Luka 15 - O Mikanda Ikola

Jezú u tambulula akua ituxi

¹ Akua kutambula lubhaku ni akua ituxi oso muene, a kexile mú zukama Jezú phala ku mu ívua, hé u dia-nâ kumoxi.

² Jifalizeu ni akua kulonga o Kitumu a kala mù ngonga, exi: Muthu iú u tambulula akua ituxi, hé u dia-nâ.

³ Jezú anga u a tela kifikʼiki, uixi:

⁴ Mukua-hi mudienu, se uala ni hama ia mbudi, anga bhu mu jimbila imoxi, manhi u kamba ku xa o makuinhʼivua nʼivua, ni aie mú sota iíi ia jimbidila, katé kia i sanga?

⁵ O kia i sanga, u i ta bhu isuxi, hé uiza na-iu ni kusanguluka.

⁶ O kia bhixila ku bhata, uixana makamba mê ni akua-diembu diê, uixi: Sangulukenu ni eme, mukonda nga sange o mbudi iami ia jimbidile.

⁷ Nga mi ambela, kuma kiene ue ku diulu, o kusanguluka kuâ kuvula dingi, mukonda dia muthu umoxi ua diela ituxi iê, ki ki soko ni makuinhʼivua a muthu nʼivua aiuka, ka bhingi dingi kudiela.

Kifika kia kiphaka kia jimbidila

⁸ Mba muhatu kuẋi uala ni kuinhi dia iphaka ia phalata, se ua jimbidisa kimoxi, u kamba ku ki sota? Mu ku ki sota, u sendela kandeia, ni kukomba mʼ onzo, ni kusota makidi-kidi, katé ki a ki sanga.

⁹ O kia ki sanga, uixana o makamba mê, ni akua-bhata diê, uixi: Ngi tanesienu, mu sanguluke kumoxi ni eme, mukonda nga bongo o kíphaka kiami kia ngi jimbidile.

¹⁰ Nga mi ambela kuma, kiene ue, o kusanguluka kuvula ku pholo ia ji-anjo ja Nzambi, mukonda dia mukua-ituxi umoxi u diela.

Kifika kia mona ua mukuozanga

¹¹ Jezú uixi dingi: Muthu ua kexile ni anʼ ê aidi.

¹² Kizuua kimoxi, ndenge anga ua ambela tatʼ â, uixi: Tatʼetu, ngi bhane o mbandu ia jimbongo ioso i nga tokala kulundula. Anga tatʼâ u a uanena o dibhata diê.

¹³ Kia bhiti tuizuua, o ndenge u bhongolola ioso, anga u katuka njila ia kuia ixi ia dikanga. Kuenioko anga u zanga-zanga itadi iê mu ulaji.

¹⁴ Kia zubha kuzanga ioso, mʼ oxi muná mu iza nzala iónene! Muene anga u kala mu ku bhindama.

¹⁵ Anga uia ku di umba ni mukua ʼxi kuinhoko; ió anga u mu tuma ku mábhia mê mu kuinga jingulu.

¹⁶ Muène bhenhobho uinda uikuta ni jimbuende ja kexi mu tela o jingulu. Ni jimbuende jene-phe, kana muthu ua mu bhana-ju.

¹⁷ Kia zubha kusunga kilunji-phe, uixi: Akalakadi oso ianá ku bhata dia tatʼetu, ala ni kúdia kuâ kua soko, kua subhuka, eme-phe kunu, eme ngi-fua ni nzala!

¹⁸ Ngi zanguka, ngiia kua tatʼetu, hé nga kèla: Tatʼetu, nga te kituxi ku diulu kua Nzambi, ni mu ngongo ko-kué.

¹⁹ Ki ngi fuama dingi ku ngʼixana ngi monʼé. Ngi bhake kiá ngó bhu kididi kia mukalakadi ué.

²⁰ Anga u balumuka, hé uiza kua tatʼâ. Ki ala mú kuiza-phe, hanji uala dikanga, tatʼâ ua mu mono. Anga henda ia monʼê i mu kuata, u lenga lusolo, u di bhubhala-nê, u mu bhana jibeju.

²¹ Mona-phe uixi: Tatʼetu, nga te kituxi ku diulu kua Nzambi, ni mu ngongo kó-kué! Ki nga fuama dingi ku ngʼixana ngi monʼé.

²² Maji o tata-phe, uambela abhikʼê, uixi: Bhekenu, lusolo, kizuatu kia matunda, mu mu zuike-kiu! Mu tienu ue nela mu mulembu ni jisabhatu ku inama!

²³ Bekenu kangombe kanete, mu ka jibhe, tu die, tu sanguluke!

²⁴ Mukonda monʼami iú ua fuile, lelu ua bhana o muenhu; ua texikile, lelu ua moneka. Anga a kuata kubhanga fesa!

²⁵ Kioso imíiʼii ki ia mu bhita, mona ua dikota-phe ua kexile ku mábhia. O mú kuiza, kia zukama kʼonzo, uívua o kuimba ni kutonoka.

²⁶ Anga uixana muthu ku akua-mbèle, hé uibhudisa mba kima kiahi kiná.

²⁷ Kuala mukuambèle: Phangʼié ueza! Tatʼenu-phe iu ua tumu kujibha o kangombe kanete, mukonda ua mu tambulula ni muenhu ni kudisanza.

²⁸ Muène anga u futuluka, nguaiê kubokona! Tatʼâ anga u tunda, u kala mu ku mu bhomba.

²⁹ Muène-phe u kumbulula tatʼâ, uixi: Mivu ioso iíi i nga ku kalakela kala ngi mubhika, kiluua-phe ngi xibhaka ngó kima ki ua ngi tumu. Maji né kienhókio, eie-phe kua ngi bhana né ngó lumoxi, kahombo ka kubhanga fesa ni makamba mami.

³⁰ Lelu-phe kieza monʼé, ió ua zange o itadi ié ni jindumbu, eie ua mu jibhila kiá kangombe ka nete!

³¹ Kuala tatʼâ: Monʼami, eie izuua ioso uene ni eme; ima iami ioso ié.

³² Tua fuama-phe kubhanga fesa iíi, ni tu londekese o kusanguluka kuetu. Mukonda phangʼié iú ua fuile, lelu ueza ni muenhu; ua texikile, lelu ua moneka!