Luka 14 - O Mikanda Ikola

Jezú u saka haxi ia menha

¹ Kizuua kimoxi, kia Sábhalu, Jezú u bokona mʼonzo ia dikota dimoxi dia jifalizeu, phala kùdia-nê mbolo. Anga mundu a kala mù tonginina Jezú.

² Bhenhobho-phe, bhu pholo iê bhu kala muthu ua kate uhaxi ua menha, ua bhingi o mukutu uoso, ni maku ni inama ua jimbi.

³ Jezú anga uibhula jimesene ja Kitumu, ni jifalizeu, uixi: Kia tokala mu Kitumu kietu o kusaka kia sabhalu, inga kana? Ene-phe a di xibhâ, ka vutula kima.

⁴ Muène-phe u tula lúkuaku ku haxi, u mu saka, anga u mu tuma kuiê.

⁵ Anga ua ambela ene, uixi: Mukua-hi mudienu, u kala ni monê mba ngombe iê, i di bhala mu dikungu, u kamba ku i katula-mu kindala, mu kizuua kia Sábhalu?

⁶ Anga a lémbua ku mu vutuila o maka enhá.

O ku di tolesa

⁷ Jezú anga ua tela kifika, oso asonhi a fesa, muène kia batekela kuma ala kusola o ididi ia ukota ia kuxikama, uixi:

⁸ Se muthu ua ku ixana ku fesa ia ukaza, ku sole kididi kia suku ku pholo. Sumba muène uexana dingi mukuenu ua ku tundu eie mu ukota.

⁹ O uoso ua kuixana, ni eie ni muène, kia-nda kuiza ni a ku ambele, uixi: Muenhú mu bhane kididi kiê. Eie-phe jisonhi ni ji ku kuate, ki u setuka dingi kididi kia tolo.

¹⁰ Inda se a kuixana, eie uia hé u xikama kididi kia tolo. O kʼiza ió ua kuixana, u kuila: Kamba, banda dingi ku thandu. Kiókio eie-phe a ku muesa dingi ujitu bhu pholo ia akuenu oso u ua xikama-nâ ku meza.

¹¹ Mukonda uoso u di zangula, a mu tulula; o uoso-phe u di tolesa, a mu zangula.

¹² Jezú anga uambela ue iu ua mu kuvitala, uixi: Ki u bhanga njandalu mba seialu, kana kuixana o makamba mé, mba jiphange, mba jindandu, mba akua diembu dié a mono itadi. Imoxi ene uâ a ku kuvitala dingi ni a ku bhane vutuilu ia mbote ioso i ua a bhange.

¹³ Ki u bhanga-phe fesa, exana jingadiama, ni inema, ni atenguna, ni ifôfo;

¹⁴ nda u kale ni kuzediua. Mukonda ene ka tena ku ku vutuila, mu kufuta ki ua a bhange. Maji vutuilu iê-phe ua kà i tambula kua Nzambi, kizuua ki fukunuka athu oso abhangi-a-mbote.

Kifika kia seialu ia dikota

¹⁵ Ki evu o makʼama, muthu uamukuá uala-nê ku meza, u zuela, uixi: Ua zediua uoso u dia mbolo ku meza mu Utuminu ua Nzambi.

¹⁶ Jezú-phe u mu ambela, uixi: Sai muthu ua bhangele seialu ia dikota, anga u kuvitala athu avulu.

¹⁷ Mu ola ia kuseiala anga u katula mubhikʼê kuambela asonhi, kuila: Zenu, ima ioso iabhi kiá!

¹⁸ Ene oso-phe a kuata ku di tata mu umoxi-umoxi. Eme iú: Nga sumbu díbhia, dia bhingi ngiia ku di tala. Nga diondo, a ngi loloke-kiu.

¹⁹ Eme iú: Nga sumbu ji-junda jitanu ja jingombe, phala kudima na-ju, ja bhingi ngiia ku ji lola, mba ji tena kukalakala kiambote. Nga diondo, a ngi loloke-kiu.

²⁰ Eme mukuá: Nga sakana muhatu kindala, ki nga tena kuia-ku.

²¹ Mubhika anga uiza, u tudila ngana iê ima ioso iíi. Kienhókio mukua dibhata, kuma njinda ia mu kuata, uambela mubhikʼê, uixi: Tunda malusolo, u bhite mu jinzunga, ni mu ikanzu ia mbanza, u ngi bhekele bhabha jingadiama, ni inema, ni ifôfo, ni atenguna.

²² Ki bhua bhiti kithangana, mubhika anga uiza, hé uambela ngana iê, uixi: Ngana, kioso kia ua tumu nga ki bhange kiá, hanji-phe sai kididi.

²³ Ngana iê, uixi: Ndé dingi mu ikoka, ni mu tunjila, athu oso u a landameke kubokona, mbé onzo iami ni izale.

²⁴ Mukonda nga mi ambela kuila, ene osuʼó a a kuvitalele, ki bhuala dingi muthu u lola o seialu iami!

Kioso Jezú kia xindi o Jixibulu jê

²⁵ Kifuẋi kiavulu anga ki kala mú kuila-nê kumoxi. Jezú anga u sakuka, ua ambela, uixi:

²⁶ Se muthu uiza kókuami, anga u kamba ku beta ku ngi zola eme, o tatʼâ ni mamʼâ, ni mukajiʼê, ni anʼê, ni jiphange jê ja mala ni ja ahatu ni a kale ndenge, katé ni muenhu uê-muène, ka tena kukala xibulu iami.

²⁷ Uoso ue u kamba kuambata dikulusu diê, ni ku ngi kaiela, ka tena kukala xibulu iami.

²⁸ Kuma nanhi muthu mudienu kiandala kutunga sabhalalu, u kamba kuxikama hanji, ni kuxinganeka o ngasu, mbé kutala se uala ni kia soko ku i zubha.

²⁹ Kia kamba ku ki bhanga, anga u ta disesa, mu kuiza-ku, o ku i zubha, ka tena, oso a i mona a mu bhanga kasèkelu, exi:

³⁰ Ialʼú, uandekele kutunga, o kuzubha ua lémbua!

³¹ Mba sobha ki aia kulua ita ni sobha iamukuá, ka xikama hanji, ni a di longese ni jitata ja diembu diê, mba muène uala ni kuinhi dia midi, utena kúlua ni ió ua mu kane ni makuinhi-aiadi a midi?

³² Kia mona ka tena, kioso mukuá ki ala hanji dikanga, u katula jiphunga, hé u tuma kuibhula kioso kia mu xindi ni a kale ku paze.

³³ Kiene ue, uoso mudienu u kamba ku di tuna ima ioso iala na-iu, ka tena kukala xibulu iami.

O mongua ua kambe kutouala

³⁴ O môngua ua uabha! Môngua-phe, ki u bhua o kutouala kuê, uene a u toua-hi?

³⁵ Ki u uabhela dingi ku u ta ku mavu a kudima, né ngó bhu dixita, ki kale a u texi. Uoso uala ni mátui a kuivila, évue.