Luka 8 - O Mikanda Ikola

Ahatu a kala mu dikila Jezú

¹ Kubhanga izuua, Jezú u kala mú nhunga ku jimbanza ni ku jisanzala, mu ku boka ni kutula o Njimbu Iambote ia Utuminu ua Nzambi. O kuinhi dia xibulu ni kiiadi anga a kala-nê kumoxi.

² Ni ahatu amoxi ua a sakele o jinzumbi ni mauhaxi: Ni Madiia, a mu ixana Manda, mukua Magdala, moxi diê mua tundile sambuadi dia dimonho;

³ ni Nzuana, mukaji a Kuza, kimbadi kia Helode, ni Suzana, ni a mukuá avulu, anga a kala ku mu kuatekesa ni jimbongo jâ.

Kifika kia Mukuni a jimbutu

⁴ Anga kifuẋi kiavulu ki bhongoloka, ku mabhata moso kua tundu athu a mu kane muène, phala ku mu tala. Anga Jezú u a tela kifika, uixi:

⁵ Mukuni a jimbutu ua tundile mu ku kuua mbutu iê. O kia kala mú kuua, iamukuá ia sonoka bhu mbanduʼa njila; anga a i diota kuala athu, anga a i moma kuala o jinjila ja diulu.

⁶ Ia mukuá ia sonoka mu matadi; o ki iedi i sabhuka, kindala ia lela, mukonda dia kukamba utalalu.

⁷ Ia mukuá ia sonoka mu ʼaxaxe ka minha; o minha anga i kudila kumoxi ni isasa, hé i bhaka o jimbutu mua vundu.

⁸ Ia mukuá ia sonoka mu mavu ma mbote, anga i kula, ima ibundu, kala lumbundu lu bhana hâma ia jimbundu. Kia zubha kuzuela kiki, u di kola, uixi: Uoso uala ni mátui a kuívua, évue!

Dilomboluelu dia kifika kia mukuni a jimbutu

⁹ Jixibulu jê anga ji mu ibhudisa mba kifikʼiki kia jimbulula kiebhi.

¹⁰ Muène, uixi: Enu a mi bhana o kuijiia ikutu ia Utuminu ua Nzambi. Athu amukuá-phe a a zuelela mu ifika, phala kia tala, a kambe kumona; o ki évua, a kambe kuijiia.

¹¹ Obhenu kifika kiòjimbulule: O mbutu iene o maka ma Nzambi.

¹² Oso ala ku mbanduʼ a njila, ene évua, kindala kuiza diabhu u katula maka mu miẋima iâ, phala a lémbue kuxikana ni kubhuluka.

¹³ Oso ala ku thanduʼ a matadi, ene, ki évua o maka, a ma tambulula kiambote; ene-phe kuma a kambe jindanji, a xikana ngó kathangana, o bhu kumbi dia phaxi, a lémbua-ku kiá.

¹⁴ O ia sonoka mu ʼaxaxe ka minha, enhá évua, o ku pholo ku aia a xala mu mvunde ia maluimbi ni jimbongo, ni mísendu ia muenhu iú, ka bhana kibundu ni kíbhi.

¹⁵ O ia sonoka mu mavu mambote, oso évua maka ni muẋima ua kidi, ua uabha, anga a ma lunda, ema ibundu ni muanu.

Kifika kia kandeia

¹⁶ Kana-ku muthu u uika kandeia ni a ka fute kitutu, mba a ka bhaka moxiʼ a hama suke u ka bhaka ku thanduʼa meza, mbé oso a bokona mʼonzo ni a mone o kumuika kuê.

¹⁷ Mukonda kana-ku kima kiòfute kia kà kamba kuvulumuka; kana-ku kima kiòsueke, kia kà kamba kutukuluka.

¹⁸ Kala kiki, tumenu-phe ku kʼijiia kioso ki muívua! Mukonda uoso uala, muène a mu bhana; uoso ua kambe, a mu tambula katé ni kiki kia di fika o kukuata.

O jiphange ja kidi ja Jezú

¹⁹ Mamʼâ ni phange jê anga eza kua Muène, maji katena ku mu zuelesa, mukonda dia kifuẋi.

²⁰ Athu anga a mu tangela, exi: Mamʼ enu ni phange jé, Ngana, iá bhu kanga a mesena ku ku mona.

²¹ Muène-phe eneʼoso u a vutuila, uixi: Mamʼetu ni phange jami, enhá oso évua o maka ma Nzambi, ni a ma bhange.

Jezú u bateka mabhuku

²² Kizuua kiamukuá, Jezú u di longa ni jixibulu jê mu bote, hé ua ambela uixi: Tu zaukienu ku ngonguenha ia kizanga. Anga a katuka.

²³ O ki aia ni kuvudia-phe, muène u zeka, uia ku kilu. Mu kizanga anga mu sonoka mvula, ia mu bhuka mulenge uavulu, mu bote anga mu sota kuizala ni menha, athu hé a kala bhu kíbhidi.

²⁴ Maxibulu anga eza bhua zeka muène, hé a mu tonesa, exi: Mesene, mesene! Tu fua! Muène anga u tona, u bazela o mulenge, ni njinda ia menha, anga ma batama. Anga ku kala kutululuka kuavulu.

²⁵ Anga uambela o maxibulu mê, uixi: O kuxikana kua mi kala kuebhi? Ene-phe mukonda dia uôma, a bhuuama, anga a di ambela mudiâ, exi: Muenhú muene nanhi, ua bhingi u bazela ni mulenge, ni menha, anga a mu tumaka?

Mukua dimonho mu Ngándala

²⁶ Anga a kuáka mu ixi ia Ngandala, sámbua diê dia lulama ni dia Ngalileia.

²⁷ O kia zubha ku tomboka ku kanga, u takana ni diiala dia mukua bhata kuenhoko, uala ni madimonho. O muenhú tunde okulu kiá kene kuzuata, ka kala mʼonzo, maji u kala ngó mu jimbila, bhu mbalale.

²⁸ O kia mono Jezú, ua te nzongo, anga u fukama bhu pholo iê, u di kola ni dízui dia suina, uixi: Ihi i nga kuata ni eie, Jezú, Monʼa Nzambi ua Suka ku Ukota? Nga ku diondo, kana ku ngi zukutisa!

²⁹ Muène ua zuela kiki, mukonda Jezú ua tumu o nzumbi iaiibha kutunda moxi dia muthu. Kuma o nzumbi ienhiʼii ia kexi ku mu kuata jinga luavulu. Né a mu kutu, a mu ta ku malubhambu ni jingidinhá, muène u batuka-bhu; hé dimonho di mu balukisa mu mikáu ia hatu.

³⁰ Jezú anga u mu ibhula, uixi: Jina dié, eie nanhi? Kuala muène: Kifuẋi! (Muène ua zuela kiki, kuma madimonho mavulu ma mu bokona moxi diê).

³¹ Ene anga a mu dionda kuila kana ku a tumikisa ku mukiukuluku.

³² Bhenhobho anga bhu kala kilunga kia dikota kia jingulu jala mu kúdia mu mulundu bhua zukama. O madimonho anga a dionda Jezú ku a ehela kubokona mu jingulu. Muène anga u a xikina.

³³ Madimonho anga ma tunda mu muthu, hé ma bokona mu jingulu. O kilunga kioso anga ki lundumuka, o jingulu ji di lunduuila mu dikenhe, ji fuila mu menha.

³⁴ A kexi ku jʼinga kia mono kioso kia bhiti, a lenga, anga a ki tanga mu sanzala ni mu ikoka.

³⁵ Athu avulu anga a tunda mù tala kioso kia bhiti. Eza kua Jezú, anga a sanga o diiala, madimonho ma mu tundu kiá moxi diê, ua xikama bhu inama ia Jezú, ua zuata, ua tambula kilunji. Anga a kala ni uôma.

³⁶ Oso a ki mono, anga a kunda akuá kioso kia bhanduluka ió ua salukile ni madimonho.

³⁷ Akua ʼxi iosuʼoio ia Ngandala anga a bhinga Jezú kutunda bhu mbadu jâ, kuma uôma uavulu ua a kuata. Jezú bhenhobho anga u di longa mu bote, u vutuka.

³⁸ O diiala-phe dia bhanduluka ku madimonho, u mu dionda phala a kale-nê. Jezú phe ua mu vutuila, uixi:

³⁹ Ndeie ku bhata dienu, ua kà tange ima iònene ia ku bhange Ngana. O diiala anga u katuka, u fumanesa ku mabhata moso, ima iònene ia mu bhange Jezú.

Monʼ a Jailu, ni Muhatu ua kate o kibhubhe kia manhinga

⁴⁰ Kia vutuka Jezú ua tundu ku sámbua dia kizanga, kifuẋi kia mu tambulula ni ngalasa, mukonda oso muene a kexi ku mu kinga.

⁴¹ Bhenhobho anga bhuiza muthu dijina diê Jailu dikota dia dilombe dia Jijudé bhu sanzala ienhoio. Muène anga u bulukutila bhu inama ia Jezú, u mu dionda kuia ku inzo iê;

⁴² mukonda monʼê umoxi ua muhatu, mukua kuinhi dia muvu ni iiadi, ua kumbama. Kioso-phe Jezú ki aia ni kuenda, kifuẋi ki kala mu ku mu phopheka ku mbandu ni mbandu.

⁴³ Anga bhu kala muhatu uala ni kibhubhe kia manhinga, ua bhange na-kiu kiá kuinhi dia muvu ni iiadi. Jimbongo jê joso ua ji futu ku imbanda, kanabhu-phe ua tena ku mu saka.

⁴⁴ Anga uia kua Jezú u mu zukama ku dima diê, u mu kuata ku muhuhu ua kizuatu kiê, kindala kienhokio-phe, manhinga ma batuka o kubhubha.

⁴⁵ Jezú-phe, uixi: Mukua-hi ua ngi babata? Ene oso kia di tunu, Phetele ni akuá a kexile-nê, exi: Mesene, o kifuẋi ua ki mono ki kia ku phopheka, ni ku dixina-xina, kífua uibhulʼé, uixi: Nanhi ua ngi babata?

⁴⁶ Jezú-phe, uixi: Sai muthu ua ngi babata; kuma ngevu mu mukutu uami mua tundu nguzu.

⁴⁷ O muhatu kia mono kuma ka tena dingi kusuama, ueza ni kuteketa, hé u fukama bhu pholo ia Jezú. Anga u ki tanga bhu pholo ia athu oso, kioso kia mu bhangesa o ku mu babata, ni kioso kieluka kithangana kienhókio.

⁴⁸ Jezú anga u mu ambela, uixi: Monʼami, o kuxikana kué kuene kua ku bhandulula, ndaiʼé ni kutululuka.

⁴⁹ Kioso ki ala hanji mù zuela kiki, bhu tula muthu ua tundu ku bhata dia dikota dia dilombe, uixi: Na Jailu, monʼé uafu kiá. Mesene ku mu talese ngó hadi.

⁵⁰ Jezú-phe kia kivu, uambela Jailu, uixi: Ku kale ni hèle! Kabasa u xikana, mona u bhuluka.

⁵¹ Kia zubha kutula bhu kanga, kʼehela muthu kubokona-nê mʼonzo, kikala ngó Phetele, ni Nzuá, ni Tiiaku, ni tata ni mama avu o mona.

⁵² Ene oso anga a kala mù dila, ni ku ta mbundu, mukonda dia kamona. Muène-phe, uixi: Ki mu dile; mona kàfu, uaii ngó ku kilu!

⁵³ Anga athu a kala ku muʼolela, mukonda a kʼijiia kuma uafu.

⁵⁴ Muène-phe, uaii, u mu kuata mu lúkuaku; ni dízui dia suina, u mu handekela, uixi: Monʼa Kilumba, balumuka!

⁵⁵ O muenhu uê anga u mu vutukila, hé u balumuka kithangana kienhókio. Jezú anga u tuma ku mu bhana kákudia.

⁵⁶ Tata ni mama avu monʼâ, anga a diuana kiavulu; maji Jezú-phe ua a tendelela kuma kioso kia bhiti, ka ki tangele muthu.