki, kale mu i oha mu túbhia.

¹¹ Mu i dia kala kiki: Mua zuata, mua di bhadika, jihaii ku inama o mbangala bhu lukuaku; mu i dia ni lusolo; kuma iene o Phasu ia Jihova.

¹² Mbata mu usuku uenhó eme ngi bhita mʼoxi ioso ia Ijitu, ngi beta-mu ana oso a phande-kumbi òvualele mu Ijitu, ni ku athu ni ku ibhaku; o jinzambi joso ja Ijitu ngi ji bhana njumbu; eme ngi Jihova.

¹³ O manhinga-phe ma kale kijimbuete ku jinzo joso mu mualʼenu; o ki ngi mona manhinga ngi mi somboka, kana dibhebhu di mi tula enu mu ku mi buidisa, kioso ki ngi kuama o ixi ia Ijitu.

¹⁴ Kizuua kienhiki ki mi kala kizuua kia di tungula, mu kiʼimununa jinga ni kizokola kia Jihova; ku miji ienu ioso katé ku hádia ni hádia, mu kuata jinga fesa iê, ki kale kijila kia mi bhana.

¹⁵ O jimbolo ja kambe o felemendu mu ji dia mu sambuadi dia izuua; tunde kiá kizuua kiene kia dianga, felemendu ioso i bhua-mu mu jinzu; kuma uoso u dia jimbolo ja felemendu tunde kizuuʼokio kia dianga katé kizuua kia kasambuadi, muenhó muthu ua ku mu batula mu undandu ua Izalaiele.

¹⁶ Kizuua kiadianga, mu kala ni kionge kikôla; mu kizuua kia kasambuadi ue, mu kala ni kionge kikôla; mu izuua iiadi iii, ki mu bhange midimu ia kima, kikale ngó kikalakalu kia kubhanga kúdia; kiene ki mu bhanga, kuabhu.

¹⁷ O fesa ia jimbolo ja kambe felemendu, mu i kuata kienhiki; kuma kizuua kimoxʼiki, kiene kizuua ki nga katula o ilombo ienu mʼoxi ia Ijitu; mukonda dia kiki, mu kuata kizuuʼiki ku miji ienu ioso, katé ku hádia ni hádia; ki kala kijila ki nga mi bhana.

¹⁸ Ku mbeji ia kamoxi, tunde kizuua kiê kia kauana ku dikuinhi, katé kizuua kia kamoxi ku makuinhi aiadi, mu kumbi diê dia ngoloxi, mu dia jimbolo ja kambe felemendu.

¹⁹ Mu sambuadi dia izuua iii, ki mu kale ni felemendu mu jinzo jenu; kuma uoso udia kima nʼa te-mu felemendu, muthu ió muthu ua ku mu batula mu kionge kia Izalaiele, a kale nzuangiza, a kale muthu a mu vuala ku bhata.

²⁰ Kana kúdia kima kiala ni felemendu; ku mabhata menu, enu oso mu dia jimbolo ja kambe o felemendu.

²¹ Bhenhobho Mozé u tuma kuixana adiakimi oso a Izalaiele, u a ambela, uixi: Solenu kiá jimbudi, kioso ki mua di sokesa ku mabhata, kala dibhata ni mbudi iê, mu jibhe o Phasu.

²² Mu kuata ni kakiezu ka hisopo, mu ka bonde mu manhinga mala bhu mbasinha, mu sangele ku mikangala iiadi ni phidika ia thandu ia dibhitu ni manhinga ala bhu mbasinha; anga mu di jikila mʼonzo, kana muthu u tunda bhu kanga diê, katé ki kúkia.

²³ Kuma Jihova ua-nda kubhita mʼoxi ioso mu kuama akua Ijitu; o kia-nda kumona manhinga ku phidika ni ku mikangala iiadi ia dibhitu, Jihova u somboka dibhitu diodio, kehela mubuikixi kubokona mu jinzu jenu phala ku mi kuama.

²⁴ Kienhiki ki kala kijila kienu ki mu kuata, katé ku mululu ni ku muláula.

²⁵ Ku hádia-phe kioso ki mua kà bhiẋila mʼoxi ia tange Jihova ku mi bhana-iu, mua kà kumbidila ue o kijila kienhiki.

²⁶ O kia kèla anʼenu a mʼibhula, kuila: Mua ki bhangela-hi, kubhitisa o kikalakaluʼiki?

²⁷ Enu mua kèla kuma: Sata iangene ia Jihova, kifua phasu iê, kia somboka o jinzo ja anʼa Izalaiele mu Ijitu, kizuua kia kuama akua Ijitu ene, o mabhata metu anga ua a bhana muenhu. O mundu bhenhobho hé a diunda a bheza.

²⁸ Anʼa Izalaiele anga a tunda-bhu, a ki bhanga; kioso kia tumu Jihova kua Mozé ni Alá, a ki bhange muene.

O kúfua kua anʼa phande-kumbi

²⁹ Anga ki bhita-phe kuila, o usuku uenhó, mu kaẋi ka kizuua, Jihova u kuama ana oso a phande-kumbi mʼoxi ia Ijitu, tunde ku thungunu ia Falaó, ua xikama bhu kiandu kiê, katé ku monʼa hutile a mu kutila mu kaleia; ni anʼa phande-kumbi ku ibhaku.

³⁰ Falaó anga u balumuka mu usuku, ni muene ni akua mbèle iê oso, ni athu oso akua Ijitu; anga ku kala ngololo ia vulu mu Ijitu; kuma kana-ku inzu mua kambe kúfua muthu.

³¹ Anga u ixana Mozé ni Alá mu usuku, uixi: Zangukenu, mu tunde mu kaẋi ka mundu uami, ni enu ni anʼa Izalaiele; ndenu, mua kà bhikile Jihova kala ki muambe.

³² Ni jimbudi jenu ni jingombe ambatenu-ju, kala ki muambe, phala mu muangane; eme uami ngi sambedienu nda ngi kale ni kuzediua.

³³ O akua Ijitu anga a landameka o mundu, mbé a tunde mʼoxi iâ ni lusolo; kuma ambe exi: Etu oso tua-nda kúfua.

³⁴ O mundu anga a katula o ikose iâ ia jimbolo, kiluua ngó a i ta felemendu mu maulungu ma kubhondela anga maulungu a ma kutila bhu malasola, a a ta bhu isuxi.

³⁵ Anʼa Izalaiele anga a bhanga kala kia ambela Mozé, a bhinga ku akua Ijitu makembu ma phalata ni makembu ma ulu, ni izuatu.

³⁶ Jihova anga u bhana o mundu uê ngalasa ku mesu a akua Ijitu, anga a a bhana muene kioso kia bhingi. Kifua kubhûnda kuene, ene anga a bhunda akua Ijitu.

Anʼa Izalaiele a tunda mu Ijitu

³⁷ Anʼa Izalaiele anga a katuka bhu Lameseji, a ta kibangu bhu Sukote; o ku a alula a tena hama jisamanu ja jimidi; mala ngó akua kuenda bhoxi, o anʼa ndenge ka a te-mu.

³⁸ Sai dingi ni kifuẋi kia dikota kia jinzuángiza a di bundu momuʼâ ia endela-nâ kumoxi, ni nzungule ia ibhaku ia jimbudi, ni jihombo, ni jingombe.

³⁹ Anga a kanga o jimbolo ja kambe o felemendu, ku ikose ia tundu na-iu mu Ijitu; kuma ka tele-mu luua felemendu, mukonda o kutunda mu Ijitu kifua ku a kaia, ka a bhana kithangana, ni huta ka i iudika dingi.

⁴⁰ Kala kiki mivu ia bhange anʼa Izalaiele mu Ijitu, hama jiuana ja muvu ni makuinhi atatu.

⁴¹ O mu kukala-kukala-phe, kiabhu o hama jiuana ja muvu ni makuinhi atatu, mu kizuua kienhókio muene, kiene kia tundu o ilombo ioso ia Jihova mu Ijitu.

⁴² Kifua usuku ió Jihova ua a tele muxima mu ku a katula mʼoxi ia Ijitu; usuku iú-phe usuku ua Jihova, ua tokala anʼa Izalaiele oso a mu ta muxima katé bhua kà suka o miji iâ.

O itumu ia sukidila-ku ia Phasu

⁴³ Jihova anga u ambela dingi Mozé ni Alá, uixi: Kijila kia Phasu kienhiki: Mukua muiji uengi ka tena kudia-ku.

⁴⁴ Maji o mubhika ua muthu-phe, a mu sumbu ni kitadi, se a mu saie kiá, u diê.

⁴⁵ O nzuangiza-phe ni ngunza ka tena kudia-ku.

⁴⁶ Kikale mu i díla moxiʼaʼnzu; kana ku katula-ku ku xitu iê, phala ku tunda na-iu bhu kanga. O ku ifuba iê, né kimoxi ngó ki mu ki bukule-ku.

⁴⁷ Kionge kioso kia Izalaiele kikale a kà bhanga kienhiki.

⁴⁸ Se bhu kala mukuaʼxi iengi ueza kutunga ni enu, iu ua mesena kukuata ue o Phasu ia Jihova, kikale mala oso a dibhata diê a a saia, o kia zubha ku ki bhanga, kiene kiua kia tena kuzukama ni ku i kuata; u kala kiá mukuâ ni mukua ixi, a mu vualela ku bhata; kana muthu-phe a kambe ku mu saia, u tena kudia-ku.

⁴⁹ Kijila ki kala kiene kimoxi, phala iú a mu vualela ku bhata ni iú muthu uengi ueza kutunga muʼaxaxi kenu.

⁵⁰ Ana oso a Izalaiele anga a bhanga kienhiki; kioso kia tumu Jihova kua Mozé ni Alá, kiene muene kia bhange.

⁵¹ Anga ki bhita kuila, mu kizuua kienhókio, Jihova u katula anʼa Izalaiele mʼoxi ia Ijitu, kala kia di te mu ilombo iâ.