Luka 18 - O Mikanda Ikola

O mufundixi ua mukua-kaxixi ni Mutudi uajiji

¹ Jezú anga ua tela kifika phala ku a longa kuma a tokala kusamba jinga, sé kubhuila;

² uixi: Mu mbanza imoxi mua kexile mufundixi ua kambe uôma ua Nzambi, ka xikina ue kubhana ujitu ku muthu.

³ Anga mu mbanza muenhomo mu kala ni mutudi ua muhatu, u kala mú kuiza jinga kua muène, uixi: Ngi fundise kiambote ni nguma iami.

⁴ Kithangana kiavulu muene, ka xikina ku mu ívua. Maji o ku pholo-phe kueza kunu, uamba ni muẋima uê, uixi: Sumbala ki ngala ni uôma ua Nzambi, o muthu ue ki ngi mu xila.

⁵ Maji, kuma o mutudi iú ua-lu ngi zukutisa, ngi mu fundisa, phala muène keze dingi izuua ioso mu ku ngi zukutisa.

⁶ Ngana uixi: Ívua kia zuela o mufundixi ió ua mangonha.

⁷ Abha, Nzambi u kamba kufundisa athuʼê ua a sola, a di kola-kola kua muène mu muanha ni mu usuku, anga ua zokelela mu milonga iâ? Manhi u kokoloka mu ku a banda?

⁸ Ngi mi ambela-phe kuma u a fundisa lusolo, ni kubatula kiambote o milonga ku mbandu iâ. Hinu-phe kʼ iza Monʼ a Muthu, o kuila u sanga kuxikana mu ngongo?

Falizeu ni mukua lubhaku

⁹ Jezú anga u ta dingi o kifikʼiki, kiatokala amoxi a di fiiala o kuiuka, kuma ene abhangi-a-mbote, anga a tènda akuâ, uixi:

¹⁰ Mala kiiadi a bandele mu Tembulu mu kusamba. Umoxi falizeu, o ua mukuá mukua kutambula lubhaku.

¹¹ O falizeu anga uimana, u kala mú samba ni muẋima uê kiki: Nzambi nga ku sakidila, mukonda ki ngala kala athu amukuá, ala mií, inguángua, ati-a-jiphànda. Nga ku sakidila dingi, Ngana, kuma o mukua kutambula lubhaku iú ngó, eme ki nga sokela-nê.

¹² Eme ngi jila luiadi ku semana; ngi bhana kua Nzambi o dijimu dia ima iami ioso i ngi mona.

¹³ O mukua kutambula lubhaku-phe, uemana dikanga, ka bhumina kuzambula mesu ku diulu, maji u di bunda bhu thulu, uixi: Nzambi, ngi kuatele henda, eme ngi mukua ituxi.

¹⁴ Ngi mi ambela kuma, iú ua kulumuka ni muẋima uazele ku bhata diê, o mukuá, kana! Mukonda uoso u di zangula, a mu tulula; o uoso-phe u di tulula, a mu zangula.

Jezú dikamba dia ana-ndenge

¹⁵ Anga athu amoxi-mu a mu bhekela ue ana-ndenge, mbé muène ni a a babate. Jixibulu-phe kia ki mono, a kala mu ku a bazela.

¹⁶ Jezú-phe hé uixana ana ndenge bhu mbandu iê, uixi: Ambulenu ana-ndenge, eze ko-kuami! Kana ku a fudisa, mukonda o Utuminu ua Nzambi ua tokala oso a di fangana ni tuana tutu.

¹⁷ Kidi muene ngi mi ambela: Uoso u kamba kutambulula o Utminu ua Nzambi kala kamona ka ndenge, ka kà mona-mu kididi.

Mona-ngana, mukua itadi

¹⁸ Anga dikota dimoxi ku Jijudé u mu ibhudisa, uixi: Mesene iambote, eme ngi bhanga kiebhi, phala kulundula o muenhu ki uábhua?

¹⁹ Jezú anga u mu ambela, uixi: Mukonda diahi ua ngʼ ixana ngi muthu ua mbote? Kana-ku dingi muthu ua mbote, kikale umoxi ngó, muène Nzambi.

²⁰ Eie uejiia o ijila? Kana kuta phànda; Kana kujibha muthu; kana kunhana; kana kubhana umbangi ua makutu; bhana tatʼ enu ni mamʼ enu ujitu.

²¹ Uixi: Ima ioso iíi, nga i kumbidila tunde mu undenge.

²² Kia kʼivu, Jezú u mu ambela, uixi: Kua ku kambe hanji kima kimoxi: Sumbisa ioso i uala na-iu, o kitadi u ki uanene o jingadiama, phala u kale ni jimbongo mu diulu. Nda uize kiua, u ngi kaiele eme.

²³ Muène-phe kievu kiki, malamba a mu kuata; mukonda mukua itadi iavulu.

²⁴ Jezú kia mu mono ua susula, uixi: Kubhonza kuahi, ala ni itadi kubokona mu Utuminu ua Nzambi!

²⁵ Inda o kamelu kubhita bhu dizungu dia nguia, ki ki bhonzo kala o mukua itadi kubokona mu Utuminu ua Nzambi.

²⁶ Ene oso a kivu, exi: Se kiene, nanhi u tena kubhuluka?

²⁷ Muène-phe, uixi: Ima athu a i tokoka, kua Nzambi-phe i xikina.

²⁸ Kuala Phetele, uixi: Tala, etu tua xi o ima ietu, etu tua ku kaiela.

²⁹ Jezú anga ua ambela, uixi: Kidi muene, ngi mi ambela: Kana-ku muthu uaxi inzo, mba muhatu, mba jiphange, mba jitata, mba ana, mukonda dia Utuminu ua Nzambi;

³⁰ ni a kambe kutambula iala kotʼèlele mu mivu iíi, o mu mivu ià keza-ku, muenhu ki uàbhua.

Jezú u tanga kioso kianda kufua

³¹ Jezú anga u bhongoluela o kuinhi dia xibulu ni kiiadi bhu mbandu iê, ua ambela, uixi: Mua mono, tuala kuia mu Jeluzaleme, ima ioso-phe iòsoneke mu jipolofeta, ia tokala Monʼ a Muthu, ianda ku mu bhita koko.

³² Kuma a-nda ku mu bhana bhu maku ma matumbu, ene a-nda ku mu sebulula, a mu bhanga ufusa, a mu ta mathe;

³³ A-nda ku mu bhana mixinga, a-nda ku mu jibha. Maji mu kizuua kia katatu-phe, u fukunuka.

³⁴ O maxibulu-phe, ima ioso iíi ka ivu; mukonda makʼ ama medi kala mòsueke, ki ma a jimbulukila.

Kifôfo kia Jedikó

³⁵ Mu kuzukama ku Jedikó, a sanga kifofo ua xikama bhu mbandu ia njila mu kubhinga jimola.

³⁶ O ki evu athu avulu a mu bhita, uibhudisa mba kima kiahi kiná.

³⁷ Anga a mu ambela kuma Jezú dia Nazalé uala kubhita.

³⁸ Muène anga u di kola, uixi: Jezú, Monʼ a Davidi, ngi kuatele henda!

³⁹ Akexile mu-ia ku pholo anga a mu temena, exi: Di xibhe! Muène-phe u di kola dingi kiavulu, uixi: Monʼ a Davidi, ngi kuatele henda!

⁴⁰ Jezú anga uimana, u tuma ku mu bhekela-nê. O kia zukama, u mu ibhudisa, uixi: Uandala ngi ku bhanga kiebhi?

⁴¹ Muène uixi: Ngana, ngandala dingi o kumona!

⁴² Jezú u mu ambela, uixi: Tambulaku o kumona. O kuxikana kuê kua ku bhana ku di sanza.

⁴³ Kithanganʼokio o kumona kuê, kueza, anga u mu kaiela ni kuximana Nzambi. Athu oso ue, kia ki mono, a kala mu xamana Nzambi.