Luka 5 - O Mikanda Ikola

Ximá ni Tiiaku ni Nzuá kia kuata ndumba ia jimbiji, a kaiela Jezú

¹ Kizuua kia kala Jezú bhu mbandu ia kizanga kia Jenezalé, kifuẋi ki mu bhaka bhu ʼaxaxe, eza mù kuívua o maka ma Nzambi.

² Muène anga u mona bote jiiadi jala bhu kibumu kia kizanga; atona-phe a tundu-mu, ala mù sukula o manda mâ.

³ Muène anga u di longa mu bote imoxi, ia Ximá, u mu bhinga kusondoloka, ku kibumu uxa-ku kadikanga kòfele; anga u xikama mu bote u kala mù longa o kifuẋi kiemana ku kibumu.

⁴ Kia zumbuka o kuzuela, uambela Xima, uixi: Tabhula-ku dingi ku musanza kuala menha a zongo, eie ni akuenu, mu te manda mu kutamba.

⁵ Kuala Ximá: Mesene, tua kalakala usuku uoso, ki tu kuata kima. Maji kuma eie ua kiambe, eme nga-nda kutumaka, tu ta dingi o manda.

⁶ O kia zubha-phe ku ma ta, muafu ndumba ia jimbiji; o manda anga ma sota kutanduka.

⁷ Anga a bhalula akuá ala mu bote ia mukuá, nʼeze ku a kuatekesa. Anga eza, ezalesa bote jiiadi joso katé ja kambe kòfele mu kuboba.

⁸ Ximá Phetele-phe kia ki mono, u fukama bhu inama ia Jezú, uixi: Ngi tundile, Ngana, bhu mbandu iami, mukonda eme ngi mukua ituxi.

⁹ Mukonda Ximá kimbuua kia mu kuata, kumoxi ni akuá oso aia-nê, mukonda dia jimbiji jafu mu uanda.

¹⁰ Kiene kimoxi ue ni Tiiaku ni Nzuá, anʼ a Zebedeu, akua kisangela ni Ximá, a diuana uê. Jezú anga uambela Ximá, uixi: Ku kale ni uôma, tunde lelu ku pholo ua-ndu kala u mutona ua athu.

¹¹ Ene kia zubha kubhixidisa o jibote ku kibumu, iene ioso a ixa, a kaiela Jezú.

Mukua kikunzu a mu saka

¹² Jezú kia kala mu mbanza imoxi kuenhoko, bhu kala muthu, mukutu uê uoso uala kikunzu, o kia mono Jezú anga u di fidimika pholo bhoxi, u mu dionda, uixi: Ngana, Eie ki u ki mesena, ua ki soko, o ku ngi bhana kudisanza.

¹³ Jezú anga u sunununa lúkuaku, u mu babata, uixi: Nga mesena muene, disanze. Kithanganʼokio kikunzu kiê kia-bhu.

¹⁴ Bhenhobho Jezú u mu ambela, uixi: Kiki ku ki tangele muthu. Maji ndé kua nganga, u mu bhinge kuila a ku kengelele kiambote. Eie nda u bhange kiua o ujitu kala kia tumu Mozé mu Kitumu, mbé o ku dʼidikiza kua ene oso kuila ni kidi muene eie ua di sanze.

¹⁵ Sumbala Jezú uazuela kiki, fuma ie-phe hanji iaii ni kusambuka ku mbandu joso, o ifuẋi iavulu anga i kala mù kuiza ku mu ívua, ni ku a saka o mauhaxi mâ moso.

¹⁶ Muène-phe u kala mu kuomboloka, uia mu mikáu ia hatu mu kusamba.

O haxi ia kila

¹⁷ Kizuua kia mukuá Jezú u kala mù longa. Bhenhobho jifalizeu jimoxi-mu ni jimesene ja Kitumu ja mu xikamena, ja tundu mu jisanzala joso ja Ngalileia, ni ja Judeia, ni ku Jeluzaleme. O nguzu ia Ngana anga i kala ni Jezú mu kusaka o jihaxi.

¹⁸ Anga bhu tukuluka athu, o mukuá uala haxi ia kila, a mu ambatela bhu hama iê; anga a sota kubokona-nê mʼ onzo nʼ a mu tule bhu inama ia Jezú.

¹⁹ O kia lémbua kumona bhuoso bhua bokuena, mukonda dia athu kuvula, a banda ku thandu dia ʼnzo, a zambumuna mateia, anga a mu tulula ni hama iê mu ʼaxaxe ka athu, hé a mu tula bhu pholo ia Jezú.

²⁰ Muène kia mono o kuxikana kuâ, kuma kuavulu, u ambela o haxi ia kila, uixi: Kamba diami, ituxi ié iòloloke!

²¹ Jimesene ja Kitumu ni jifalizeu anga a kuata kudiodia mudiá, exi: Nanhiʼú u tanga o isunji ia difu kiki? Kana-ku dingi muthu u tena kuloloka ituxi, kikale Nzambi ngó ubheka uê!

²² Jezú-phe kievu o kulongolola kua miẋima iâ, u a vutuila, uixi: Jiphata jahi, ji mua kuata ku miẋima ienu?

²³ Kiauabha-bhu o ku ki bhanga, kiebhi? O kuila: Ituxi ié iòloloke, inga o kuila: Eie balumuka, u ende?

²⁴ Phalʼenu-phe mu kʼijiie kuma eme ngi Monʼa Muthu ngala ni kutena mu ngongo, kua kuloloka o ituxi, eie u haxi: Balumuka, u zangule hama ié uie ku bhata dié.

²⁵ Bhenhobho haxi anga i balumuka bhu pholo ia athu oso, u futa o hama iê bhua zekele, anga uia ku bhata ni kuximana Nzambi.

²⁶ Oso muene anga a bhuuama, a kala mù ximana Nzambi; anga a zuela ni uôma uoso, exi: Lelu tua mono madiuanu!

Levi a mu ixana. U bhanga fesa mʼ onzo iê

²⁷ Kia bhiti ima iíi, Jezú u tunda, anga u sanga mukua kutambula lubhaku, dijina diê Levi, ua xikama bhu kididi kia kutambuila o lubhaku, anga u mu ambela, uixi: Ngi kaiele.

²⁸ Muène anga u xa ioso, u balumuka, u mu kaiela muène.

²⁹ Levi anga u mu bhangela fesa ia dikota mʼonzo iê; akua kutambula o lubhaku avulu ni athu amukuá hé a kala ku meza ni muène.

³⁰ Bhenhobho, jifalizeu-phe ni asoneki a mu longolola, hé ambela jixibulu jê exi: Phala-hi muia mu kúdia ni kúnua kumoxi ni akua kutambula o lubhaku ni akua ituxi?

³¹ Jezú anga u a vutuila, uixi: Oso a disanze ka bhindamena kimbanda (musaki), a mu bhindamena ió a kate.

³² Eme ki ngeza mú kuixana athu aiuka, ngeza mú kuixana akua-ituxi, nʼa diele ituxi iâ.

O kujila

³³ Ene anga a mu ambela, exi: Jixibulu ja Nzuá ene mú fula kúdia ni kúnua, nʼa nange mu kusamba; jixibulu ja jifalizeu ue kiene; eie-phe jixibulu jé ki ji fula dingi kúdia ni kúnua.

³⁴ Jezú anga ua ambela, uixi: Kífua anʼa sala ia ukaza mu tena ku a fudisa kúdia ni kúnua, kioso o dibhanga hanji aia-nê mu ʼaxaxe kâ? Nga fika ki ki xikina.

³⁵ Sai-phe izuua, ia-nda kuizaku, i bhinga o dibhanga a mu katula mu ʼaxaxe kâ; izuuʼoio-phe kiene kià ka fula kúdia ni kúnua.

³⁶ Anga ua tela kifika, uixi: Kana muthu u tandula kibanji ku mulele uobhe, nʼa ki te ku mulele Uòkulu; o kiela u ki bhanga, mulele uobhe ua u zange, kuma o kibanji kiobhe, ku mulele Uokulu, ki kia fuama-ku.

³⁷ Kana muthu ue u ta vinhu iòbhe mu isudi iòkulu; o ki ela a ki bhanga, o vinhu iòbhe i bazesa isudi, ni vinhu-phe i texika, ni iene isudi i-fua.

³⁸ Vinhu iòbhe-phe kikale a i ta mu isudi iòbhe.

³⁹ Kana muthu ue uanu vinhu iòkulu, kindalʼiki, hé uinda kiá iòbhe. Mukonda uila, uixi: Iòkulu iala kota mu kuuabha.