Luka 1 - O Mikanda Ikola

Dimatekenu

¹ Kamba diami Tiiófilu: Athu avulu kiá a kuata kusoneka mu Mikanda o ima ioso ia bhitile mu dietu.

² Ene a i soneka kala kia tu tangelele na-iu oso a kexile jimbangi tunde ku dimatekenu, anga a kala jiphoxi ja diambu.

³ Eme uami ki nga zubha ku ibhudisa kiambote tunde ku ia tundile, ngandala, Eselênsia diê Na Tiiófilo, ku ku sonekena na-iu mu kimoxi kimoxi,

⁴ eie ue ni u ijiie o kidi kia ima ioso iene ku ku longa.

Mukunji Ngabidiiele u zungila Zakadiia

⁵ Mu izuua ia Helode, muenexi ua Judeia, mua kexile nganga ia Nzambi a mu ixana Zakadiia, ua tokala mu kibuka kia Abiia. O muhatuʼê ua tokala ue ku muiji ua Alá, o muiji ua jinganga, dijina diê Nzebele.

⁶ Kiiadi kiâ anga a kala athu aiuka bhu pholo ia Nzambi, athu a kuenda mu itumu ioso ni ijila ia Ngana, sé kima ki tokala ku a bazela.

⁷ Ene-phe ka moneka mona, mukonda Nzebele ua kexile mbaku; o ene kiiadi kiâ, a kuata kiá mivu iavulu.

⁸ Anga ki bhita kuma, kizuua kimoxi, Zakadiia u kala mù bhanga unganga bhu pholo ia Nzambi, mu izuua ieza-ku o kibuka kiê.

⁹ Muène anga ki mu tokala, mu kífua kia unganga, o kubokona mu Tembulu ia Ngana, mù bhanga o fumasa ia dixi dia dizumba.

¹⁰ O kifuẋi kioso kia diembu anga ki kala bhu kanga mù samba, kiso nganga Zakadiia kia kala mu bhakula o fumasa ia dixi dia dizumba.

¹¹ Anga ku mu tukulukila mukunji ua Ngana, uemana ku mbandu ia kadilu ia kalatódio ka dizumba.

¹² Zakadiia anga u sasumuka kia mu mono, uôma u mu kuata.

¹³ Mukunji anga u mu ambela, uixi: Ku kale ni uôma Zakadiia! Mukonda musambu ué Nzambi ua uivu. Muhatuʼé, Nzebele, ua-ndu ku vualela monʼa diiala, eie u mu luka dijina dia Nzuá.

¹⁴ Eie ua-ndu kala ni kutana ni kusanguluka; mu ku mu vuala kuê, athu avulu a-ndu sanguluka.

¹⁵ Mukonda muène u kala kota dia muthu bhu pholo ia Ngana, ka kà nua vinhu, mba kúnua kuoso-kuoso ku kodiuisa; hé uizala-phe ni Nzumbi Ikôla, tunde kiá mu divumu dia mamʼá.

¹⁶ Ndumba dia akua Izalaiele, ua-nda ku a biluila kua Ngana dia Nzambi iâ.

¹⁷ Muène u kala mukunji ua Nzambi, ua kà soka ni polofeta Elija mu nguzu ni kutena, nʼa kà bhangesa kuila o ana ni jitata a dʼivua, o ió abhukumuka a kà vutukila mu njila ia kuiuka, nʼa tena kubhangesa kuila o kifuẋi kia diembu dia Izalaiele ki di iudika mu kuxikamena o kuiza kua Ngana.

¹⁸ Zakadiia anga u ambela mukunji, uixi: Eme ngi kʼijiia kiebhi? Mukonda eme nga kuka kiá, ni mukajiʼami ue ua sunga-ku kiá ku izuua iê.

¹⁹ Mukunji anga u mu tambuijila, uixi: Eme Ngabidiiele, ngene kuimana bhu pholo ia Nzambi. Muène iu ua ngi tumu ku ku zuelesa, ku ku tudila o njimbu iíi iambote.

²⁰ Kiki-phe u kala u dibubu, kutena kuzuela, katé kizuua kia kà bhita imʼiíi, mukonda eie kua xikana kizuelu kiami, maji o kiene-phe kia kà bhita bhu thembu iê.

²¹ Kiosuʼiki-phe imʼiíi iala kubhita, o kifuẋi ku kanga hanji ia kinga Zakadiia, anga a diuana mukonda dia kukokoloka kuê mu Tembulu.

²² Kia zubha kutunda-phe, ka tena ku a zuelesa. Anga a mu mona kuma ua diuana kisuma mu Tembulu. Muène anga u kuata ku a bhalula ni kubhanga ngó ijimbuete ni maku; u kala dibubu.

²³ O Zakadiia, kioso kia-bhu o izuua iê ia unganga mu Tembulu, anga u vutuka ku bhata diê.

²⁴ Kia bhiti izuua iòfele, muhatuʼê Nzebele anga uimita, hé u suama hanji mʼonzo mbeji jitanu, uixi:

²⁵ Eué! Ngana ua ngi bhange o mbote! Izuuʼiíi muène ia ngi xinganeka o ku ngi katula muôndo muʼaxaxi ka akuetu. Kana-ku dingi muthu ua-nda ku ngi tela dibete.

Ngabidiiele u zungila Madiia

²⁶ Nzebele mu kuimita kuê, kia bhixila mu mbeji ia kasamanu, mukunji Ngabidiiele anga a mu tuma kuala Nzambi, ku sanzala ia Ngalileia, a ixana Nazalé.

²⁷ Mukunji uambata njimbu phala ku i tula kua monʼa muhatu, a mu lembe kiá kuala diiala dia mukua muiji ua sobha Davidi, dijina diê Zuze. O muzeletete iú dijina diê Madiia.

²⁸ Mukunji anga u bokona, uixi: Nga ku menekena Madiia! Eie a ku zediuisa kiavulu kuala Nzambi! Ngana uala ni eie.

²⁹ Madiia anga u sasumuka kiavulu, ki evu kizueluʼiki! Hé u kala mù banza, mba kumenekena kuahiʼoko!

³⁰ Mukunji-phe, uixi: Ku kale ni uôma, Madiia! Mukonda eie ua bongo kuzediua kua Nzambi.

³¹ Talesa, ua-ndu kuimita mu vumu dié, hinu u vuala monʼa diiala, u mu luka dijina dia Jezú.

³² Muène uandu kala kota dia muthu, a kà mu ixana Monʼa Nzambi ia Diulu. O Ngana Nzambi ua kà mu bhanga Sobha, kala kia kexile tatʼâ Davidi mu xahulu.

³³ Muène ua kà tumina o dibhata dia Jakobo katé ni ku hádia. O Ungana uê ki uá kà-bhua dingi.

³⁴ Madiia bhenhobho anga u ambela o mukunji, uixi: Kiki, ki bhita kiebhi, eme ki ngʼejiia luua diiala?

³⁵ Mukunji u mu vutuila, uixi: O Nzumbi Ikôla ua-ndu tuluka ku thandu dié, o nguzu ia Nzambi ia Diulu ia-nda ku ku vungina kizúzumbia kiê. Ki bhangesa kuila o mona ukôla ua-nda ku mu vuala, a mu ixana Monʼa Nzambi.

³⁶ Xinganeka hanji ndandu ié Nzebele, a kexi ku mu ila mbaku, kiki uemita ue monʼa diiala mu uadikime uê; mbeji samanu kiá a mu kuata.

³⁷ Mukonda kua Nzambi, kana-ku kima ki kamba kuẋikina.

³⁸ Madiia uixi: Emeʼamiʼú, ngi mubhika ua Ngana. Ki ngi bhite, Ngana, kala ki ua ki zuela. Mukunji anga u tunda bhu mbandu iê.

Madiia u zungila Nzebele

³⁹ Ki bhua bhiti tu-izuua, Madiia anga u balumuka, uia malusolo ku milundu, ku sanzala ia tokala ku Judeia.

⁴⁰ Anga u bokona mʼonzo ia Zakadiia, u menekena Nzebele.

⁴¹ Bhenhobho Nzebele ki evu umenekenu ua Madiia, monʼê mu mala ua tuka. Nzebele anga uizala ni Nzumbi Ikôla.

⁴² Anga u di kola ni dízui dia suina, uixi: Eie ua beta kuzediua mu ahatu ni akuenu! Mu tuana ue ua beta o kuzediua monʼé uanda ku mu vuala!

⁴³ Eme kia ngi tundila kuebhi, kuila mamʼa Ngana iami uiza ku ngi zungila?

⁴⁴ Talesa, kia ngi bhixila mu mátui o dízui dia umenekenu ué, mona mu mala diami ua tuka ni kusanguluka!

⁴⁵ Eie ua zediua, mukonda ua xikana kuma hinu i bhita, ioso ia ku tudila kua Ngana.

O muimbu ua Madiia

⁴⁶ Kuala Madiia: Muẋima uami ua ximana Ngana,

⁴⁷ o nzumbi iami ia sanguluka mua Nzambi, Kibha-muenhu kiami.

⁴⁸ Mukonda muène ua te mesu mu kutola kua mubhikʼê! Talesa, tunde lelu, miji ioso ia-ndu ngi tumbula kuma ngi muhatu ua zediua.

⁴⁹ Mukonda Muteniʼa ioso ua ngi bhange ima iònene; dijina diê di kôla!

⁵⁰ O henda iê ia kalé ku miji ni miji ku thandu dia iá oso a mu xila.

⁵¹ Ua bhange ima ia nguzu ni lúkuaku luê, ua muanganesa akua izala mu ikutu ia miẋima iâ.

⁵² Anʼa jingana ua a tulula ku iandu, iú ua bandesa-ku a tolo o majina.

⁵³ Uezalesa akua nzala ni jimbote, o jimvuama ua ji kaie ni maku mòkukutu.

⁵⁴ Ua kuatekesa Izalaiele dia mubhikʼê, Iú ua banze o henda iê, kala ki ambelele o jitata jetu.

⁵⁵ Mukonda ua xinganeka o henda ia kuatela Mbalahamu ni luvualu luê, katé ku mivu ni mivu!

⁵⁶ Madiia anga ukala ni Nzebele mu jimbeji jitatu. Ki ja-bhu, anga u vutuka ku bhata diê.

Nzuá dia Batizu a mu vuala

⁵⁷ Kiki izuua ia Nzebele, ia kuvuala, i bhixila, anga u vuala monʼa diiala.

⁵⁸ Akua bhata ni jindandu jê, anga évua kuma Ngana ua mu vudixila o henda iê, anga ene oso a sanguluka-nê kumoxi.

⁵⁹ Kizuua kia kanake anga eza kusaia o kamona. Anga a mesena ku mu ixana dijina dia tatʼâ Zakadiia.

⁶⁰ Manhʼâ-phe u tambuijila, uixi: Kana! Kikale dijina diê a mu luka Nzuá.

⁶¹ Akuâ a mu ambela, exi: Ku muiji ué ki kuene muthu ni dijina diodio!

⁶² Anga a bhalula tatʼâ, ni ku mu bhangela ijimbuete, se uandala o mona a mu luka nanhi.

⁶³ Zakadiia anga u bhinga kadibaia ka kusonekena, anga u soneka, uixi: Dijina diê Nzuá. Ene oso anga a diuana!

⁶⁴ Kathanganʼoko dikanu diê di jikuka, ni dimi diê di jituka, Zakadiia anga u kala dingi mù zuela ni kuximana Nzambi.

⁶⁵ Jinzukame jê, ene oso a tungu bhobho, uôma anga u a kuata. Ima ioso iíi anga i fumana mu milundu ioso ia Judeia.

⁶⁶ Oso muene a ívua, anga a i lunda ku muẋima, exi: O monʼú, ua-ndu kala kiebhi? Lúkuaku-phe lua Ngana, lu kala ni muène.

Muimbu ua Zakadiia

⁶⁷ Zakadiia, dia Tatʼâ, anga uizala ni Nzumbi Ikôla, hé u kala mù zambula uixi:

⁶⁸ Sakidilenu Ngana, Nzambi ia Izalaiele! Kuma mundu uê ua u zungila, ua u kula;

⁶⁹ ua tu zangelekela Mubhuludi ua nguzu phala ku tu bhulula u tundu mu mbutu ia mubhikʼê Davidi—

⁷⁰ kala kia zuela mu kanu dia jipolofeta jê tunde xahulu—

⁷¹ kuma Nzambi ua tanga ku tu bhulula bhu maku ma jinguma jetu, ni bhu maku ma oso a tu kuatela lûma;

⁷² uambe kulondekesa o henda ku jitata jetu, ni kulembalala o kikutu kiê kia ngene.

⁷³ Kia mulôko, ua lokelele Mbalahamu tatʼetu,

⁷⁴ kuila u tu kudila bhu maku ma jinguma jetu, phala tu mu kalakele muène sé uôma,

⁷⁵ mu kuzela ni kuiuka bhu pholo iê, izuua ietu ioso.

⁷⁶ Eie-phe kamona, a-nda ku kuixana Polofeta ia Nzambi ia Diulu. Kuma ua kà tuamenena bhu pholo ia Ngana mu ku mu iudikila jinjila jê;

⁷⁷ ni kuijidisa athuʼê ki kala o kubhuluka, mu ku a loloka o ituxi iâ,

⁷⁸ mukonda Nzambi ietu, Nzambi ia jihenda ni mbote! Ua bhangesa Dikumbi-dia-Thunda ku tu zungila,

⁷⁹ Ni kumuikina oso a xikama mu kuvunda kua kizenji kia kalunga; mbé o kuendesa inama ietu mu njila ia kutululuka.

⁸⁰ Anga o kamona kenda ni kukula, ni kukola mu mukutu ni nzumbi. Anga ka kala mu solongo dia muxitu, katé kizuua kiê kia kutukuluka mu Izalaiele.