Luka 23 - O Mikanda Ikola

Jezú bhu pholo ia Pilatu

¹ Mundu uâ uoso anga a balumuka, hé aia ku mu bheka kua Pilatu.

² O kuenhoko anga a kuata ku mu tatela, exi: Muthu iú tua mu kuata ni kufunhisa o kifuẋi kia mundu uetu. Uala ku fudisa athu kubhana lubhaku lua Sézalu, uixi: Eme-muène ngi Kristu, ngi muenexi.

³ Pilatu anga u mu ibhula, uixi: Eiemuène u muenexiʼ a Jijudé? Muène u mu vutila, uixi: Eʼ muène ua ki ambe.

⁴ Pilatu anga uambela o makota ma jinganga, ni kifuẋi kia athu ala-bhu, uixi: Muthu iú ki nga mu mono ni kituxi ki tokala ku mu êlesa.

⁵ Ene-phe a jiza dingi kiavulu, exi: Muène uala ku balukisa mundu mu Judeia ioso. Uandekela tunde ku Ngalileia, o kiki iú kunu.

Jezú bhu pholo ia Helode

⁶ Pilatu ki evu kiki, uibhula, uixi: O diialʼidi, mbé mukua Ngalileia?

⁷ O ki evu kuma Jezú ua tokala mu sengu ia usobha ua Helode, u tuma ku mu bheka kua Helode, kuma muène ua kexile mu Jeluzaleme mu izuua ienhoio.

⁸ Helode-phe kia mono Jezú, u sanguluka kiavulu, mukonda uandeka okulu ni kuinda ku mu mona, kuma uévua jinga o fuma iê. Anga u fika kuma ua-nda kumona kipha kioso-kioso, jezú kia bhanga.

⁹ Anga u kala mu ku mu ibhudisa maka mavulu. Muène-phe ka mu vutuila kima.

¹⁰ Makota ma jinganga ni jimesene ja Kitumu emana bhenhobho, a suina ni ku mu tatela ima iavulu ia nguzu.

¹¹ Helode-phe ni masoladi mê, hé a mu tobhesa, a mu bhanga kasèkelu, a mu zuika izuatu ia kukemba, hé a mu vutula dingi kua Pilatu.

¹² Kizuua kienhókio Helode ni Pilatu a kuata dingi ukamba, kuma bhua kexile hanji unguma mudiâ.

Jezú a mu vutula dingi kua Pilatu

¹³ Pilatu anga u bhongolola dingi makota ma jinganga, ni afundixi, ni akua-diembu, uixi:

¹⁴ Enu mua ngi bhekela diiala didi, muexi mukua kufunhisa o mundu. Eme-phe nga mu tokuesa bhu pholo ienu, maji ki ngi mu mono ni kikuma mu ima ioso i mua mu tatela.

¹⁵ Katé ni Helode, kuma ka mu sange ni kikuma, ua mu vutula dingi ko-kuami. Mukonda dia kiki, kia lomboloka kuila muthu iú, kituxi-phe kia tokala ku mu jibha, ki ki moneka.

¹⁶ Nga-nda ku mu betesa-phe hanji, anga ngi mueha, nʼ aiê. [

¹⁷ Mukonda Pilatu muene, uene mù kuila mu fesa u a jituina pelezu imoxi.]

¹⁸ Bhenhobho ene oso-phe a di kola kumoxi, exi: Iú a mu jibhe! U tu ehela Balaba!

¹⁹ (O Balaba-phe muthu a mu te mu ʼaleia mukonda dia kukituka mu mbonge, ni kuta kijibha.)

²⁰ Pilatu anga ua a zuelesa dingi, mukonda ua mesena kueha Jezú.

²¹ Ene-phe a di kola dingi, exi: A mu te ku dikulusu! A mu te ku dikulusu!

²² Pilatu anga ua ambela lua katatu, uixi: Phala-hi! Kima kiahi kiaiibha kia bhange uenhú? Ki ngi mu mono ni kituxi ki tokala ku mu jibha! Nganda ku tuma ku mu betesa, hé ngi mueha.

²³ Ene-phe a jiji ni kukola mu kubhinga ni mázui ma suina, kuma a mu te ku dikulusu. Mázui mâ anga ma lenda.

²⁴ Pilatu anga u batula kuma, a mu bhange kioso ki andala ene.

²⁵ Anga ueha iú a mu tele mu ʼaleia mukonda dia kubaluka ni kujibha, kuma muène a mu bhingi. O Jezú u mu bhana mu ku mu bhanga o vondadi jâ.

Jezú mu njila ia kuia ku Ngolongota

²⁶ Bhenhobho Jezú hé a mu ambata. O kia kala mu kuia-nê, a kuata-bhu muthu, Ximá, mukua Silene, ua mu tunda ku tutu. Anga a mu tuika o dikulusu, phala ku di ambata ku dima dia Jezú.

²⁷ Anga ku mu kaiela kifuẋi kiavulu S kia athu. Mu kifuẋi hé mu kala ni ahatu a kuata ku mu dila, ni kubhana jingololo.

²⁸ Jezú anga u bilukila kuala ahatu, uixi: Enu mu anʼa ahatu a Jeluzaleme, ki mu ngi dile Eme! Di didienu enʼ uenu, ni anʼ enu!

²⁹ Kuma kù kuiza izuua, anda kuila: Azediua ahatu a jimbaku, ni mavumu ma kambe kuimita, ni mele ma kambe kuamuisa!

³⁰ Kithangana kì kiza, athu a kà mateka kuambela o milundu, exi: Tu lundumukinienu. À kambela milundu iofele, exi: Tu vunginienu.

³¹ Mbata se a bhanga kiki ku muxi ua uisu, a kà bhanga kiebhi ku muxi ua kukuta?

³² Anga ambata ue kumoxi ni Jezú, kiiadi kiamukuá, akexile imbokoto, phala ku a jibhila kumoxi ni muène.

³³ Kia bhixila bhu kididi a kixana Kibholongonho, bhene bhua mu phaphela ku dikulusu ni muène ni imbokoto, kimoxi ku madilu mê, o kiamukuá ku kiasu.

³⁴ Jezú-phe uixi: Tata, athu iá a loloke. Mukonda kejiia kioso kiala kubhanga! Ene anga a uana izuatu iê ni ku i tela jisorte.

³⁵ Kifuẋi bhenhobho kiemana ni kutala. Afundixi anga a kala mu ku mu olela ni ku mu lalula, exi: Ua kexi mu kubhulula athu. A di bhulule-ze muène, se muène muene o Kristu a mu sola kua Nzambi.

³⁶ Masoladi ue ma mu tobhesa. A mu zukama, hé a mu idikiza vindangele kala anda ku mu bhana-iu, exi:

³⁷ Se eʼmuène u muenexi ua Jijudé, di bhulule!

³⁸ Ku thandu dia mútue uê, kukala kadibaia kòsoneke: Muenʼiú Muenexi ua Jijudé.

³⁹ O ifumbe ue a i nhengeneka bhenhabha; bhu kala kimoxi ki mu lebhula, uixi: Abha kʼeie muène u Kristu? Di bhulule hanji, ni etu uetu.

⁴⁰ Kifumbe kiamukuá-phe u mu bazela, uixi: Kífua, eie kuala ni uôma ua Nzambi? Ua fika kuila eie ua-lu fua ue kalunga kene kamoxi ni muène?

⁴¹ Etu mu kidi, o hadi ietu ia tu tokala muene, mukonda a tu bhange kia fuama mu ikuma ietu, muthu iú-phe, ka bha nge kima kiaiibha!

⁴² Uixi dingi: Jezú, ngi lembalale, hádia ki uiza ku Usobha mu Utuminu ué.

⁴³ Jezú anga u mu ambela, uixi: Kidi ngi kuambela: Lelu muene ua kà kala ni eme ku kididi kiambote mu Palaízu ia Nzambi.

O ufuilu ua Jezú

⁴⁴ Kienhiki kuila kua kambe kiá ngó kubhixila mu ola ia mediia, o dikumbi dia lémbua kumuika, anga mʼoxi ioso muiza kitombe katé mu ola ia katatu, ku kièmba.

⁴⁵ O mvéu mu Tembulu, anga i tanduka mu ʼaxaxe.

⁴⁶ Bhenhobho Jezú anga u di kola ni dízui dia suina, uixi: Tata, nzumbi iami nga i bhana bhu maku mé. Ki a zubha ku ki zuela, anga u batuka o muenhu.

⁴⁷ Kabhitangu ka kilômbo kia akua Loma, kia mono kioso kia bhiti, ua ximana Nzambi, uixi: Kidi kiene, muenhú ua kexi muthu uaiuka.

⁴⁸ Kifuẋi kioso ue kia bhongoloka mu kutala, kia zubha kumona ioso ia bhiti, lamba dia a kuata, a muangana ni ku di bunda bhu jithulu.

⁴⁹ O makambʼoso a Jezú, ni ahatu a mu kaiela tunde mu Ngalileia, emana bhenhobho mu kanga, ni kutala o ima ioso iíi.

Jezú a mu fûnda

⁵⁰ Anga kuiza muthu, dijina diê Zuze, muadiakime ua tokala mu Kionge kia Jitata, muthu uambote, uaiuka.

⁵¹ Muène ue ka xikanene ni akuá mu kikutu kia tele, ni ioso ia bhange. Muène mukua Limateia, sanzala ia Judeia, uala mù kinga o Utuminu ua Nzambi.

⁵² Muthu iú anga uia kua Pilatu, u bhinga o mukutu ua jezú.

⁵³ Kia zubha ku u katula ku dikulusu, u u futa mu dilasola dia linhu, anga u mu tula mu mbila iòjikule mu ditadi dia kolo. O mu mbilʼ oio ka tediâ-mu luua muthu, tunde kia i jikula.

⁵⁴ Kienhokio-phe kizuua kia sesa, kia kuidika o Phasu, o kia Sábhalu ue kí mateka kiá kúkia.

⁵⁵ Ni ahatu a tundile-nê ku Ngalileia, a kaiela Zuze, anga a tala o mbila, ni kioso kia bhake-mu o mukutu ua Jezú.

⁵⁶ Anga a vutuka ku bhata, hé a iudika ima ia uabha o mazumba phala o mukutu ua Jezú. Kia Sábhalu anga a ki nhoha, kala kia tumu o kijila.