Luka 11 - O Mikanda Ikola

Kioso ki tu samba

¹ Kizuuʼiki, Jezú u kala kididi mù samba. O kia zubha kusamba, xibulu iê imoxi u mu ambela, uixi: Ngana, tu longe o kusamba, kala Nzuá kia longele o jixibulu jê.

² Jezú anga u ambela, uixi: Ki mu samba, muila kiki: Tata ietu, uaia ku maúlu, eneʼoso dijina diê a di kôlese. O Utuminu uê, uize.

³ Tu bhane o kúdia kuetu kua kizuua ni kizuua ku tua bhindamena.

⁴ Tu loloke o ikuma ietu; mukonda etu uetu tu loloka uoso u tu sombola. Ku tu ehele ku di bhala mu ku tu diangula.

⁵ Jezú u a ambela dingi, uixi: Xinganekenu hanji, se muthu mudienu u kala ni dikamba diê, anga uia kua muène, mu ʼaxaxi kʼosuku, hé u mu ambela, uixi: Kamba diami, ngi sobhese jimbolo jitatu.

⁶ Mukonda kamba diami ua ngi tula ku bhata, ua tundu mu kuenda njila, eme-phe ki ngala ni kima kia ku mu bhana kia kúdia.

⁷ Muenió-phe, uala mʼonzo, anga u kumbulula, uixi: Ku ngi zukutise! Dibhitu diòjike kiá, ni anʼami ni eme tuala kiá bhu hama. Ki ngi tena dingi kubalumuka mu ku ku bhana jimbolo.

⁸ Anga mukuá u jiza ni kubunda. Ngi mi ambela, né ka balumuka ku mu bhana na-ju mukonda dia kukala kamba diê, mukonda dia kujiza kuê, ua-ndu balumuka nʼa mu bhane kiá ioso ia bhindamena.

⁹ Eme-phe ue ngi mi ambela: Bhingenu, nda a mi bhane. Sotenu, nda mu sange. Bundenu, nda a mi jikuile dibhitu.

¹⁰ Mukonda uoso u bhinga, u tambula; o uoso u sota, u sanga; o uoso u bunda, a mu jikuila o dibhitu.

¹¹ Tata kuẋi mudienu, se monʼê ua mu bhingi mbolo, u mubhana ditadi? Mba mona ua mu bhingi mbiji, bhu kididi kia mbiji u mu bhana nhoka?

¹² Mba ua mu bhingi diiaki, u tena ku mu bhana mvuanga?

¹³ Enu-phe, sumbala mua iibha miẋima, se muejiia kubhana ima iambote ku anʼenu, manhi Tatʼenu ia diulu, ka kala kota mu kubhana o Nzumbi Ikôla kua ió oso a mu bhinga?

Nguzu ia Jezú ia Nzambi, inga ia Belezebubu?

¹⁴ Jezú anga u kala mù tundisa o dimonho dia bhangesele muthu kukala dibubu, kuma ki di muehelele kuzuela. Kia zubha dimonho kutunda, dibubu di zuela, ene oso anga a diuana!

¹⁵ Maji amukuá mudiâ-phe a zuela, exi: Muène ua-lu tundisa madimonho mu nguzu ia Belezebubu, sobha ia madimonho.

¹⁶ Amukuá mu ku mu fikisa, a mu bhinga ku a londekeza kisumua ki tunda mu diulu, mbé a londekese kuila o kutena kuê kua tundu kua Nzambi.

¹⁷ Maji, Jezú-phe, kuma uejiia o ixinganeku iâ, uixi: O mundu ua sobha se ua di balukila ene mudiâ, ku ibuka-ibuka, ixi iê ia-nda kumuangana. Akua dibhata dimoxi ue, se a di balukila, hé enda ni ku di kuata-kuata ene mudiâ, dibhata diodio di senguluka.

¹⁸ O utuminu ua Satana-phe, se ua di balukila ni muene Satana, utuminu uê u nanga kiebhi? Mukonda enu muambe kuma nga-lu tundisa o madimonho mu nguzu ia Belezebubu.

¹⁹ O ki kala eme nga-lu tundisa o madimonho mu nguzu ia Belezebubu, o maxibulu enu ala ku mi kaiela, a ma tundisa mu nguzu ia nanhi? Kala kiki, o maxibuluʼenu ene a mʼidikisa kuila mu ima ioso i mua zuela, mua di nganala.

²⁰ O ki ki kala-phe eme nga tundisa madimonho mu mulembu ua Nzambi, kia kidi muene kuma Utuminu ua Nzambi ua mi tula.

²¹ Kindanda-phe se kiala ni uta, hé ki langidila o dibhata diê, jimbongo jê jòlunde kiambote.

²² Se kuiza-phe kindanda kia mukuá kia mu tundu ku nguzu, anga u mu tolola, hé u mu tambula uta uê ua dielela, u mu bhûnda imbamba ioso ia kexi na-iu hé u i uanauana.

²³ Uoso ka di te kumoxi ni Eme, ua di te ku unguma; uoso ka ngi bhongoluesa, mukua kumuanga.

O nzumbi iaxidi ki i bhanga ku muthu

²⁴ O Ngana Jezú hé u zuela dingi, uixi: O nzumbi ia ufusa ki i tunda moxi dia muthu, i nhunga ku ididi ia kukuta mù sota kunhoha. O ki ia-nda ku ku lémbua, uila uixi: Ngi vutuka mʼonzo iami mu nga tundile.

²⁵ O kia vutuka, u sanga muokòmbe muòiudike.

²⁶ Bhenhobho uia, hé u sota dingi sambuadi dia nzumbi, a mu tundu muène ku ufusa, ene oso anga a bokona, a tunga moxi diê. Kienhókio, o ukalelu ua muthu ió-phe ua kusekala dingi kiavulu, o kia diangele kukala ndenge.

O kuzediua kua kidi

²⁷ Muène kioso kia kexi kuzuela imʼiíi, muhatu mu ʼaxaxe ka kifuẋi u zangula dízui, uixi: Dia zediua o divumu dia ku ambatele, ma zediua o mele ma kuamuisine, Ngana!

²⁸ Muène-phe u vutula, uixi: Kiene, maji a beta o kuzediua oso evua o Maka ma Nzambi anga a ma lunda!

O kijimbuete kia polofeta Jona

²⁹ Kia bhongoloka o kifuẋi, Jezú u kuata kuzuela, uixi: Muiji iú ua lelu, ua bhukumuka! A bhinga kisunji mu kijimbuete kia kumona mba mu ima ienhíʼii i ngi bhanga, o Nzambi ue kia mu uabhela. Kijimbuete-phe ka a bhana-kiu, kikala ngó kijimbuete kia polofeta Jona.

³⁰ Mukuâ ni Jona kia bilukile kijimbuete ku akua Ninive, kiene ue kiandu kala Monʼa Muthu ku muiji uenhú.

³¹ Mu kizuua kia kufundisa, Sobha-ia-Muhatu, ia Sulu, ua kà balumuka mu kufunda, kumoxi ni enu mu mala a muiji iú, hé ua kà miʼêlesa; mukonda muène ua tundile dikanga ku maẋokololo ma ixi mu kuívua o uhete ua kuijiia kua Solomá. Maji, ijiienukiu-phe kuma, bhenhabha bhu tuala, sai-bhu ua tundu Solomá mu ukota!

³² Mu kizuua kia kufundisa, o mundu ua akuâ Ninive ua kà balumuka mu kufunda kumoxi ni mundu ua muiji iú, hé a kà uêlesa, mukonda ene akuatele kikote anga a diela ituxi iâ, kioso kievile o Njimbu ia a bokelele Jona. Maji ijiienu-kiu-phe kuma, bhenhabha, bu tuala, sai-bhu ua tundu Jona mu ukota.

O kimuiku kia mukutu

³³ Jezú anga u kuata dingi kuzuela, uixi: Kana muthu u uika kandeia, ni a ka bhake mu dikungu, mba moxi a kitutu. Kikale u ka ta ku thanduʼ a meza, mbé oso a bokona mʼonzo, ni a mone kiambote o kumuika kuê.

³⁴ O kimuiku kia mukutu-phe, o diesu. O diesu se dia ku iuka, mukutu ué uoso u kala mua zele; diesu-phe se dia ku zangiua, ni mukutu ué u kala mua vundu.

³⁵ Alukenu-phe phala o kumuika ku muala-na-ku moxi, ki ku kale kitombe.

³⁶ Mukonda o mukutu uenu uoso se ua di muika, sé ngó bhuma bhua vundu, u kala-phe ua zele uoso, kala kandeia ki ka ku zelesa ni kumuika kuê.

Jezú u bazela Jifalizeu ni Jimesene ja Kitumu

³⁷ Jezú kia kexile hanji mu zuela, falizeu imoxi u mu bhinga kuia mu ku jandala-nê mʼonzo iê. Muène anga o bokona, hé u xikama ku meza.

³⁸ Falizeu-phe ua mu diuana kia mu mono kuila ka dianga hanji ku di sukula.

³⁹ Ngana Jezú anga u mu ambela, uixi: Enu mu jifalizu, o kopho ni dilonga mu di kondona ku kanga; moxi dienu-phe muezala uíi ni phulu.

⁴⁰ Ioua! Uoso ua bhange mbandu ia kanga, ki muène ue ua bhange o mbandu ia moxi?

⁴¹ Kala kiki, ima ioso ia mi kala moxʼa kopho ni dilonga, bhanenu-iu ku jingadiama, nda ima ioso i mi kale iazele.

⁴² Lamba dienu-phe, mu jifalizeu! Mukonda enu Nzambi mu mu futa o dijimu dia kizaka, ni dia sabhola, ni dia tu-idima tuoso, o kufundisa-phe, mu kidi, ni henda ia Nzambi, mua i xé bhoxi. Mua fuamene kuila o iíi mu i bhanga, o ioio-phe ue ki mu i xi dingi.

⁴³ Lamba dienu, enu mu jifalizeu! Mukonda enu mua zolo kiavulu o ialu ia dianga mu malombe, ni ku mi menekena ni ujitu uoso bhu itanda.

⁴⁴ Lamba dienu! Kuma mua di fangana jimbila ki ja moneka ku mesu, athu ka kʼ ijiia, endela ku thandu diê.

⁴⁵ Bhenhobho, mesene imoxi ia Kitumu, anga u kumbulula Jezú, uixi: Mesene, mu kuzuela kiki, ua tu âmbe ue ni etu.

⁴⁶ Muène-phe u vutula, uixi: Lamba dienu ue, enu mu jimesene ja Kitumu! Mukonda enu mu xina athu imbamba ia bhonzo ku iambata, enuʼenu-phe imbambʼoio ki mu i kuata, né ngó ni mulembu uenu umoxi mu ku a kuatekesa.

⁴⁷ Lamba dienu! Mukonda mu tunga ni uhete uoso o jimbila ja jipolofeta, maji jitata jenu ene muene a ji jibha.

⁴⁸ Kienhiki muala mu jimbangi, kuma mua londekeza kuila enu mua xikana ue o ikalakalu ia jitata jenu. Mukonda ene a ji jibha, enu-phe mua ji tungila o jimbila.

⁴⁹ Mukonda dia kiki, Nzambi mu uhete uê uambe kuma: Ngi mi tumikisa jipolofeta ni jipoxolo. Jimoxi mua-ndu ji jibha, o jamukuá mua-ndu ji zukutisa.

⁵⁰ Kienhiki ki bhangesa kuila o manhinga moso ma jipolofeta ma xamujuka mu ngongo, tunde ku dimatekenu diê, a-nda ku ma bhela kaxtiku ku muiji iú.

⁵¹ Tunde ku manhinga ma kúfua kua Abele, katé ku manhinga ma Zakadiia ua fidile bhu ʼaxaxe ka kalatódio ni Kididi Kikôla kia Tembulu. Xí, ngi mi ambela muene kuma manhinga mene moso a-nda ku ma bhela kaxtiku ku muiji ua lelu uenhú.

⁵² Lamba dienu, enu mu jimesene ja Kitumu! Mukonda o sabhi ia dibhitu dia inzo ia kuijiia, enu mua i katula-ku. Enu muedi enʼ uenu ki mua bokona, o iá eju bokona mua a fudisa.

⁵³ Jezú kia zubha ku tunda muenhomo, asoneki, ni jifalizeu, a kala mu ku mu âmba kiavulu, a sota ku mu zuelesa dingi ima iavulu.

⁵⁴ Kuma a mu batamena phala ku mu kuata mu kima kioso-kioso ki tunda mu dikanu diê.